ಕಡಲಾಮೆ
| ಕಡಲಾಮೆಗಳು Temporal range: Triassic to Recent
| |
|---|---|
| |
| ಫ಼್ಲಾರಿಡಾ ಬಾಕ್ಸ್ ಟರ್ಟಲ್ ಟೆರಾಪೀನ್ ಕ್ಯಾರೊಲೀನಾ | |
| Scientific classification | |
| ಸಾಮ್ರಾಜ್ಯ: | |
| ವಿಭಾಗ: | |
| ಉಪವಿಭಾಗ: | |
| ವರ್ಗ: | |
| ಗಣ: | ಟೆಸ್ಟುಡೈನ್ಸ್ |
| ಉಪಗಣಗಳು | |
|
ಕ್ರಿಪ್ಟೊಡೈರಾ | |
| Diversity | |
| ೧೪ ಉಳಿದಿರುವ ಕುಟುಂಬಗಳು, ಸು. ೩೦೦ ಪ್ರಭೇದಗಳು | |
| |
| ನೀಲಿ: ಸೀ ಟರ್ಟಲ್ಸ್, ಕಪ್ಪು: ಲ್ಯಾಂಡ್ ಟರ್ಟಲ್ಸ್ | |
ಕಡಲಾಮೆಗಳು ಸರೀಸೃಪ ವರ್ಗಕ್ಕೆ ಸೇರಿದವು. ಇವುಗಳ ಗಣ ಟೆಸ್ಟುಡೈನ್ಸ್. (ಇವುಗಳಲ್ಲಿ ಮೇಲು ವರ್ಗದ ದೊಡ್ಡ ಗಾತ್ರದ ಗುಂಪಿಗೆ ಸೇರಿದ್ದು ಚಿಪ್ಪಿರುವ ಪ್ರಾಣಿ -ಕೆಲೋನಿಯಾ-) ಇವುಗಳು ಪಕ್ಕೆಲುಬುಗಳಿಂದ ಬೆಳವಣಿಗೆ ಹೊಂದಿ ಕವಚವಾಗಿ ಕಾರ್ಯನಿರ್ವಹಿಸುವ ಎಲುಬು ಅಥವಾ ಮೃದ್ವಸ್ಥಿಪೂರಿತ ಚಿಪ್ಪನ್ನು ಹೊಂದಿರುತ್ತವೆ. "ಕಡಲಾಮೆ"ಯು ಒಟ್ಟಾರೆಯಾಗಿ ಟೆಸ್ಟುಡೈನ್ಸ್‌ನ್ನು ಸೂಚಿಸಬಹುದು ಅಥವಾ ವಿಶಿಷ್ಟ ಟೆಸ್ಟುಡೈನ್ಸ್‌ನ್ನು ಸೂಚಿಸಬಹುದು.
ಟೆಸ್ಟುಡೈನ್ಸ್ ಗಣವು ಈಗಲೂ ಜೀವಿಸಿರುವ ಮತ್ತು ನಶಿಸಿ ಹೋಗಿರುವ ಪ್ರಭೇದಗಳನ್ನು ಹೊಂದಿದೆ. ಕಡಲಾಮೆಗಳ ಅತಿ ಪ್ರಾಚೀನ ಅಸ್ತಿತ್ವ ಕಂಡು ಬಂದದ್ದು ೨೧೫ ದಶಲಕ್ಷ ವರ್ಷಗಳ ಹಿಂದೆ.[೨] ಇದು ಕಡಲಾಮೆಗಳನ್ನು ಅತಿ ಹಳೆಯ ಸರೀಸೃಪ ಗುಂಪಿಗೆ ಸೇರಿಸಿದೆ ಮತ್ತು ಹಲ್ಲಿಗಳು ಹಾಗೂ ಹಾವುಗಳಿಗಿಂತಲೂ ಇವು ಪ್ರಾಚೀನವಾಗಿವೆ. ಇಂದು ಜೀವಂತವಿರುವ ಅನೇಕ ಪ್ರಭೇದಗಳಲ್ಲಿ ಕೆಲವು ಅತ್ಯಂತ ಅಪಾಯದಂಚಿನಲ್ಲಿವೆ.[೩]
ಸಾಮಾನ್ಯವಾಗಿ ಸ್ಫಾರ್ಜಿಡೀ ಮತ್ತು ಕೀಲೊನೈಯಿಡೀ ಕುಟುಂಬಗಳಿಗೆ ಸೇರಿದ ಪ್ರಾಣಿಗಳನ್ನು ಕಡಲಾಮೆಗಳೆನ್ನುತ್ತಾರೆ. ಇವುಗಳಲ್ಲಿ ಮೊದಲನೆಯ ಕುಟುಂಬಕ್ಕೆ ಸೇರಿದ ಡರ್ಮೋಕೆಲಿಸ್ ಕೋರಿಯೇಸಿಯ ಮತ್ತು ಎರಡನೆಯದಕ್ಕೆ ಸೇರಿದ ಕಿಲೋನೀ ಇಂಬ್ರಿಕೇಟ ಮತ್ತು ಕಿ. ಮೈಡಾಸ್ ಎಂಬುವು ಮುಖ್ಯವಾದ ಬಗೆಯ ಕಡಲಾಮೆಗಳು.
ಇತರ ಸರೀಸೃಪಗಳಂತೆ ಕಡಲಾಮೆಗಳು ಶೀತರಕ್ತ ಪ್ರಾಣಿಗಳು. ತಾವು ವಾಸಿಸುವ ಪರಿಸರಕ್ಕೆ ತಮ್ಮ ಆಂತರಿಕ ತಾಪಮಾನವನ್ನು ಹೊಂದಿಸಿಕೊಳ್ಳುವ ಸಾಮರ್ಥ್ಯವಿರುವ ಪ್ರಾಣಿಗಳನ್ನು ಶೀತರಕ್ತದ ಪ್ರಾಣಿಗಳು ಎನ್ನುವರು. ಆದರೆ ತೊಗಲುಬೆನ್ನಿನ ಕಡಲಾಮೆಗಳು ತಮ್ಮ ಸುತ್ತಲಿನ ನೀರಿಗಿಂತಲೂ ಗಮನಾರ್ಹವಾಗಿ ಹೆಚ್ಚಿನ ಶರೀರ ತಾಪಮಾನವನ್ನು ಹೊಂದಿರುತ್ತವೆ. ಇದಕ್ಕೆ ಕಾರಣ ಇವುಗಳ ಅತ್ಯಧಿಕ ಚಯಾಪಚಯ (ಮೆಟಾಬೊಲಿಕ್) ಪ್ರಮಾಣ.
ಇತರ ಭ್ರೂಣಕೋಶ ಪ್ರಾಣಿಗಳಂತೆ (ಸರೀಸೃಪಗಳು, ಡೈನೋಸಾರ್, ಹಕ್ಕಿಗಳು ಮತ್ತು ಸಸ್ತನಿ) ಇವು ಗಾಳಿಯನ್ನು ಉಸಿರಾಡುತ್ತವೆ ಮತ್ತು ಅನೇಕ ಪ್ರಭೇದಗಳು ನೀರಿನಲ್ಲಿ ಅಥವಾ ಸುತ್ತಲೂ ವಾಸಿಸುತ್ತಿದ್ದರೂ ನೀರಿನಲ್ಲಿ ಮೊಟ್ಟೆಗಳನ್ನು ಇಡುವುದಿಲ್ಲ. ಅತಿದೊಡ್ಡ ಕಡಲಾಮೆಗಳು ನೀರಿನಲ್ಲಿ ವಾಸಿಸುವವು.
ಕಡಲಾಮೆ ಮಾಂಸಾಹಾರಿ. ಸೀಗಡಿ, ನಳ್ಳಿ, ಮೀನು ಮುಂತಾದವು ಇದರ ಆಹಾರ. ಮೊಟ್ಟೆಯಿಡುವ ಕಾಲ ವಸಂತಋತು. ಮರಳಿನ ತೀರಕ್ಕೆ ಬಂದು ದೊಡ್ಡ ದೊಡ್ಡ ಗುಂಡಿಗಳನ್ನು ತೋಡಿ ಅವುಗಳಲ್ಲಿ ಮೊಟ್ಟೆಯಿಟ್ಟು ಗುಂಡಿಗಳನ್ನು ಮುಚ್ಚಿ ನೀರಿಗೆ ಮರಳುತ್ತದೆ. ಬಿಸಿಲಿನ ಶಾಖದಿಂದಾಗಿ ಮೊಟ್ಟೆಗಳು ಒಡೆದು ಮರಿ ಆಮೆಗಳು ಹೊರಬರುತ್ತವೆ. ಇವು ನಿಧಾನವಾಗಿ ತೆವಳಿಕೊಂಡು ಹೋಗಿ ಸಮುದ್ರವನ್ನು ಸೇರಿ ತಮ್ಮ ಸ್ವತಂತ್ರ ಜೀವನವನ್ನು ಆರಂಭಿಸುತ್ತವೆ. ಕೀಲೊನೈಯಿಡೀ ಕುಟುಂಬದ ಕಿಲೋನೀ ಜಾತಿಯ ಕಡಲಾಮೆಗಳು ವೆಸ್ಟ್‌ ಇಂಡೀಸ್, ಮಲೇಸಿಯ, ಪಶ್ಚಿಮ ಆಫ್ರಿಕಾ ಹಾಗೂ ಸಿಂಹಳ ದೇಶಗಳ ಸಮುದ್ರತೀರಗಳಲ್ಲಿ ಸಾಮಾನ್ಯ. ನೋಡುವುದಕ್ಕೆ ತೊಗಲಾಮೆಯಂತೆ ಕಂಡರೂ ಕೆಲವು ಲಕ್ಷಣಗಳಲ್ಲಿ ಅದಕ್ಕಿಂತ ಭಿನ್ನವಾಗಿವೆ. ಕಾಲುಗಳಲ್ಲಿ ಒಂದು ಅಥವಾ ಎರಡು ಉಗುರುಗಳಿರುವುದೂ ಕ್ಯಾರಪೇಸಿನ ಫಲಕಗಳು ಗಡುಸಾಗಿರುವುದೂ ಇವುಗಳ ಮುಖ್ಯ ಲಕ್ಷಣಗಳು. ಉಳಿದ ಜೀವನಕ್ರಮವೆಲ್ಲ ತೊಗಲಾಮೆಯಂತೆಯೇ. ಕಿಲೋನೀ ಇಂಬ್ರಿಕೇಟ ಎನ್ನುವ ಪ್ರಭೇದವನ್ನು ಸಾಮಾನ್ಯವಾಗಿ ಗರುಡಮೂಗಿನ ಆಮೆಯೆಂದು ಕರೆಯುತ್ತಾರೆ. ಇದು ಮಾಂಸಾಹಾರಿ. ಇದರ ಚಿಪ್ಪನ್ನು ಹಲವಾರು ಬಗೆಯ ವಸ್ತುಗಳನ್ನು ಮಾಡಲು ಉಪಯೋಗಿಸುತ್ತಾರೆ. ಕಿಲೋನೀ ಮೈಡಾಸ್ ಪ್ರಭೇದಕ್ಕೆ ಹಸಿರು ಆಮೆ ಎಂಬ ಸಾಮಾನ್ಯ ಹೆಸರಿದೆ. 3 ಮೀ ಉದ್ದ ಬೆಳೆಯುವ ಇದು ಸಸ್ಯಾಹಾರಿ. ಇದರ ಕೊಬ್ಬು ಹಸಿರು ಬಣ್ಣಕ್ಕಿರುವುದರಿಂದ ಇದಕ್ಕೆ ಹಸಿರು ಆಮೆ ಎಂಬ ಹೆಸರು.
ಕಡಲಾಮೆಗಳು ತಾವು ಸಿಕ್ಕುವ ಸ್ಥಳಗಳ ನಿವಾಸಿಗಳಿಗೆ ಆಹಾರವಸ್ತುಗಳಾಗಿವೆ. ಇವುಗಳ ಮೊಟ್ಟೆಯನ್ನೂ ತಿನ್ನುತ್ತಾರೆ. ಹಸಿರು ಆಮೆಯ ಮಾಂಸದಿಂದ ಮಾಡಲಾಗುವ ಸಾರು (ಟರ್ಟಲ್ ಸೂಪ್) ಬಹು ಪ್ರಸಿದ್ದವಾದ ಪೇಯವಸ್ತು.
ದೇಹರಚನೆ ಮತ್ತು ರೂಪವಿಜ್ಞಾನ
[ಬದಲಾಯಿಸಿ]
ಅತಿದೊಡ್ಡ ಕಿಲೋನಿಯನ್ ಎಂದರೆ ತೊಗಲುಬೆನ್ನಿನ ಕಡಲಾಮೆ (ಡೆರ್ಮೋಕೆಲಿಸ್ ಕಾರಿಯೇಸಿಯಾ). ಇದರ ಚಿಪ್ಪಿನ ಉದ್ದ 200 centimetres (6.6 ft) ವರೆಗೆ ಬೆಳೆಯುತ್ತದೆ ಮತ್ತು ಭಾರೀ ತೂಕವನ್ನೂ ಹೊಂದಿರುತ್ತದೆ (900 kilograms (2,000 lb)). ಸಿಹಿ ನೀರಿನ ಆಮೆಗಳು ಸಾಮಾನ್ಯವಾಗಿ ಚಿಕ್ಕದಿರುತ್ತವೆ. ಆದರೆ ಈ ಪ್ರಭೇದದಲ್ಲಿಯೇ ದೊಡ್ಡ ಪ್ರಮಾಣದಲ್ಲಿರುವುದು ಏಶಿಯದ ಮೃದುಚಿಪ್ಪಿನ ಆಮೆ ಪೆಲೋಕೆಲಿಸ್ ಕ್ಯಾಂಟೋರಿ. ಇದರ ಕೆಲವು ಆಮೆಗಳು 200 centimetres (6.6 ft) ವರೆಗೆ ಬೆಳೆದಿವೆಯೆಂದು ವರದಿಯಾಗಿದೆ. ಇದು ಹೆಚ್ಚು ಪರಿಚಿತವಾದ, ಉತ್ತರ ಅಮೇರಿಕದಲ್ಲಿನ ಅತಿ ದೊಡ್ಡ ಕೆಲೋನಿಯನ್ ಆಗಿರುವ, ಮತ್ತು 80 centimetres (2.6 ft) ಚಿಪ್ಪಿನ ಉದ್ದ ಹಾಗೂ 60 kilograms (130 lb) ತೂಗುವ ಎಲಿಗೇಟರ್ ಸ್ನ್ಯಾಪಿಂಗ್ ಟರ್ಟಲ್‍ನ್ನು ಕುಬ್ಜವಾಗಿಸುತ್ತದೆ. ಜಿಯೋಕೆಲೋನ್, ಮಿಯೋಲಾನಿಯಾ ಮತ್ತಿತರ ಜಾತಿಗಳ ಭಾರೀ ಗಾತ್ರದ ಆಮೆಗಳು ಇತಿಹಾಸ ಪೂರ್ವ ಕಾಲದಲ್ಲಿಯೇ ಜಗತ್ತಿನ ಎಲ್ಲೆಡೆ ಪಸರಿಸಿದ್ದವು, ಮತ್ತು ಉತ್ತರ ಹಾಗೂ ದಕ್ಷಿಣ ಅಮೇರಿಕ, ಆಸ್ಟ್ರೇಲಿಯ ಹಾಗೂ ಆಫ್ರಿಕಾಗಳಲ್ಲಿ ಇವು ಅಸ್ತಿತ್ವದಲ್ಲಿದ್ದ ಬಗ್ಗೆ ತಿಳಿದಿದೆ. ಮಾನವನು ಅಸ್ತಿತ್ವಕ್ಕೆ ಬರುವ ಸಮಯದಲ್ಲಿ ಇವು ತಮ್ಮ ಅಸ್ತಿತ್ವವನ್ನು ಕಳೆದುಕೊಂಡವು. ಮಾನವನು ಇವುಗಳನ್ನು ತನ್ನ ಆಹಾರಕ್ಕಾಗಿ ಬೇಟೆಯಾಡಿದ ಎಂದು ಊಹಿಸಲಾಗಿದೆ. ಬದುಕುಳಿದಿರುವ ದೈತ್ಯ ಗಾತ್ರದ ಆಮೆಗಳು ಸೀಶೆಲ್ಸ್ ಮತ್ತು ಗಲಾಪಗಸ್ ದ್ವೀಪಗಳಲ್ಲಿ ಇವೆ. ಇವು 130 centimetres (51 in) ಗಿಂತ ಹೆಚ್ಚು ಉದ್ದವಿರುತ್ತವೆ ಮತ್ತು 300 kilograms (660 lb) ತೂಗುತ್ತವೆ.[೪]
ಅತ್ಯಂತ ದೊಡ್ಡ ಕಿಲೋನಿಯನ್ ಆರ್ಚೆಲೋನ್ ಇಸ್ಚಿರೋಸ್, ಮಧ್ಯಜೀವಿಕಲ್ಪದ ಉತ್ತರಾರ್ಧದಲ್ಲಿ (Late Cretaceous) ಇತ್ತು. ಇದು ೪.೬ ಮೀಟರ್ (೧೫ ಅಡಿ) ಉದ್ದ ಇತ್ತು ಎಂದು ತಿಳಿಯಲಾಗಿದೆ.[೫]
ಅತಿ ಸಣ್ಣ ಕಡಲಾಮೆಯೆಂದರೆ ದಕ್ಷಿಣ ಆಫ್ರಿಕದ ಮಚ್ಚೆಗಳಿರುವ ಮೃದು ಪಾದದ ಆಮೆ. ಇದು ೮ ಸೆ.ಮೀ.(೩.೧ ಅಂಗುಲ)ಕ್ಕಿಂತ ಉದ್ದವಿಲ್ಲ ಮತ್ತು ತೂಕ ಸುಮಾರು ೧೪೦ ಗ್ರಾಂ. (೪.೯ ಔನ್ಸ್) ನಷ್ಟಿದೆ. ಇತರ ಎರಡು ಚಿಕ್ಕ ಆಮೆಗಳ ಪ್ರಭೇದಗಳೆಂದರೆ ಅಮೆರಿಕದ ಮಡ್ ಟರ್ಟಲ್‍ಗಳು ಮತ್ತು ಮಸ್ಕ್ ಟರ್ಟಲ್‍ಗಳು. ಇವು ಕೆನಡಾದಿಂದ ದಕ್ಷಿಣ ಅಮೆರಿಕದವರೆಗೆ ವ್ಯಾಪಿಸಿವೆ. ಈ ಗುಂಪಿನ ಅನೇಕ ಪ್ರಭೇದಗಳಲ್ಲಿ ಚಿಪ್ಪಿನ ಉದ್ದ ೧೩ ಸೆ.ಮೀ.(೫.೧ ಅಂಗುಲ) ಕ್ಕಿಂತ ಕಡಿಮೆ ಇದೆ.
ಕುತ್ತಿಗೆ ಮಡಚುವುದು
[ಬದಲಾಯಿಸಿ]ತಮ್ಮ ಚಿಪ್ಪಿನೊಳಗೆ ಕುತ್ತಿಗೆಯನ್ನು ಹಿಂದಕ್ಕೆ ಎಳೆದುಕೊಳ್ಳುವ ಸಮಸ್ಯೆಯನ್ನು ಹೇಗೆ ನಿವಾರಿಸಿಕೊಂಡವು ಎನ್ನುವುದರ ಮೇಲೆ ಕಡಲಾಮೆಗಳನ್ನು ಎರಡು ಗುಂಪುಗಳಲ್ಲಿ ವಿಂಗಡಿಸಲಾಗಿದೆ. (ಪೂರ್ವಜರಾದ ಪ್ರೊಗಾನೋಚೆಲಿಸ್ ಗಳಿಗೆ ಹೀಗೆ ಮಾಡಲಾಗಲಿಲ್ಲ): ಕ್ರಿಪ್ಟೋಡಿರಾ - ತಮ್ಮ ಬೆನ್ನುಮೂಳೆಯ ಕೆಳಗೆ ಸಂಕುಚಿಸುತ್ತ ತಮ್ಮ ಕುತ್ತಿಗೆಯನ್ನು ಒಳಗೆ ಎಳೆದುಕೊಳ್ಳುವವು; ಪ್ಲ್ಯುರೋಡಿರಾ - ಪಕ್ಕಕ್ಕೆ ತಮ್ಮ ಕತ್ತುಗಳನ್ನು ಸಂಕುಚಿಸಿಕೊಳ್ಳುವವು.
ತಲೆ
[ಬದಲಾಯಿಸಿ]ಭೂಮಿಯ ಮೇಲೆಯೆ ತಮ್ಮ ಬದುಕಿನ ಹೆಚ್ಚಿನ ಕಾಲ ಕಳೆಯುವ ಬಹುತೇಕ ಕಡಲಾಮೆಗಳು ತಮ್ಮ ಮುಂದಿರುವ ವಸ್ತುವಿನ ಮೇಲೆ ದೃಷ್ಟಿಯನ್ನು ಕೇಂದ್ರೀಕರಿಸಿರುತ್ತವೆ. ನೀರಿನಲ್ಲಿರುವ ಕೆಲವು ಚಟ್ಟನೆ ಶಬ್ದಮಾಡುವ ಕಡಲಾಮೆಗಳು ಮತ್ತು ಮೃದು-ಚಿಪ್ಪಿನ ಕಡಲಾಮೆಗಳು ತಲೆಯ ತುದಿಭಾಗದ ಹತ್ತಿರದಲ್ಲಿ ಕಣ್ಣುಗಳನ್ನು ಹೊಂದಿರುತ್ತವೆ. ಈ ಪ್ರಭೇದದ ಕಡಲಾಮೆಗಳು ಆಳವಿಲ್ಲದ ನೀರಿನಲ್ಲಿ ತಮ್ಮನ್ನು ತಿನ್ನುವುದಕ್ಕೆ ದಾಳಿ ಮಾಡುವ ಪರಭಕ್ಷಕಗಳಿಂದ ಬಚಾವಾಗಲು ಕಣ್ಣುಗಳನ್ನು ಮತ್ತು ಮೂಗಿನ ಹೊರಳೆಗಳನ್ನು ಮಾತ್ರ ನೀರಿನ ಹೊರಗಿಟ್ಟು ಇಡೀ ಶರೀರವನ್ನು ನೀರಿನಲ್ಲಿ ಮುಳುಗಿಸಿಟ್ಟುಕೊಳ್ಳುತ್ತವೆ. ಸಮುದ್ರದ ಆಮೆಗಳು ಕಣ್ಣುಗಳ ಬಳಿ ಗ್ರಂಥಿಗಳನ್ನು ಹೊಂದಿದ್ದು ಇವು ಉಪ್ಪಿನಂಶ ಇರುವ ಕಣ್ಣೀರನ್ನು ಉತ್ಪಾದಿಸುತ್ತವೆ. ತಾವು ಕುಡಿದ ನೀರಿನಲ್ಲಿಯ ಹೆಚ್ಚುವರಿ ಉಪ್ಪಿನಂಶವನ್ನು ಶರೀರದಿಂದ ಈ ರೀತಿ ಹೊರ ಹಾಕುತ್ತವೆ.
ಕಡಲಾಮೆಗಳಿಗೆ ಅಸಾಧಾರಣವಾದ ರಾತ್ರಿ ದೃಷ್ಟಿ ಇದೆ ಎಂದು ತಿಳಿಯಲಾಗಿದೆ. ಇದಕ್ಕೆ ಕಾರಣ ಅವುಗಳ ಅಕ್ಷಿಪಟದಲ್ಲಿರುವ ಅಸ್ವಾಭಾವಿಕ ಭಾರೀ ಪ್ರಮಾಣದ ರಾಡ್ ಸೆಲ್ (ಕಡ್ಡಿಯಂಥ ಕೋಶ)ಗಳು. ಆಮೆಗಳು ಶಂಕು ಉಪಾಕೃತಿಯ ಸಂಪುಷ್ಟ ಬಣ್ಣದ ದೃಷ್ಟಿ ಹೊಂದಿವೆ. ಇದರ ಸಂವೇದನ ಶ್ರೇಣಿ ಅಲ್ಟ್ರಾವೈಯೋಲೆಟ್‍ನಿಂದ ಕೆಂಪಿನ ವರೆಗೆ ಇದೆ. ಭೂಮಿಯ ಮೇಲಿರುವ ಕೆಲವು ಆಮೆಗಳಲ್ಲಿ ಬೆಂಬತ್ತುವ ಚಲನ ಸಾಮರ್ಥ್ಯ ಇಲ್ಲ. ಸಾಮಾನ್ಯವಾಗಿ ಇವು ತೀವ್ರಗತಿಯಲ್ಲಿ ಚಲಿಸುವ ಬಲಿಪಶುವನ್ನು ಭಕ್ಷಣೆ ಮಾಡುವ ಇತರ ಜೀವಿಗಳನ್ನು ಅವಲಂಬಿಸಿವೆ. ಆದರೆ ಮಾಂಸಾಹಾರಿ ಕಡಲಾಮೆಗಳು ಆಹಾರವನ್ನು ಹಿಡಿಯಲು ಕತ್ತನ್ನು ಗಬಕ್ಕನೆ ಚಲಿಸುವ ಸಾಮರ್ಥ್ಯ ಹೊಂದಿವೆ.
ಕಡಲಾಮೆಗಳು ಒರಟಾದ ಬಾಗಿದ ಕೊಕ್ಕನ್ನು ಹೊಂದಿವೆ. ಕಡಲಾಮೆಗಳು ತಮ್ಮ ದವಡೆಯನ್ನು ಆಹಾರವನ್ನು ತುಂಡರಿಸಲು ಮತ್ತು ಅಗಿಯಲು ಬಳಸುತ್ತವೆ. ಕಡಲಾಮೆಗಳಲ್ಲಿ ಹಲ್ಲುಗಳಿಗೆ ಬದಲಾಗಿ ಮೇಲಿನ ಮತ್ತು ಕೆಳಗಿನ ದವಡೆಗಳು ಮೊನಚಾದ ಅಂಚುಗಳಿಂದ ಕೂಡಿವೆ. ಮಾಂಸಾಹಾರಿ ಕಡಲಾಮೆಗಳು ಸಾಮಾನ್ಯವಾಗಿ ತಮ್ಮ ಬಲಿಯನ್ನು ಹೋಳುಗಳನ್ನಾಗಿ ಮಾಡುವುದಕ್ಕೆ ಅನುಕೂಲ ಮಾಡುವ, ಚಾಕುವಿನಂತೆ ಹರಿತವಾದ ಅಂಚುಗಳನ್ನು ಹೊಂದಿವೆ. ಸಸ್ಯಾಹಾರಿ ಕಡಲಾಮೆಗಳು ಬಾಚಿಯಂಥ ಅಂಚುಗಳನ್ನು ಹೊಂದಿವೆ. ಇವು ಗಟ್ಟಿಯಾದ ಸಸ್ಯಗಳನ್ನೂ ಕತ್ತರಿಸಬಲ್ಲವು. ಕಡಲಾಮೆಗಳು ತಮ್ಮ ಆಹಾರವನ್ನು ನುಂಗುವುದಕ್ಕೆ ನಾಲಿಗೆಯನ್ನು ಬಳಸುತ್ತವೆ. ಆದರೆ ಅವು ಬಹುತೇಕ ಸರೀಸೃಪಗಳಂತೆ ಆಹಾರವನ್ನು ಹಿಡಿಯುವುದಕ್ಕಾಗಿ ತಮ್ಮ ನಾಲಿಗೆಯನ್ನು ಹೊರಗೆ ಚಾಚಲಾರವು.
ಚಿಪ್ಪು
[ಬದಲಾಯಿಸಿ]ಕಡಲಾಮೆಯ ಮೇಲ್ಭಾಗದ ಚಿಪ್ಪನ್ನು ಕಾರಾಪೇಸ್ ಎಂದು ಕರೆಯುತ್ತಾರೆ. ಹೊಟ್ಟೆಯನ್ನು ಆವರಿಸಿರುವ ಕೆಳ ಚಿಪ್ಪನ್ನು ಪ್ಲಾಸ್ಟ್ರಾನ್ ಎಂದು ಕರೆಯುತ್ತಾರೆ. ಕಾರಾಪೇಸ್ ಮತ್ತು ಪ್ಲಾಸ್ಚ್ರಾನ್ ಎರಡೂ ಬ್ರಿಡ್ಜಸ್ ಎಂದು ಕರೆಯಲಾಗುವ ಎಲುಬಿನ ಆಕಾರದ ಅಂಚಿನಲ್ಲಿ ಕೂಡಿಕೊಂಡಿವೆ. ಕಡಲಾಮೆಯ ಚಿಪ್ಪಿನ ಒಳ ಪದರ ಬೆನ್ನೆಲುಬಿನ ಮತ್ತು ಪಕ್ಕೆಲುಬುಗಳ ಭಾಗಗಳೂ ಸೇರಿದಂತೆ ಸುಮಾರು ೬೦ ಎಲುಬುಗಳಿಂದ ರಚಿತವಾಗಿದೆ. ಇದರರ್ಥ ಕಡಲಾಮೆಗಳು ತಮ್ಮ ಚಿಪ್ಪನ್ನು ಬಿಟ್ಟು ಈಚೆ ಚಲಿಸಲಾರವು. ಬಹುತೇಕ ಕಡಲಾಮೆಗಳಲ್ಲಿ ಚಿಪ್ಪಿನ ಹೊರ ಪದರ ಸ್ಕ್ಯೂಟ್ ಎಂದು ಕರೆಯುವ ಮೊನಚಾದ ಪೊರೆಯಿಂದ ಕೂಡಿರುತ್ತವೆ. ಇದು ಹೊರ ಚರ್ಮದ ಭಾಗವಾಗಿರುತ್ತದೆ ಅಥವಾ ಚರ್ಮವೇ ಆಗಿರುತ್ತದೆ. ಸ್ಕ್ಯೂಟ್‍ಗಳು ನಾರಿನಂಥ ಕೆರಾಟಿನ್ ಎಂದು ಕರೆಯುವ ಪ್ರೋಟೀನ್‍ನಿಂದ ಆಗಿರುವವು. ಇತರ ಸರೀಸೃಪಗಳಲ್ಲೂ ಇದೇ ಹೊರಚರ್ಮದ ಪೊರೆಯನ್ನು ರಚಿಸುತ್ತದೆ. ಈ ಸ್ಕ್ಯೂಟ್‍ಗಳು ಚಿಪ್ಪು ಎಲುಬಿನ ನಡುವೆ ಪಸರಿಸಿ ಒಂದುಮಾಡುತ್ತವೆ ಮತ್ತು ಚಿಪ್ಪಿಗೆ ಬಲವನ್ನು ತುಂಬುತ್ತವೆ. ಕೆಲವು ಕಡಲಾಮೆಗಳು ಒರಟಾದ ಸ್ಕ್ಯೂಟ್‍ಗಳನ್ನು ಹೊಂದಿರುವುದಿಲ್ಲ. ಉದಾಹರಣೆಗೆ ತೊಗಲುಬೆನ್ನಿನ ಸಮುದ್ರದ ಆಮೆ ಮತ್ತು ಮೃದು-ಚಿಪ್ಪಿನ ಆಮೆಗಳು ಇದರ ಬದಲಾಗಿ ದಪ್ಪ ತೊಗಲಿನ ಚಿಪ್ಪನ್ನು ಹೊಂದಿವೆ.
ಗಡುಸಾದ ಚಿಪ್ಪು ಇರುವುದರಿಂದ ಕಡಲಾಮೆಗಳು ಇತರ ಸರೀಸೃಪಗಳಂತೆ ತಮ್ಮ ಎದೆಯ ಗೂಡನ್ನು ಪಕ್ಕೆಲುಬುಗಳ ಮೂಲಕ ಹಿಗ್ಗಿಸಿ ಮತ್ತು ಕುಗ್ಗಿಸಿ ಉಸಿರಾಡಿಸಲಾರವು. ಬದಲಾಗಿ, ಕಡಲಾಮೆಗಳು ಎರಡು ರೀತಿಯಿಂದ ಉಸಿರಾಡುತ್ತವೆ. ಮೊದಲು, ಅವು ಬಾಯಿಯಿಂದ ಪಂಪ್ ಮಾಡುತ್ತವೆ. ಗಾಳಿಯನ್ನು ತಮ್ಮ ಬಾಯಿಯೊಳ ಎಳೆದುಕೊಳ್ಳುತ್ತವೆ, ನಂತರ ಅದನ್ನು ಗಂಟಲಿನ ತಳದಲ್ಲಿರುವ ಪದರವನ್ನು ಕಂಪಿಸಿ ಪುಪ್ಪುಸಕ್ಕೆ ತಳ್ಳುತ್ತವೆ. ಎರಡನೆಯದಾಗಿ ಚಿಪ್ಪಿನ ಹಿಂಭಾಗದ ಬಾಯನ್ನು ಮುಚ್ಚಿರುವ ಹೊಟ್ಟೆಯ ಸ್ನಾಯುಗಳನ್ನು ಸಂಕೋಚನಗೊಳಿಸುತ್ತದೆ. ಆಗ ಚಿಪ್ಪಿನ ಒಳಗಿನ ಪ್ರಮಾಣ ಹಿಗ್ಗುತ್ತದೆ. ಇದು ಗಾಳಿಯನ್ನು ಪುಪ್ಪುಸದೊಳಕ್ಕೆ ಎಳೆದುಕೊಳ್ಳುತ್ತದೆ. ಸಸ್ತನಿಗಳಲ್ಲಿ ಎದೆಯ ಭಾಗಕ್ಕೂ ಹೊಟ್ಟೆಯ ಭಾಗಕ್ಕೂ ನಡುವಿರುವ ವಿಭಾಜಕಾಂಗದ ರೀತಿಯಲ್ಲಿ ಕಾರ್ಯನಿರ್ವಹಿಸುವಂತೆ ಸ್ನಾಯುಗಳಿಗೆ ಅವಕಾಶವನ್ನು ನೀಡುತ್ತವೆ.
ಕಡಲಾಮೆಗಳು ಹೇಗೆ ಬದುಕುತ್ತವೆ ಎಂಬುದನ್ನು ಅರಿಯಲು ಚಿಪ್ಪಿನ ಆಕಾರವು ಸಹಕಾರಿಯಾಗಬಲ್ಲ ಹೊಳಹನ್ನು ನೀಡುತ್ತದೆ. ಬಹುತೇಕ ಕಡಲಾಮೆಗಳು ದೊಡ್ಡದಾದ ಗುಮ್ಮಟದ ರೀತಿಯ ಚಿಪ್ಪನ್ನು ಹೊಂದಿರುತ್ತವೆ. ಪರಭಕ್ಷಕ ಪ್ರಾಣಿಗಳು ಇದನ್ನು ತಮ್ಮ ದವಡೆಯಲ್ಲಿಟ್ಟು ಅಗಿಯುವುದಕ್ಕೆ ಇದು ಕಠಿಣವನ್ನಾಗಿಸುತ್ತದೆ. ಕೆಲವು ಅಪವಾದಗಳಲ್ಲಿ ಇದೂ ಒಂದು, ಆಫ್ರಿಕದ ಪನಾಕೇಕ್ ಟಾರ್ಟೈಸ್ ಸಪಾಟಾದ ಬಾಗಿಸಬಹುದಾದ ಚಿಪ್ಪನ್ನು ಹೊಂದಿದ್ದು, ಇದು ಅವುಗಳಿಗೆ ನದಿಯೊಳಗಿನ ಪೊಟರೆಗಳಲ್ಲಿ ಅಡಗುವುದಕ್ಕೆ ಅವಕಾಶಮಾಡಿಕೊಡುತ್ತದೆ. ಬಹುತೇಕ ಜಲವಾಸಿ ಆಮೆಗಳು ಸಪಾಟಾದ, ಸುಗಮ ಚಲನೆಗೆ ಪೂರಕವಾದ ಚಿಪ್ಪುಗಳನ್ನು ಹೊಂದಿವೆ. ಇವು ಈಜುವುದಕ್ಕೆ ಮತ್ತು ಮುಳುಗುವುದಕ್ಕೆ ಸಹಾಯ ಮಾಡುತ್ತವೆ. ಅಮೆರಿಕದ ಸ್ನ್ಯಾಪಿಂಗ್ ಟರ್ಟಲ್ಸ್ ಮತ್ತು ಮಸ್ಕ್ ಟರ್ಟಲ್ಸ್ ಚಿಕ್ಕದಾದ, ಶಿಲುಬೆಯಾಕಾರದ ಎದೆಗವಚವನ್ನು ಹೊಂದಿದ್ದು ಇದು ಕೆರೆಗಳು ಮತ್ತು ಹಳ್ಳಗಳ ತಳದಲ್ಲಿ ನಡೆಯುವಾಗ ಸಮರ್ಥವಾಗಿ ಕಾಲುಗಳ ಚಲನೆಗೆ ನೆರವಾಗುವುದು.
ಕಡಲಾಮೆಯ ಚಿಪ್ಪಿನ ಬಣ್ಣ ಬೇರೆಬೇರೆಯಾಗಿರಬಹುದು. ಚಿಪ್ಪುಗಳು ಸಾಮಾನ್ಯವಾಗಿ ಕಂದು, ಕಪ್ಪು ಇಲ್ಲವೆ ಆಲಿವ್ ಹಸಿರುಬಣ್ಣದ್ದಾಗಿರುತ್ತವೆ. ಇನ್ನು ಕೆಲವು ಪ್ರಭೇದಗಳಲ್ಲಿ ಚಿಪ್ಪುಗಳು ಕೆಂಪು, ಕಿತ್ತಳೆ, ಹಳದಿ ಅಥವಾ ಬೂದು ಗೆರೆಗಳನ್ನು ಹೊಂದಿರಬಹುದು. ಈ ಗೆರೆಗಳು ಹೆಚ್ಚಾಗಿ ಚುಕ್ಕಿಗಳು, ಗೆರೆಗಳು ಅಥವಾ ಅನಿಯಮಿತ ಹೊಪ್ಪಳೆಗಳಂತೆ ಇರುತ್ತವೆ. ಅತ್ಯಂತ ವರ್ಣರಂಜಿತ ಕಡಲಾಮೆಗಳಲ್ಲಿ ಒಂದು ಪೂರ್ವ ದೇಶದ ಬಣ್ಣ ಬಳಿದ ಆಮೆ (ಪೇಂಟೆಡ್ ಟರ್ಟಲ್). ಇದು ಹಳದಿ ಎದೆಗವಚ ಮತ್ತು ಕಪ್ಪು ಅಥವಾ ಆಲಿವ್ ಬಣ್ಣದ ಚಿಪ್ಪು, ಜೊತೆಗೆ ಅಂಚಿನುದ್ದಕ್ಕೂ ಕೆಂಪು ಗೆರೆಗಳನ್ನು ಹೊಂದಿದೆ.
ನೆಲದ ಮೇಲೆ ಇರುವ ಆಮೆಗಳು ಅತ್ಯಂತ ಭಾರವಾದ ಚಿಪ್ಪನ್ನು ಹೊಂದಿರುತ್ತವೆ. ಇದಕ್ಕೆ ವಿರುದ್ಧವಾಗಿ ಜಲವಾಸಿ ಕಡಲಾಮೆಗಳು ಹಗುರವಾದ ಚಿಪ್ಪುಗಳನ್ನು ಹೊಂದಿರುತ್ತವೆ. ಅವು ನೀರಿನಲ್ಲಿ ಮುಳುಗದಂತೆ ಮತ್ತು ಹೆಚ್ಚು ಚುರುಕಾಗಿ ವೇಗದಿಂದ ಈಜುವುದಕ್ಕೆ ನೆರವಾಗುತ್ತವೆ. ಈ ಹಗುರವಾದ ಚಿಪ್ಪುಗಳು ಚಿಪ್ಪಿನ ಎಲುಬುಗಳ ನಡುವೆ ಫಾಂಟನೆಲ್ಲೆಗಳು (ನೆತ್ತಿ ಸುಳಿ) ಎಂದು ಕರೆಯಲ್ಪಡುವ ವಿಶಾಲವಾದ ಸ್ಥಳವನ್ನು ಹೊಂದಿರುತ್ತವೆ. ತೊಗಲುಬೆನ್ನಿನ ಆಮೆಗಳು ಅತ್ಯಂತ ಹಗುರವಾಗಿರುತ್ತವೆ, ಏಕೆಂದರೆ ಅವು ಸ್ಕ್ಯೂಟ್‍ಗಳನ್ನು ಹೊಂದಿರುವುದಿಲ್ಲ ಮತ್ತು ಅನೇಕ ಫಾಂಟನೆಲ್ಲೆಗಳನ್ನು ಹೊಂದಿರುತ್ತವೆ.
ಚರ್ಮ ಮತ್ತು ಚಿಪ್ಪು ಕಳೆತ
[ಬದಲಾಯಿಸಿ]
ಮೇಲೆ ಉಲ್ಲೇಖಿಸಿದಂತೆ, ಚಿಪ್ಪಿನ ಹೊರ ಪದರ ಚರ್ಮದ ಅಂಗ; ಚಿಪ್ಪಿನ ಮೇಲಿನ ಪ್ರತಿ ಸ್ಕ್ಯೂಟ್ (ಅಥವಾ ಪ್ಲೇಟ್) ಒಂದೇ ಮಾರ್ಪಾಡಾದ ಶಲ್ಕಕ್ಕೆ ಅನುರೂಪವಾಗಿರುತ್ತದೆ. ಚರ್ಮದ ಉಳಿದ ಭಾಗ ಇತರ ಸರೀಸೃಪಗಳ ಚರ್ಮದ ರೀತಿಯಲ್ಲಿಯೇ ಅತ್ಯಂತ ಸಣ್ಣ ಶಲ್ಕಗಳೊಂದಿಗೆ ಚರ್ಮದೊಂದಿಗೆ ಸೇರಿಕೊಂಡಿರುತ್ತದೆ. ಹಾವುಗಳು ಕಳಚುವಂತೆ ಕಡಲಾಮೆಗಳು ಒಂದೇ ಸಲಕ್ಕೆ ತಮ್ಮ ಚರ್ಮವನ್ನು ಕಳಚಿಕೊಳ್ಳುವುದಿಲ್ಲ, ಆದರೆ ಸತತವಾಗಿ ಚಿಕ್ಕಚಿಕ್ಕ ತುಣುಕುಗಳ ರೀತಿಯಲ್ಲಿ ಕಳಚಿಕೊಳ್ಳುವವು. ಜಲಚಲ ತೊಟ್ಟಿಯಲ್ಲಿ (ಅಕ್ವೇರಿಯಂ) ಇಟ್ಟಾಗ ಉದುರಿದ ಚರ್ಮದ ಚಿಕ್ಕಚಿಕ್ಕ ಚೂರುಗಳು ನೀರಿನಲ್ಲಿ ಬಿದ್ದಿರುವುದನ್ನು ಕಾಣಬಹುದು. (ಬಹುತೇಕ ಇವು ಪ್ಲಾಸ್ಟಿಕ್‍ನ ಚಿಕ್ಕ ಚೂರುಗಳಂತೆ ಕಾಣುತ್ತವೆ.) ಕಡಲಾಮೆ ತನ್ನನ್ನು ತಾನು ಕಟ್ಟಿಗೆ ಅಥವಾ ಕಲ್ಲಿಗೆ ತೀಕ್ಷ್ಣವಾಗಿ ಉಜ್ಜಿಕೊಂಡಾಗ ಈ ಚಿಪ್ಪು ಚೂರಾಗಿ ಬೀಳುತ್ತದೆ. ಆಮೆಗಳೂ ತಮ್ಮ ಚರ್ಮವನ್ನು ಕಳಚಿಕೊಳ್ಳುತ್ತವೆ. ಆದರೆ ಸತ್ತ ಚರ್ಮವು ದಪ್ಪಗಿರುವ ಬುಗಟೆಯಲ್ಲಿ ಮತ್ತು ಪ್ಲೇಟ್‍ಗಳಲ್ಲಿ ಶೇಖರಣೆಗೊಳ್ಳಲು ಇವು ಅವಕಾಶ ನೀಡುತ್ತವೆ. ಇವು ಚಿಪ್ಪಿನ ಹೊರಗಿನ ಶರೀರದ ಭಾಗಕ್ಕೆ ರಕ್ಷಣೆಯನ್ನು ಒದಗಿಸುತ್ತದೆ.
ಚಿಕ್ಕದಾದ ಪದರಗಳು, ದೊಡ್ಡದರ ಮೇಲೆ ಹಳೆದಾದ ಸ್ಕ್ಯೂಟ್‍ಗಳು, ಹೊಸದಾದವು ಉಂಟುಮಾಡಿದ ವರ್ತುಲಗಳನ್ನು ಎಣಿಸಿ ಒಂದು ವರ್ಷದಲ್ಲಿ ಎಷ್ಟು ಸ್ಕ್ಯೂಟ್ ಗಳು ತಯಾರಾಗುತ್ತವೆ ಎಂಬ ಮಾಹಿತಿ ಇದ್ದವರು ಕಡಲಾಮೆಯ ವಯಸ್ಸನ್ನು ಅಂದಾಜು ಮಾಡಬಹುದು.[೬] ಈ ವಿಧಾನ ಅತ್ಯಂತ ನಿಖರವಾದದಲ್ಲ, ಭಾಗಶಃ ಸರಿಯಾದುದು, ಏಕೆಂದರೆ ಬೆಳವಣಿಗೆ ದರ ಒಂದೇ ರೀತಿ ಇರುವುದಿಲ್ಲ, ಅಲ್ಲದೆ ಕೆಲವು ಸ್ಕ್ಯೂಟ್‍ಗಳು ಅಂತಿಮವಾಗಿ ಚಿಪ್ಪಿನಿಂದ ದೂರವೇ ಬಿದ್ದುಹೋಗುತ್ತವೆ.
ಕಾಲುಗಳು
[ಬದಲಾಯಿಸಿ]ನೆಲದ ಮೇಲೆ ವಾಸಿಸುವ ಆಮೆಗಳು ಚಿಕ್ಕದಾದ ಕಟ್ಟುಮಸ್ತಾದ ಕಾಲುಗಳನ್ನು ಹೊಂದಿರುತ್ತವೆ. ನಿಧಾನ ನಡಿಗೆಗೆ ಆಮೆಗಳು ಪ್ರಸಿದ್ಧವಾಗಿವೆ. ಇದಕ್ಕೆ ಕಾರಣ ಅವುಗಳ ಭಾರ, ತೊಡಕಾಗಿರುವ ಚಿಪ್ಪು ದಾಪುಗಾಲು ಹಾಕುವುದಕ್ಕೆ ನಿಯಂತ್ರಿಸುವುದು.
ಉಭಯವಾಸಿ ಆಮೆಗಳು ಸಾಮಾನ್ಯವಾಗಿ ಭೂಚರ ಆಮೆಗಳ ರೀತಿಯಲ್ಲಿಯೇ ಕಾಲುಗಳನ್ನು ಹೊಂದಿರುತ್ತವೆ. ಆದರೆ ಇವು ಜಾಲಪಾದವನ್ನು ಹೊಂದಿರುತ್ತವೆ ಮತ್ತು ಉದ್ದವಾದ ಮೊನೆಯುಗುರುಗಳು ಇರುತ್ತವೆ. ಈ ಕಡಲಾಮೆಗಳು ನಾಲ್ಕೂ ಕಾಲುಗಳನ್ನು ಬಳಸಿ ನಾಯಿಯಂತೆ ಈಜುತ್ತವೆ. ಶರೀರದ ಎಡ ಮತ್ತು ಬಲ ಪಾದಗಳು ಒಂದಾದ ಮೇಲೆ ಒಂದರಂತೆ ತಳ್ಳುತ್ತಿರುತ್ತವೆ. ಚಿಕ್ಕ ಕಡಲಾಮೆಗಳಿಗಿಂತ ದೊಡ್ಡ ಕಡಲಾಮೆಗಳು ಈಜುವುದು ಕಡಿಮೆ. ಮತ್ತು ಅತ್ಯಂತ ದೊಡ್ಡ ಪ್ರಭೇದಗಳಾದ ಅಲ್ಲಿಗೇಟರ್ ಸ್ನ್ಯಾಪಿಂಗ್ ಟರ್ಟಲ್ ಸ್ವಲ್ಪವೇ ಈಜುತ್ತವೆ. ಅವು ನದಿ ಅಥವಾ ಸರೋವರದ ತಳದಲ್ಲಿ ನಡೆಯುತ್ತವೆ ಅಷ್ಟೇ. ಜಾಲಪಾದಗಳ ಜೊತೆಗೆ ಕಡಲಾಮೆಗಳು ಅತ್ಯಂತ ಉದ್ದವಾದ ಮೊನಚು ಪಂಜಗಳನ್ನು ಹೊಂದಿರುತ್ತವೆ. ಇವು ನದಿ ದಂಡೆಯ ಮೇಲೆ ಮತ್ತು ತೇಲುವ ದಿಮ್ಮಿಗಳ ಮೇಲೆ ತೆವಳಿ ಹತ್ತುವುದಕ್ಕೆ ನೆರವಾಗುತ್ತವೆ. ಹೀಗೆ ಮಾಡಿ ಅವು ಬಿಸಿಲಿಗೆ ಮೈಯೊಡ್ಡಿ ಸುಖ ಅನುಭವಿಸುತ್ತವೆ. ನಿರ್ದಿಷ್ಟವಾಗಿ ಗಂಡು ಕಡಲಾಮೆಗಳು ಉದ್ದವಾದ ಮೊನಚು ಪಂಜಗಳನ್ನು ಹೊಂದಿರುತ್ತವೆ. ಸಂಭೋಗದ ಸಮಯದಲ್ಲಿ ಹೆಣ್ಣಾಮೆಗಳನ್ನು ಉದ್ದೀಪನಗೊಳಿಸಲು ಇವನ್ನು ಬಳಸುವ ಹಾಗೆ ಕಾಣುತ್ತದೆ. ಬಹುತೇಕ ಕಡಲಾಮೆಗಳಿಗೆ ಜಾಲಪಾದಗಳಿದ್ದರೆ, ಕೆಲವು ಹಂದಿ ಮೂಗಿನ ಆಮೆಗಳು ನೈಜ ಹುಟ್ಟಿನಂಥ ಈಜುಗೈ ಹೊಂದಿವೆ. ಇದನ್ನು ಹುಟ್ಟಿನಂತೆ ಬಳಸುತ್ತವೆ. ಉಳಿದವಕ್ಕೆ ಹೋಲಿಸಿದರೆ ಪಂಜಗಳು ಚಿಕ್ಕದಾಗಿರುತ್ತವೆ. ಸಮುದ್ರ ಆಮೆಗಳ ರೀತಿಯಲ್ಲಿಯೇ ಈ ಪ್ರಭೇದದ ಕಡಲಾಮೆಗಳು ಈಜುತ್ತವೆ. (ಕೆಳಗೆ ನೋಡಿ)
ಸಮುದ್ರ ಆಮೆಗಳು ಬಹುತೇಕ ಸಂಪೂರ್ಣವಾಗಿ ಜಲವಾಸಿಗಳು ಮತ್ತು ಪಾದಗಳಿಗೆ ಬದಲು ಈಜುಗೈಗಳನ್ನು ಹೊಂದಿರುತ್ತವೆ. ಸಮುದ್ರ ಆಮೆಗಳು ಮುಂದಿನ ಹುಟ್ಟುಕಾಲುಗಳ ಏರು-ತಗ್ಗು ಚಲನೆಯ ಮೂಲಕ ಹಿಂದೆ ನೂಕಿ ಮುಂದೆ ಚಲಿಸಲು ನೀರಿನಲ್ಲಿ ಹಾರುತ್ತವೆ. ಹಿಂದಿನ ಕಾಲುಗಳನ್ನು ಮುನ್ನೂಕುವಿಕೆಗೆ ಬಳಸುವುದಿಲ್ಲ. ಆದರೆ, ತಿರುಗುವದಕ್ಕೆ ಚುಕ್ಕಾಣಿ ಹಲಗೆಯಂತೆ ಇವನ್ನು ಬಳಸಬಹುದು. ಸಿಹಿನೀರಿನ ಆಮೆಗಳಿಗೆ ಹೋಲಿಸಿದರೆ ಸಮುದ್ರದ ಆಮೆಗಳ ಭೂಮಿಯ ಮೇಲಿನ ಚಲನೆ ಅತ್ಯಂತ ಸೀಮಿತವಾದದ್ದು, ಸಮದ್ರದಲ್ಲಿ ಕ್ಷೋಭೆ ತಲೆದೋರುವುದು, ವಸತಿ ನೆಲೆಯಲ್ಲಿ ತೊಂದರೆ ಮತ್ತು ಮೊಟ್ಟೆ ಇರಿಸುವ ಸಂದರ್ಭ ಹೊರತುಪಡಿಸಿದರೆ ಗಂಡು ಕಡಲಾಮೆಗಳು ಯಾವತ್ತೂ ಸಮುದ್ರವನ್ನು ಬಿಡುವುದಿಲ್ಲ. ಹೆಣ್ಣಾಮೆಗಳು ಮೊಟ್ಟೆಗಳನ್ನು ಇರಿಸುವುದಕ್ಕೆ ಭೂಮಿಯ ಮೇಲ್ಭಾಗಕ್ಕೆ ಬರಲೇಬೇಕು. ಅವು ಅತ್ಯಂತ ನಿಧಾನವಾಗಿ ಮತ್ತು ಕಷ್ಟಪಟ್ಟು, ಹುಟ್ಟುಕಾಲುಗಳಿಂದ ತಮ್ಮನ್ನು ಮುಂದಕ್ಕೆ ಎಳೆದುಕೊಳ್ಳುತ್ತ ಚಲಿಸುತ್ತವೆ.
ಡರ್ಮೋಕೆಲಿಸ್ ಕೋರಿಯೇಸಿಯ
[ಬದಲಾಯಿಸಿ]ತೊಗಲಾಮೆ (ಲೆಧರಿ ಟರ್ಟಲ್) ಎಂದೂ ಕರೆಯಲಾಗುವ ಡರ್ಮೋಕೆಲಿಸ್ ಕೋರಿಯೇಸಿಯ ಕಡಲಾಮೆ ಸಿಂಹಳದ ಕಡಲತೀರ ಪ್ರದೇಶಗಳಲ್ಲಿ ಹೇರಳವಾಗಿ ಕಾಣಬರುತ್ತದೆ. ಇದು ಗಾತ್ರದಲ್ಲಿ ಬಹು ದೊಡ್ಡದು. ಸು. 9 ಮೀ ಉದ್ದ ಬೆಳೆಯುತ್ತದೆ. ಚೆನ್ನಾಗಿ ಬೆಳೆದ ಕಡಲಾಮೆ ಅರ್ಧ ಟನ್ ತೂಗುವುದುಂಟು. ಎಲ್ಲ ಆಮೆಗಳಲ್ಲಿರುವಂತೆ ಇದರಲ್ಲೂ ದೇಹವನ್ನು ಆವರಿಸಿದ ಒಂದು ಚಿಪ್ಪಿದೆ. ಚಿಪ್ಪಿನಲ್ಲಿ ಬೆನ್ನಿನ ಕಡೆ ಉಬ್ಬಿಕೊಂಡಿರುವ ಕ್ಯಾರಪೇಸ್ ಎಂಬ ಭಾಗವೂ ಹೊಟ್ಟೆ ಕಡೆ ಚಪ್ಪಟೆಯಾಗಿರುವ ಪ್ಲಾಸ್ಟ್ರಾನ್ ಎಂಬ ಭಾಗವೂ ಇವೆ. ಕ್ಯಾರಪೇಸಿನ ಮೇಲೆ ಮೃದುವಾದ ಚರ್ಮದ ಹೊದಿಕೆಯಿದೆ. ಅಲ್ಲದೆ ಅದು ಚಿಕ್ಕ ಚಿಕ್ಕ ಬಹುಭುಜಾಕೃತಿಯ ಅಸ್ಥಿಫಲಕಗಳಿಂದ ಕೂಡಿದೆ. ಇಂಥ ಫಲಕಗಳು ಇತರ ಆಮೆಗಳಲ್ಲಿ ಒಳಗಿನ ಪಕ್ಕೆಲುಬುಗಳಿಗೂ ಕಶೇರುಗಳಿಗೂ ಅಂಟಿಕೊಂಡಿರುತ್ತವೆ. ಆದರೆ ಇಲ್ಲಿ ಹಾಗಿಲ್ಲ. ಚಿಪ್ಪಿನಿಂದ ಹೊರಗೆ ಚಾಚಿಕೊಂಡಿರುವ ಎರಡು ಜೊತೆ ಕಾಲುಗಳು ದೋಣಿಯ ಹುಟ್ಟಿನಂತೆ ಮಾರ್ಪಾಟಾಗಿವೆ. ಇದರಿಂದ ಈಜಲು ಅನುಕೂಲ. ಕಾಲುಗಳ ಮೇಲೆಲ್ಲ ಹುರುಪೆಗಳ ಹೊದಿಕೆಯಿದೆ, ನಖಗಳಿಲ್ಲ. ದೇಹದ ಹಿಂತುದಿಯಲ್ಲಿ ಪುಟ್ಟ ಬಾಲವೊಂದಿದೆ.
ಪರಿಸರ ವಿಜ್ಞಾನ ಮತ್ತು ಜೀವನದ ಇತಿಹಾಸ
[ಬದಲಾಯಿಸಿ]ಅನೇಕ ಕಡಲಾಮೆಗಳು ತಮ್ಮ ಜೀವನದ ಬಹುದೊಡ್ಡ ಭಾಗವನ್ನು ನೀರಿನಲ್ಲಿಯೇ ಕಳೆದರೂ ಎಲ್ಲ ಆಮೆಗಳು, ಕಡಲಾಮೆಗಳು ಗಾಳಿಯನ್ನು ಉಸಿರಾಡುತ್ತವೆ. ಮತ್ತು ತಮ್ಮ ಪುಪ್ಪುಸವನ್ನು ತುಂಬಿಕೊಳ್ಳಲು ನಿಯಮಿತ ಅಂತರಗಳಲ್ಲಿ ನೀರಿನಿಂದ ಮೇಲೆ ಬರಲೇಬೇಕು. ಒಣ ನೆಲದ ಮೇಲೆಯೂ ಅವು ತಮ್ಮ ಹೆಚ್ಚಿನ ಜೀವನವನ್ನು ಕಳೆಯಬಹುದು. ಆಸ್ಟ್ರೇಲಿಯದ ಸಿಹಿನೀರಿನ ಆಮೆಗಳು ನೀರಿನಲ್ಲಿ ಹೇಗೆ ಉಸಿರಾಡುತ್ತವೆ ಎಂಬುದರ ಅಧ್ಯಯನ ಈಗ ನಡೆದಿದೆ. ಕೆಲವು ತಳಿಗಳು ದೊಡ್ಡ ಮಲಕುಳಿ (ಕ್ಲೋಆಕಾ) ಯಂಥ ಪೊಟರೆಯನ್ನು ಹೊಂದಿದ್ದು ಇವುಗಳ ಮೇಲೆ ಬೆರಳುಗಳಂಥ ಚಾಚು ಅಂಗಗಳಿವೆ. ಈ ಚಾಚು ಅಂಗಗಳನ್ನು ಪಾಪಿಲ್ಲೆ ಎಂದು ಕರೆಯುತ್ತಾರೆ. ಇದಕ್ಕೆ ಅತ್ಯಧಿಕ ರಕ್ತ ಪೂರೈಕೆ ಇದೆ. ಮತ್ತು ಇದು ಮಲಕುಳಿಯ ಮೇಲ್ಮೈ ಪ್ರದೇಶವನ್ನು ಹೆಚ್ಚಿಸುತ್ತದೆ. ಮೀನುಗಳು ಉಸಿರಾಡಲು ಕಿವಿರುಗಳನ್ನು ಬಳಸಿಕೊಳ್ಳುವ ರೀತಿಯಲ್ಲಿಯೇ ಈ ಪಾಪಿಲ್ಲೆಗಳನ್ನು ಬಳಸಿಕೊಂಡು ಕಡಲಾಮೆಗಳು ನೀರಿನಲ್ಲಿ ಕರಗಿರುವ ಆಮ್ಲಜನಕವನ್ನು ತೆಗೆದುಕೊಳ್ಳವವು.
ಇತರ ಸರೀಸೃಪಗಳ ರೀತಿಯಲ್ಲಿಯೇ ಕಡಲಾಮೆಗಳು ಮೊಟ್ಟೆಗಳನ್ನು ಇರಿಸುತ್ತವೆ. ಇವು ಸ್ವಲ್ಪ ಮೃದುವಾಗಿ ಮತ್ತು ಒರಟಾಗಿ ಇರುತ್ತವೆ. ಅತಿದೊಡ್ಡ ಪ್ರಭೇದದ ಮೊಟ್ಟೆಗಳು ಗೋಲಾಕಾರವಾಗಿದ್ದರೆ ಉಳಿದವುಗಳ ಮೊಟ್ಟೆಗಳು ಅಗಲಕ್ಕಿಂತ ಉದ್ದ ಹೆಚ್ಚಾಗಿರುವ ರೀತಿಯಲ್ಲಿರುತ್ತವೆ. ಅವುಗಳ ಲೋಳೆ ಬಿಳಿಯಾಗಿರುತ್ತವೆ ಮತ್ತು ಹಕ್ಕಿಗಳ ಮೊಟ್ಟೆಗಿಂತ ಭಿನ್ನವಾದ ಪ್ರೋಟೀನ್‍ನ್ನು ಹೊಂದಿರುತ್ತವೆ. ಈ ಕಾರಣಕ್ಕಾಗಿ ಅವನ್ನು ಬೇಯಿಸಿದಾಗ ಗಟ್ಟಿಯಾಗುವುದಿಲ್ಲ. ಕಡಲಾಮೆಗಳ ಮೊಟ್ಟೆಯಿಂದ ತಯಾರಿಸಿದ ಆಹಾರದಲ್ಲಿ ಮುಖ್ಯವಾಗಿ ಹಳದಿ ಲೋಳೆ ಇರುತ್ತದೆ. ಇನ್ನು ಕೆಲವು ಪ್ರಭೇದಗಳಲ್ಲಿ ಮೊಟ್ಟೆಯು ಗಂಡಾಗುವುದೋ ಹಣ್ಣಾಗುವುದೋ ಎಂಬುದನ್ನು ತಾಪಮಾನವು ನಿರ್ಧರಿಸುತ್ತದೆ. ಹೆಚ್ಚಿನ ತಾಪಮಾನ ಇದ್ದರೆ ಹೆಣ್ಣು ಮತ್ತು ಕಡಿಮೆ ತಾಪಮಾನ ಇದ್ದರೆ ಗಂಡು ಮರಿಯಾಗುವುದು. ಕೆಸರು ಅಥವಾ ಮರಳಿನಲ್ಲಿ ಕುಣಿ ತೋಡಿ ದೊಡ್ಡ ಸಂಖ್ಯೆಯಲ್ಲಿ ಮೊಟ್ಟೆಗಳನ್ನು ಇಡುತ್ತವೆ. ಬಳಿಕ ಅವುಗಳನ್ನು ಮುಚ್ಚುತ್ತವೆ ಮತ್ತು ತಮ್ಮಷ್ಟಕ್ಕೆ ತಾವೇ ಅವು ಮರಿಯಾಗುವುದಕ್ಕೆ ಬಿಟ್ಟುಬಿಡುತ್ತವೆ. ಮೊಟ್ಟೆಗಳು ಕಡಲಾಮೆಯ ಮರಿಗಳಾದಾಗ ಅವು ತೆವಳಿಕೊಂಡು ಮೇಲ್ಭಾಗಕ್ಕೆ ಬರುತ್ತವೆ ಮತ್ತು ನೀರಿನ ಕಡೆ ಚಲಿಸುತ್ತವೆ. ತಾಯಿಯು ಮರಿಗಳ ಆರೈಕೆ ಮಾಡುವ ಯಾವ ಪ್ರಭೇದವೂ ಇದುವರೆಗೆ ಪರಿಚಿತವಿಲ್ಲ.
ಸಮುದ್ರ ಆಮೆಗಳು ತಮ್ಮ ಮರಿಗಳನ್ನು ಒಣ, ಮರಳು ತೀರಗಳಲ್ಲಿ ಇರಿಸುತ್ತವೆ. ಅಪ್ರಾಪ್ತ ಸಮುದ್ರ ಆಮೆಗಳನ್ನು ಹಿರಿಯ ಆಮೆಗಳು ಪೋಷಿಸುವುದಿಲ್ಲ. ಮೊಟ್ಟೆ ಇಡುವ ವಯಸ್ಸನ್ನು ಕಡಲಾಮೆಗಳು ತಲುಪುವುದಕ್ಕೆ ಎಷ್ಟೋ ವರ್ಷಗಳನ್ನು ತೆಗೆದುಕೊಳ್ಳುತ್ತವೆ. ಮತ್ತು ಎಷ್ಟೋ ಪ್ರಕರಣಗಳಲ್ಲಿ ಮೊಟ್ಟೆ ಇಡುವುದು ವಾರ್ಷಿಕ ಕ್ರಿಯೆಯಾಗಿರದೆ ಕೆಲವು ವರ್ಷಗಳಿಗೊಮ್ಮೆ ನಡೆಯುವ ಕ್ರಿಯೆಯಾಗಿರುತ್ತದೆ.
ಸಂಶೋಧಕರು ಇತ್ತೀಚೆಗೆ ಕಂಡುಹಿಡಿದಿರುವ ಪ್ರಕಾರ ಬಹುತೇಕ ಇತರ ಪ್ರಾಣಿಗಳಂತೆ ಕಡಲಾಮೆಗಳ ಅಂಗಗಳ ಕ್ರಿಯಾತ್ಮಕತೆ ಕ್ರಮೇಣ ನಿಲ್ಲುವುದಿಲ್ಲ ಅಥವಾ ಕಾಲ ಕಳೆದಂತೆ ದಕ್ಷತೆಯನ್ನು ಕಳೆದುಕೊಳ್ಳುವುದಿಲ್ಲ. ನೂರು ವರ್ಷ ಮೀರಿದ ಕಡಲಾಮೆಯ ಯಕೃತ್ತು, ಪುಪ್ಪುಸಗಳು ಮತ್ತು ಮೂತ್ರಪಿಂಡಗಳು ಚಿಕ್ಕ ವಯಸ್ಸಿನ ಕಡಲಾಮೆಗಳಲ್ಲಿಯ ಈ ಅಂಗಗಳಿಂದ ವ್ಯತ್ಯಾಸ ಹೊಂದಿಲ್ಲ ಎಂಬುದು ಕಂಡುಬಂದಿದೆ. ತಳಿವಿಜ್ಞಾನದ ಸಂಶೋಧಕರಿಗೆ ಕಡಲಾಮೆಗಳು ದೀರ್ಘಕಾಲ ಬದುಕುವುದಕ್ಕೆ ಕಾರಣವಾಗಿರುವ ವಂಶವಾಹಿ ಧಾತುವಿನ ಬಗ್ಗೆ ಸಂಶೋಧನೆಯನ್ನು ನಡೆಸುವುದಕ್ಕೆ ಇದು ಸ್ಫೂರ್ತಿಯನ್ನು ನೀಡಿದೆ.[೭]
ವರ್ಗೀಕರಣ ವಿಧಾನ ಹಾಗೂ ವಿಕಸನ
[ಬದಲಾಯಿಸಿ]
ಮೊದಲ ಆದಿಮ-ಆಮೆಗಳು ಸುಮಾರು ೨೨೦ ದಶಲಕ್ಷ ವರ್ಷಗಳ ಹಿಂದೆ ಮೆಸೋಜೋಯಿಕ್ ಶಕೆಯಲ್ಲಿ ಟ್ರಿಯಾಸ್ಸಿಕ್ ಅವಧಿಯ ಆರಂಭದಲ್ಲಿ ಅಸ್ತಿತ್ವದಲ್ಲಿದ್ದವು ಎಂದು ನಂಬಲಾಗಿದೆ. ಮತ್ತು ಅವುಗಳ ಚಿಪ್ಪು ಗಮನಾರ್ಹ ರೀತಿಯಲ್ಲಿ ಸ್ಥಿರವಾದ ಶರೀರ ಯೋಜನೆಯನ್ನು ಉಳಿಸಿಕೊಂಡಿವೆ, ಅವುಗಳ ಬೆನ್ನೆಲುಬನ್ನೇ ವಿಸ್ತರಿಸಿಕೊಂಡು ಆ ರೂಪ ತಳೆದಿರಬಹುದು, ಅವುಗಳ ವಿಶಾಲವಾದ ಪಕ್ಕೆಲಬುಗಳು ವಿಸ್ತರಿಸಿಕೊಂಡು ಇಡಿಯಾದ ಚಿಪ್ಪನ್ನು ರೂಪಿಸಿರಬಹುದು, ಇದು ಅದರ ವಿಕಸನದ ಪ್ರತಿ ಹಂತದಲ್ಲೂ ರಕ್ಷಣೆಯನ್ನು ನೀಡಿದೆ. ಚಿಪ್ಪಿನ ಎಲುಬಿನ ಭಾಗಗಳು ಪೂರ್ಣಗೊಳ್ಳದೆ ಇದ್ದಾಗಲೂ ಈ ರಕ್ಷಣೆ ದೊರೆತಿದೆ. ಸಿಹಿನೀರಿನ ಒಡೋಂಟೋಕೆಲಿಸ್ ಸೆಮಿಟೆಸ್ಟಾಸೀಯ ಅಥವಾ ಹಲ್ಲಿರುವ ಅರೆ ಚಿಪ್ಪಿನ ಕಡಲಾಮೆಯ ಪಳೆಯುಳಿಕೆಗಳು ಇದನ್ನು ಸಮರ್ಥಿಸಿವೆ. ಟ್ರಿಯಾಸಿಕ್‍ನ ಕೊನೆಯ ಹಂತದಲ್ಲಿ ಇವು ನೈಋತ್ಯ ಚೀನದ ಗ್ವಾಂಗ್ಲಿಂಗ್ ಬಳಿ ಕಂಡುಬಂದಿವೆ. ಒಡೋಂಟೋಕೆಲಿಸ್ ಒಂದು ಸಂಪೂರ್ಣ ಎದೆಗವಚ ಮತ್ತು ಅಪೂರ್ಣ ಬೆನ್ನು ಚಿಪ್ಪನ್ನು ಹೊಂದಿರುವುದನ್ನು ತೋರಿಸುತ್ತದೆ. ಕಡಲಾಮೆಯ ಆದಿ ಸ್ಥಿತಿಯ ಬೆಳವಣಿಗೆಯ ರೀತಿಯಲ್ಲೇ ಇದು ಇದೆ.[೮] ಈ ಶೋಧಕ್ಕೆ ಮೊದಲು, ನಮಗೆ ಗೊತ್ತಿದ್ದ ಕಡಲಾಮೆಯ ಪಳೆಯುಳಿಕೆ ನೆಲದ ಮೇಲಿನದ್ದು ಮತ್ತು ಇದು ಪರಿಪೂರ್ಣ ಚಿಪ್ಪನ್ನು ಹೊಂದಿದೆ. ಇದು ದೇಹರಚನೆಯ ಈ ಗಮನಾರ್ಹ ವಿಕಸನದ ಕುರಿತು ಯಾವುದೇ ಸುಳುಹುಗಳನ್ನು ನೀಡುವುದಿಲ್ಲ. ಜುರಾಸಿಕ್ ನಂತರದ ಅವಧಿಯಲ್ಲಿ ಕಡಲಾಮೆಗಳು ಎಲ್ಲಕಡೆ ಕಂಡುಬಂದವು ಮತ್ತು ಅವುಗಳ ಪಳೆಯುಳಿಕೆ ಇತಿಹಾಸವನ್ನು ಅರಿಯುವುದು ಹೆಚ್ಚು ಸುಲಭವಾಯಿತು.
ಅವುಗಳ ನಿಖರವಾದ ವಂಶಪರಂಪರೆಯ ವಿವರ ವಿವಾದಾತ್ಮಕವಾಗಿದೆ. ಇವು ಪುರಾತನ ವಿಕಾಸ ಹಂತದ ಅನಾಪ್ಸಿಡಾದ ಏಕೈಕ ಅಳಿದುಳಿದಿರುವ ಶಾಖೆ ಎಂದು ನಂಬಲಾಗಿದೆ. ಈ ಗುಂಪಿನಲ್ಲಿ ಪ್ರೊಕೊಲೊಫೋನಿಡ್ಸ್, ಮಿಲ್ಲೆರೆಟ್ಟಿಡ್ಸ್, ಪ್ರೊಟೊರೊಥಿರಿಡ್ಸ್ ಮತ್ತು ಪರೀಯಸೌರ್ಸ್ ಸೇರಿವೆ. ಎಲ್ಲ ಅನಾಪ್ಸಿಡಾದ ಅಸ್ಥಿಪಂಜರಗಳ ಕಪೋಲದ ಮೂಳೆಗಳು ತೆರೆದುಕೊಳ್ಳುವುದಿಲ್ಲ. ಆದರೆ ಇತರ ಎಲ್ಲ ಮೊಟ್ಟೆ ಇಡುವ ಪ್ರಾಣಿಗಳ ಕಪೋಲದ ಮೂಳೆಗಳು ತೆರೆದುಕೊಳ್ಳುತ್ತವೆ (ಸಸ್ತನಿಗಳಲ್ಲಿ ರಂಧ್ರವು ಕೆನ್ನೆ ಮೂಳೆಯು ಕಮಾನು ಆಗಿದ್ದರೂ) ಪರ್ಮಿಯನ್ ಅವಧಿಯ ಕೊನೆಯಲ್ಲಿ ಮಿಲ್ಲೆರೆಟ್ಟಿಡ್ಸ್, ಪ್ರೊಟೊರೊಥಿರಿಡ್ಸ್ ಮತ್ತು ಪರಾಯಸೌರ್ಸ್ ಹಾಗೂ ಟ್ರಿಯಾಸಿಕ್ ಕಾಲದಲ್ಲಿ ಪ್ರೊಕೊಲೋಫೊನೈಡ್ಸ್ ಕಣ್ಮರೆಯಾದವು.[೯]
ಅನಾಪ್ಸಿಡ್‍ನಂಥ ಕಡಲಾಮೆಗಳ ಅಸ್ಥಿಪಂಜರ ವಂಶಾನುಕ್ರಮದಿಂದ ಬಂದಿರುವುದಕ್ಕಿಂತ ಹೆಚ್ಚಾಗಿ ಹಿಮ್ಮರಳುವಿಕೆಯಿಂದಾಗಿ ದೊರೆತಿರುವುದು ಎಂದು ಇತ್ತೀಚೆಗೆ ಸೂಚಿಸಲಾಗಿದೆ. ಇದೇ ಆಲೋಚನೆಯಲ್ಲಿ ತೀರ ಇತ್ತೀಚೆಗೆ ಆಕೃತಿ ವಿಜ್ಞಾನದ ಜಾತಿವಿಕಾಸದ ಅಧ್ಯಯನಗಳು ಕಡಲಾಮೆಗಳನ್ನು ದೃಢವಾಗಿ ಡಿಯಾಪ್ಸಿಡ್‍ಗಳಲ್ಲಿ ಇರಿಸಿದೆ. ಇದು ಆರ್ಕೋಸೌರಿಯಾಕ್ಕಿಂತ ಸ್ಕ್ವಾಮೇಟಾಕ್ಕೆ ಇನ್ನೂ ಸ್ವಲ್ಪ ಹತ್ತಿರ.[೧೦] ಎಲ್ಲ ಜೀವಾಣು ವಿಜ್ಞಾನ ಅಧ್ಯಯನಗಳು ಕಡಲಾಮೆಗಳನ್ನು ಡಿಯಾಪ್ಸಿಡ್‍ಗಳಲ್ಲಿ ಸೇರಿಸುವುದನ್ನು ಬಲವಾಗಿ ಸಮರ್ಥಿಸಿವೆ. ಆದರೂ ಕೆಲವರು ಕಡಲಾಮೆಗಳನ್ನು ಸ್ಕ್ವಾಮೇಟಾಕ್ಕಿಂತ ಆರ್ಚೋಸೌರಿಯಾದ ಹತ್ತಿರ ಇರಿಸುತ್ತಾರೆ.[೧೧] ವಂಶವಾಹಿ ತಜ್ಞರ ಹಿಂದಿನ ಅಭಿಪ್ರಾಯಗಳ ಮರು ವಿಶ್ಲೇಷಣೆಗಳು ಹೇಳುವುದೇನೆಂದರೆ, ಕಡಲಾಮೆಗಳನ್ನು ಅನಾಪ್ಸಿಡ್‍ಗಳ ವರ್ಗದಲ್ಲಿ ಸೇರಿಸಿದ್ದು ಏಕೆಂದರೆ ಈ ವರ್ಗೀಕರಣವನ್ನೇ ಅವರು ಊಹಿಸಿಕೊಂಡದ್ದು. (ಅವರಲ್ಲಿ ಬಹಳ ಜನರು ಅನಾಪ್ಸಿಡ್ ಕಡಲಾಮೆಗಳು ಯಾವ ರೀತಿಯವು ಎಂದು ಅಧ್ಯಯನ ಮಾಡುತ್ತಿದ್ದರು) ಮತ್ತು ಪಳೆಯುಳಿಕೆಗಳ ಮಾದರಿಯನ್ನು ನೋಡಲಿಲ್ಲ ಮತ್ತು ಕ್ಲಾಡೋಗ್ರಾಮ್ ನಿರ್ಮಾಣಕ್ಕೆ ವಿಸ್ತೃತವಾದ ವರ್ಗವೇ ಸ್ಥೂಲವಾಗಿ ಸಾಕು ಎನಿಸಿದ್ದು. ಟೆಸ್ಟುಡಿನ್‍ಗಳು ಇತರ ಡಿಯಾಪ್ಸಿಡ್‍ಗಳಿಂದ ೨೦೦ರಿಂದ ೨೭೯ ದಶಲಕ್ಷ ವರ್ಷಗಳ ಹಿಂದೆ ಅವತರಿಸಿರಬೇಕು ಎಂದು ಸೂಚಿಸಲಾಗಿದ್ದರೂ ಈ ಚರ್ಚೆಯು ಇನ್ನೂ ಇತ್ಯರ್ಥವಾಗಿಲ್ಲ.[೧೨][೧೩][೧೪]
ನಮಗೆ ಗೊತ್ತಿರುವ ಅತಿ ಹಳೆಯ ಸಂಪೂರ್ಣ ಚಿಪ್ಪಿರುವ ಕಡಲಾಮೆ ಟ್ರಿಯಾಸಿಕ್ ಕೊನೆಯ ಹಂತದ ಪ್ರೊಗಾನೋಕೆಲಿಸ್. ಈ ಕುಲದ ಪ್ರಭೇದವು ಈಗಾಗಲೆ ಕೆಲವು ಮುಂದುವರಿದ ಕಡಲಾಮೆಯ ವಿಶೇಷ ಲಕ್ಷಣಗಳನ್ನು ಹೊಂದಿದೆ. ಮತ್ತು ಇವು ಬಹುಶಃ ಕಡಲಾಮೆಗಳ ಅನೇಕ ದಶಲಕ್ಷ ವರ್ಷಗಳ ವಿಕಸನ ಪ್ರಕ್ರಿಯೆಯಿಂದಾದ್ದು ಮತ್ತು ಅದರ ವಂಶಪರಂಪರೆಯ ಪ್ರಭೇದದಿಂದ ಬಂದದ್ದು. ತನ್ನ ಚಿಪ್ಪಿನೊಳಗೆ ತಲೆಯನ್ನು ಎಳೆದುಕೊಳ್ಳುವ ಸಾಮರ್ಥ್ಯ ಇದಕ್ಕೆ ಇರಲಿಲ್ಲ. (ಮತ್ತು ಇದು ಉದ್ದವಾದ ಕುತ್ತಿಗೆಯನ್ನು ಹೊಂದಿತ್ತು.) ಮತ್ತು ಉದ್ದವಾದ ಮೊನಚಾದ ಬಾಲವನ್ನು ಗುಂಡನೆಯ ಗದೆ ರೂಪದಲ್ಲಿ ಹೊಂದಿತ್ತು. ಇದು ಇದೇ ರೀತಿಯ ಗೂಡನ್ನು ಹೊಂದಿರುವ ಅಂಕಿಲೋಸೌರ್‌ಗಳ ಜೊತೆ ವಂಶಪರಂಪರೆಯ ಸಂಬಂಧವನ್ನು ಸೂಚಿಸುತ್ತದೆ. (ಅವು ಸಮಾನಾಂತರವಾಗಿ ವಿಕಾಸ ಹೊಂದಿದ್ದರೂ)
ಕಡಲಾಮೆಗಳನ್ನು ಮೂರು ಉಪಗಣಗಳಲ್ಲಿ ವಿಭಾಗಿಸಿದ್ದಾರೆ. ಇವುಗಳಲ್ಲಿ ಒಂದು ಪಾರಾಕ್ರಿಪ್ಟೋಡಿರಾ ಅಳಿದು ಹೋಗಿದೆ. ಈಗಲೂ ಉಳಿದಿರುವ ಎರಡು ಉಪವರ್ಗಗಳು ಕ್ರಿಪ್ಟೋಡಿರಾ ಮತ್ತು ಪ್ಲ್ಯುರೋಡಿರಾ. ಕ್ರಿಪ್ಟೋಡಿರಾ ಈ ಎರಡು ಗುಂಪುಗಳಲ್ಲಿ ದೊಡ್ಡದು ಮತ್ತು ಎಲ್ಲ ಸಮುದ್ರ ಆಮೆಗಳನ್ನು, ಭೂವಾಸಿ ಆಮೆಗಳನ್ನು ಮತ್ತು ಅನೇಕ ಸಿಹಿನೀರಿನ ಆಮೆಗಳನ್ನು ಒಳಗೊಂಡಿದೆ. ಪ್ಲ್ಯುರೋಡಿರಾವನ್ನು ಕೆಲವೊಮ್ಮೆ ಅಡ್ಡಕುತ್ತಿಗೆಯ ಆಮೆ ಎಂದು ತಿಳಿಯಲಾಗಿತ್ತು. ಅವು ತಮ್ಮ ಚಿಪ್ಪಿನೊಳಗೆ ಕತ್ತನ್ನು ಎಳೆದುಕೊಳ್ಳುವ ರೀತಿಯನ್ನು ನೋಡಿ ಹೀಗೆ ತಿಳಿಯಲಾಗಿತ್ತು. ಈ ಚಿಕ್ಕ ಗುಂಪು ಮೂಲತಃ ವಿವಿಧ ಸಿಹಿ ನೀರಿನ ಆಮೆಗಳನ್ನು ಹೊಂದಿದೆ.
ಮೂಲದ ಅಥವಾ ಅನಿಶ್ಚಿತ ಜಾತಿವಿಕಾಸ ಸ್ಥಾನದೊಂದಿಗೆ ಆಮೆ ಕುಲಗಳು
[ಬದಲಾಯಿಸಿ]- ಕುಲ †ಅಸ್ಟ್ರಾಲೋಕೆಲಿಸ್ (ಕೆಲೋನಿಯಾ ಇನ್ಸರ್ಟೆ ಸೆಡಿಸ್ )
- ಕುಲ †ಮುರ್ಹಡ್ತಿಯಾ (ಕೆಲೋನಿಯಾ ಇನ್ಸರ್ಟೆ ಸೆಡಿಸ್ )
- ಕುಲ †ಪಾಲಿಯೋಕೆರ್ಸಿಸ್ (ಕೆಲೋನಿಯಾ ಇನ್ಸರ್ಟೆ ಸೆಡಿಸ್ )
- ಕುಲ †ಚಿನ್ಲೆಕೆಲಿಸ್ (ಪ್ರೋಗಾನೋಕೆಲಿಡಿಯಾ ಅಥವಾ ತಳದ ಟೆಸ್ಟುಡಿನ್ಸ್)
- ಕುಲ †ಚೆಲಿಕಾರಾಪುಕಸ್ ( ಟೆಸ್ಟುಡಿನ್ಸ್ ಇನ್ಸರ್ಟೆ ಸೆಡಿಸ್ )
- ಕುಲ †ಚಿತ್ರಾಸೆಫಲಸ್ (ಟೆಸ್ಟುಡಿನ್ಸ್ ಇನ್ಸರ್ಟೆ ಸೆಡಿಸ್ )
- ಕುಲ †ನ್ಯುಸ್ಟಿಸೆಮಿಸ್ (ಟೆಸ್ಟುಡಿನ್ಸ್ ಇನ್ಸರ್ಟೆ ಸೆಡಿಸ್ )
- ಕುಲ †ಸ್ಕುಟೆಮಿಸ್ (ಟೆಸ್ಟುಡಿನ್ಸ್ ಇನ್ಸರ್ಟೆ ಸೆಡಿಸ್ )
ಉಪಗಣ †ಪ್ರೋಗನೋಕೆಲಿಡಿಯ
[ಬದಲಾಯಿಸಿ]- ಕುಲ †ಒಡಾಂಟೋಕೆಲಿಸ್ (ಪ್ರಾಯೋಗಿಕವಾಗಿ ಇಲ್ಲಿ ಇರಿಸಲಾಗಿದೆ)
- ಕುಲ †ಪ್ರೋಗನೋಕೆಲಿಸ್
ಉಪಗಣ ಕ್ರಿಪ್ಟೋಡಿರಾ
[ಬದಲಾಯಿಸಿ]
ತಳದ ಕುಲಗಳು
- ಕುಲ †ಕಯೆನ್ಟಾಕೆಲಿಸ್
- ಕುಲ †ಇಂಡೋಕೆಲಿಸ್
ನಿಮ್ನಗಣ †ಪ್ಯಾರಾಕ್ರಿಪ್ಟೋಡಿರಾ
- ಮೂಲ ಮತ್ತು ಇನ್ಸರ್ಟೆ ಸೆಡಿಸ್
- ಕುಟುಂಬ †ಕಲ್ಲೋಕಿಬೋಟಿಡೆ
- ಕುಟುಂಬ †ಮೊಂಗಲೋಚೆಲಿಂಡೆ
- ಕುಟುಂಬ †ಪ್ಲ್ಯುರೋಸ್ಟೆಮಿಡೆ
- ಕುಟುಂಬ †ಸೋಲೆಮಿಡಿಡೆ
- ಮೇಲಿನಕುಟುಂಬ †ಬೆನೋಯಿಡೆ
- ಕುಟುಂಬ †ಬೆನೋಯಿಡೆ
- ಕುಟುಂಬ †ಮ್ಯಾಕ್ರೋಬೆಯೆನಿಡೆ
- ಕುಟುಂಬ †ನ್ಯೂರಾಂಕಿಲಿಡೆ
ನಿಮ್ನ ಗಣ ಯುಕ್ರಿಪ್ಟೋಡಿರಾ
- ತಳದ ಮತ್ತು ಇನ್ಸರ್ಟೆ ಸೆಡಿಸ್
- †"ಸಿನೆಮಿಸ್" ವೆರಿಹೋಯೆನ್ಸಿಸ್
- ಕುಲ †ಚುಬುಟೆಮಿಸ್ (ಮಿಯೋಲಾನಿಡೆ?)
- ಕುಲ †ಹಂಗಿಯೇಮಿಸ್ (ಮೆಕ್ರೋಬೆನಿಡೆ?)
- ಕುಲ †ಜುಡಿತೆಮಿಸ್
- ಕುಲ †ಒಸ್ಟಿಯೋಪಿಗಿಸ್
- ಕುಲ †ಪ್ಲಾನೆಟೋಕೆಲಿಸ್
- ಕುಟುಂಬ ಚೆಲಿಡ್ರಿಡೆ (ಕಚ್ಚುವ ಆಮೆಗಳು)
- ಕುಟುಂಬ †ಯುರಿಸ್ಟೆಮಿಡೆ
- ಕುಟುಂಬ †ಮ್ಯಾಕ್ರೋಬೆನಿಡೆ
- ಕುಟುಂಬ †ಮಿಯೋಲನಿಡೆ (ಕೊಂಬಿರುವ ಆಮೆಗಳು)
- ಕುಟುಂಬ †ಪ್ಲೆಸಿಯೋಕೆಲಿಡೆ
- ಕುಟುಂಬ †ಸಿನೆಮಿಡಿಡೆ
- ಕುಟುಂಬ †ಷಿಂಗ್‍ಜಿಯಾಂಗ್‍ಕೆಲಿಡೆ
- ಉನ್ನತ ಕುಟುಂಬ ಚೆಲೋನಿಯೋಡೆ (ಸಮುದ್ರ ಆಮೆಗಳು)
- ಕುಟುಂಬ †ಪ್ರೊಟೊಸ್ಟೆಗಿಡೆ
- ಕುಟುಂಬ †ಥಲಾಸ್ಸೆಮಿಡೆ
- ಕುಟುಂಬ †ಟೋಕ್ಷೋಚೆಲಿಡೆ
ಪಶ್ಚಿಮದ ಹರ್ಮನ್ಸ್ ಆಮೆ (ಟೆಸ್ಟುಡೋ ಹರ್ಮನ್ನಿ ಹರ್ಮನ್ನಿ) ಒಂದು ಕ್ರಿಪ್ಟೋಡೈರ್. ಕ್ರಿಪ್ಟೋಡೈರ್‌ಗಳು ತಮ್ಮ ತಲೆಯನ್ನು ಒಳಗಡೆ ಅಡಗಿಸಿಕೊಳ್ಳುತ್ತವೆ. - ಕುಟುಂಬ ಚೆಲೋನಿಡೆ (ಹಸಿರು ಸಮುದ್ರ ಆಮೆಗಳು ಮತ್ತು ಸಂಬಂಧಿಗಳು)
- ಕುಟುಂಬ ಡೆರ್ಮೋಚೆಲಿಡೆ (ತೊಗಲುಬೆನ್ನಿನ ಆಮೆಗಳು)
- ಉನ್ನತಕುಟುಂಬ ಟೆಸ್ಟುಡಿನೊಯ್ಡೆ
- ಕುಟುಂಬ †ಹೈಚೆಮಿಡಿಡೆ
- ಕುಟುಂಬ †ಲಿಂಧೋಲ್ಮೆಮಿಡಿಡೆ
- ಕುಟುಂಬ †ಸಿನೋಚೆಲಿಡೆ
- ಕುಟುಂಬ ಪ್ಲಾಸ್ಟಿಟೆಮಿಡೆ (ದೊಡ್ಡ-ತಲೆಯ ಆಮೆ)
- ಕುಟುಂಬ ಎಮಿಡಿಡೆ (ಹೊಂಡ, ಪೆಟ್ಟಿಗೆ ಮತ್ತು ನೀರಿನ ಆಮೆಗಳು)
- ಕುಟುಂಬ ಜಿಯೋಮಿಡಿಡೆ (ಏಶಿಯದ ನೀರಿನ ಆಮೆಗಳು, ಏಶಿಯದ ಎಲೆ ಆಮೆಗಳು, ಏಶಿಯದ ಪೆಟ್ಟಿಗೆ ಆಮೆಗಳು ಮತ್ತು ಚಾವಣಿ ಆಮೆಗಳು)
- ಕುಟುಂಬ ಟೆಸ್ಟುಡಿನಿಡೆ (ನಿಜ ಆಮೆಗಳು)
- ಉನ್ನತ ಕುಟುಂಬ ಟ್ರಿಯೋನಿಚೋಡಿಯೆ
- ಕುಟುಂಬ †ಅಡೋಸಿಡೆ
- ಕುಟುಂಬ ಕೆರೆಟ್ಟೋಕೆಲಿಡೆ (ಹಂದಿ ಮೂಗಿನ ಆಮೆಗಳು)
- ಕುಟುಂಬ ಡರ್ಮೆಟೆಮಿಡಿಡೆ (ನದಿ ಆಮೆಗಳು)
- ಕುಟುಂಬ ಕಿನೋಸ್ಟೆಮಿಡೆ (ಕೆಸರಿನ ಆಮೆಗಳು)
- ಕುಟುಂಬ ಟ್ರಿಯೋನಿಚಿಡೆ (ಮೃದುಚಿಪ್ಪಿನ ಆಮೆಗಳು)
ಉಪಗಣ ಪ್ಲ್ಯುರೋಡಿರಾ
[ಬದಲಾಯಿಸಿ]- ತಳದ ಮತ್ತು ಇನ್ಸರ್ಟೆ ಸೆಡಿಸ್
- ಕುಟುಂಬ †ಅರಿಪೆಮಿಡಿಡೆ
- ಕುಟುಂಬ †ಪ್ರೊಟೆರೋಚೆರ್ಸಿಡೆ
- ಕುಟುಂಬ ಚೆಲಿಡೆ (ಆಸ್ಟ್ರೋ-ಅಮೆರಿಕನ್ ಸೈಡ್ ನೆಕ್ ಟರ್ಟಲ್)
- ಉನ್ನತ ಕುಟುಂಬ ಪೆಲೋಮೆಡುಸೋಡಿಯಾ
- ಕುಟುಂಬ †ಬೋಥರ್ಮಿಡಿಡೆ
- ಕುಟುಂಬ ಪೆಲೋಮೆಡುಸಿಡೆ (ಆಫ್ರಿಕನ್ ಸೈಡ್ ನೆಕ್ ಟರ್ಟಲ್)
- ಕುಟುಂಬ ಪೋಡೋಕ್ನೆಮಿಡಿಡೆ (ಮಡಗಾಸ್ಕನ್ ಬಿಗ್-ಹೆಡೆಡ್ ಮತ್ತು ಅಮೆರಿಕನ್ ಸೈಡ್ ನೆಕ್ ರಿವರ್ ಟರ್ಟಲ್‍ಗಳು)
ಕಡಲಾಮೆ, ಆಮೆ ಅಥವಾ ಟೆರಾಪಿನ್
[ಬದಲಾಯಿಸಿ]ಕ್ರಮವಾಗಿ ಟೆಸ್ಟೋಡೈನ್‌ಗಳ ಎಲ್ಲಾ ಸದಸ್ಯರನ್ನು ವರ್ಣಿಸಲು ಕಡಲಾಮೆ ಅನ್ನೋ ಶಬ್ದವನ್ನು ವ್ಯಾಪಕವಾಗಿ ಉಪಯೋಗಿಸಿದರೂ, ನಿರ್ದಿಷ್ಟ ಸದಸ್ಯರನ್ನು ಟೆರಾಪಿನ್ಗಳು, ಆಮೆಗಳು ಅಥವಾ ಸಮುದ್ರದ ದೊಡ್ಡ ಆಮೆಗಳು ಎಂಬುದಾಗಿ ವರ್ಣಿಸುವುದನ್ನು ಸಾಮಾನ್ಯವಾಗಿ ನೋಡುತ್ತೇವೆ. ಸರಿಯಾದ ರೀತಿಯಲ್ಲಿ ಹೇಗೆ ಈ ಪರ್ಯಾಯ ಹೆಸರುಗಳು ಉಪಯೋಗಿಸಲ್ಪಡುತ್ತವೆ, ಎಂಬುದು ಯಾವ ಬಗೆಯ ಆಂಗ್ಲ ಭಾಷೆ ಉಪಯೋಗಿಸಿದೆ ಅನ್ನುವುದರ ಮೇಲೆ ಆಧಾರಿತವಾಗಿರುತ್ತದೆ.
- ಸಾಮಾನ್ಯವಾಗಿ ಬ್ರಿಟಿಷ್ ಇಂಗ್ಲಿಷ್ನಲ್ಲಿ ಈ ತರಹದ ಸರೀಸೃಪಗಳನ್ನು ಅವು ಸಾಗರದಲ್ಲಿ ವಾಸಿಸಿದರೆ ಕಡಲಾಮೆಗಳೆಂದು; ಸಿಹಿ ನೀರಿನಲ್ಲಿ ಅಥವಾ ಉಪ್ಪು ನೀರಿನಲ್ಲಿ ವಾಸಿಸಿದರೆ ಟೆರಾಪಿನ್ಸ್‌ಗಳೆಂದು; ಅಥವಾ ಅವು ನೆಲದ ಮೇಲೆ ವಾಸಿಸಿದರೆ ಆಮೆಗಳೆಂದು ವರ್ಣಿಸುತ್ತದೆ. ಆದಾಗ್ಯೂ, ಅಮೆರಿಕನ್ ಅಥವಾ ಆಸ್ಟ್ರೇಲಿಯನ್ನರು ಸಾಮಾನ್ಯವಾಗಿ ಫ್ಲೈ ರಿವರ್ ಟರ್ಟಲ್ ಎಂದು ಕರೆಯುವುದು ಇದಕ್ಕೆ ಅಪವಾದವಾಗಿದೆ.
- ಅಮೆರಿಕದ ಇಂಗ್ಲಿಷ್ನಲ್ಲಿ ಎಲ್ಲ ಜಾತಿಗಳಿಗೂ ಸಾಮಾನ್ಯ ಪದವಾಗಿ ಕಡಲಾಮೆ (turtle) ಎಂದು ಬಳಸಲಾಗುತ್ತದೆ. ಬಹುತೇಕ ನೆಲದ ಮೇಲೆ ವಾಸಿಸುವ ಜಾತಿಗಳಿಗೆ "ಟಾರ್ಟೈಸ್" (ಆಮೆ) ಎಂದು ಕರೆಯುತ್ತಾರೆ. ಇದರಲ್ಲಿ ಟೆಸ್ಟುಡಿನಿಡೆ ಮತ್ತು ಬಾಕ್ಸ್ ಟಾರ್ಟೈಸ್‍ಗಳು ಸೇರಿವೆ. ಸಾಗರದಲ್ಲಿರುವ ಪ್ರಭೇದಕ್ಕೆ ಸಾಮಾನ್ಯವಾಗಿ ಸಮುದ್ರ ಆಮೆ (ಸೀ ಟರ್ಟಲ್ಸ್) ಎಂದು ಕರೆಯುತ್ತಾರೆ. ಟೆರಾಪಿನ್ ಅನ್ನುವ ಹೆಸರು ಕೊಳಚೆ ನೀರಿನ ಡೈಮಂಡ್‌ಬ್ಯಾಕ್ ಟೆರಾಪಿನ್, ಮಲಾಕ್ಲಿಮಿಸ್ ಟೆರಾಪಿನ್‍ಗಳಿಗೆ ಮಾತ್ರ ಮೀಸಲಾಗಿದೆ; ಈ ಪ್ರಾಣಿಗೆ ಮಲಾಕ್ಲೆಮಿಸ್ ಟೆರಾಪಿನ್ ಅನ್ನುವ ಪದವನ್ನು ಅಲ್ಗೊನ್ಕಿಯನ್ ಅನ್ನುವ ಪದದಿಂದ ಪಡೆಯಲಾಗಿದೆ.[೧೫]
- ಆಸ್ಟ್ರೇಲಿಯಾದ ಇಂಗ್ಲಿಷ್ನಲ್ಲಿ ಕಡಲಿನ ಮತ್ತು ಸಿಹಿನೀರಿನ ಉಭಯ ತಳಿಗಳಿಗೆ ಕಡಲಾಮೆ (ಟರ್ಟಲ್) ಎಂಬ ಹೆಸರಿದ್ದು, ಆದರೆ ಭೂಮಿಯ ಮೇಲೆ ಇರುವ ಜಾತಿಗೆ ಆಮೆ (ಟರ್ಟೈಸ್) ಎಂದು ಹೇಳುತ್ತಾರೆ.
ಈ ಪ್ರಾಣಿಗಳ ಜೊತೆಯಲ್ಲಿ ಕೆಲಸ ಮಾಡುವಂತಹ ಪಶು ವೈದ್ಯರು, ವಿಜ್ಞಾನಿಗಳು, ಪಾಲನೆದಾರರ ನಡುವಿನ ಗೊಂದಲವನ್ನು ದೂರವಿರಿಸಲು, ಕೆಲೋನಿಯಾ ಸಂತತಿಯ ಯಾವುದೇ ಸದಸ್ಯರನ್ನು ಗುರುತಿಸಲು ಕೆಲೋನಿಯನ್ ಅನ್ನುವ ಪದ ಜನಪ್ರಿಯವಾಗಿದೆ. ಇದರಲ್ಲಿ ಕಡಲಾಮೆಗಳು, ಆಮೆಗಳು, ಟೆರಾಪಿನ್ಗಳು ಇನ್ನೂ ಇರುವ ಜಾತಿಗಳು, ನಶಿಸಿಹೋಗಿರುವ ತಳಿಗಳು ಹಾಗೂ ಅವುಗಳ ಹಿಂದಿನ ಪೀಳಿಗೆಗಳನ್ನು ಒಳಗೊಂಡಿರುತ್ತವೆ. ಇದು ಪ್ರಾಚೀನ ελώνη, ಕೆಲೊನೆ; ಆಧುನಿಕ ಗ್ರೀಕ್ ಪದ χελώνα, ಕೆಲೊನಾ; ಆಧರಿಸಿದ್ದು ಇದರ ಅರ್ಥ ಟರ್ಟಲ್/ಟಾರ್ಟೈಸ್.
ವಿತರಣೆ
[ಬದಲಾಯಿಸಿ]ಜಗತ್ತಿನಾದ್ಯಂತ ಕಡಲಾಮೆಗಳ ಏಳು ಜಾತಿಗಳಿವೆ ಇವುಗಳಲ್ಲಿ ಐದನ್ನು ಯುರೋಪಿನಲ್ಲಿ ದಾಖಲಿಸಲಾಗಿದೆ.[೧೬]
ಸಾಕು ಪ್ರಾಣಿಯಾಗಿ
[ಬದಲಾಯಿಸಿ]ಕಡಲಾಮೆಗಳನ್ನು, ನಿರ್ದಿಷ್ಟವಾಗಿ ಭೂಮಿಯ ಮೇಲಿರುವ ಸಣ್ಣ ಆಮೆಗಳನ್ನು ಮತ್ತು ಸಿಹಿ ನೀರಿನ ಆಮೆಗಳನ್ನು ಸಾಮಾನ್ಯವಾಗಿ ಸಾಕುಪ್ರಾಣಿಯಾಗಿ ಇಡುವರು. ಇವುಗಳಲ್ಲಿ ಹೆಚ್ಚು ಜನಪ್ರಿಯವಾಗಿರುವವು ರಶಿಯನ್ ಟಾರ್ಟೈಸ್‍ಗಳು, ಮೊನಚು ತೊಡೆಯ ಆಮೆ (spur-thighed) ಮತ್ತು ಕೆಂಪು ಕಿವಿಯ ಜಾರಿಹೋಗುವ ಆಮೆ (red-eared slider).[೧೭]
ಅಮೆರಿಕ ಸಂಯುಕ್ತ ಸಂಸ್ಥಾನದಲ್ಲಿ ಸಾಮಾನ್ಯವಾಗಿ ಕಡಲಾಮೆಗಳ ಸಂಪರ್ಕದಿಂದ ಬರುವ ಆಹಾರ ವಿಷವಾಗುವ ರೋಗವನ್ನು ತಡೆಯಲು ಯು.ಎಸ್. ಆಹಾರ ಮತ್ತು ಔಷಧ ಆಡಳಿತವು (ಎಫ್‍ಡಿಎ) ೪ ಅಂಗುಲಕ್ಕಿಂತ ಚಿಕ್ಕದಾದ ಕಡಲಾಮೆಗಳನ್ನು ಮಾರುವುದನ್ನು ನಿಲ್ಲಿಸುವ ಕಾನೂನನ್ನು ೧೯೭೫ರಲ್ಲಿ ತಂದಿತು. ಯು.ಎಸ್.ನ ಪ್ರತಿ ರಾಜ್ಯದಲ್ಲೂ ೪ ಅಂಗುಲ ಉದ್ದಕ್ಕಿಂತ ಚಿಕ್ಕದಾದ ಕಡಲಾಮೆಗಳನ್ನು ಮಾರುವುದು ಕಾನೂನುಬಾಹಿರ. ಎಫ್‍ಡಿಎದಲ್ಲಿಯ ಲೋಪದೋಷದಿಂದಾಗಿ ಅನೇಕ ಅಂಗಡಿಗಳಲ್ಲಿ ಮತ್ತು ಬೀದಿ ಮಾರುಕಟ್ಟೆಗಳಲ್ಲಿ ಚಿಕ್ಕ ಕಡಲಾಮೆಗಳನ್ನು ಮಾರುತ್ತಾರೆ. ಹೇಗೆಂದರೆ ಕಾನೂನು ಶೈಕ್ಷಣಿಕ ಉದ್ದೇಶಕ್ಕೆ ೪ ಅಂಗುಲಕ್ಕಿಂತ ಕಡಿಮೆ ಉದ್ದದ ಕಡಲಾಮೆಗಳನ್ನು ಮಾರುವುದಕ್ಕೆ ಅವಕಾಶ ನೀಡುತ್ತದೆ.[೧೮][೧೯]
ರೆಡ್ ಇಯರ್ಡ್ ಸ್ಲೈಡರ್‌ಗಳನ್ನು ಸಾಕುಪ್ರಾಣಿಯಾಗಿ ಬಳಸದಿರುವಂತೆ ಮಾಡಲು ಕೆಲವು ರಾಜ್ಯಗಳಲ್ಲಿ ಬೇರೆ ಕಾಯ್ದೆ ಮತ್ತು ನಿಯಮಗಳನ್ನು ತಂದಿದ್ದಾರೆ. ಏಕೆಂದರೆ ಅವು ಆಕ್ರಮಣಶೀಲ ಜಾತಿಯವು. ಇನ್ನೊಂದು ಕಾರಣ ಈ ಸಾಕುಪ್ರಾಣಿಯಾದವುಗಳು ಸ್ಥಳೀಯವಾಗಿರುವುದಿಲ್ಲ, ಅವನ್ನು ಸಾಕುಪ್ರಾಣಿ ವ್ಯಾಪಾರದ ಮೂಲಕ ಪರಿಚಯಿಸಿದ್ದಾಗಿರುತ್ತದೆ. ೧ ಜುಲೈ ೨೦೦೭ರ ಪ್ರಕಾರ ಫ್ಲೋರಿಡಾದಲ್ಲಿ ವನ್ಯಜಾತಿಯ ರೆಡ್ ಇಯರ್ಡ್ ಸ್ಲೈಡರ್‌ಗಳನ್ನು ಮಾರುವುದು ಕಾನೂನುಬಾಹಿರ. ಮೊಟ್ಟೆ ಒಡೆದು ಹೊರಬರುವ ಅಸ್ವಾಭಾವಿಕವಾದ ಬಣ್ಣಗಳ ವೈವಿಧ್ಯವಿರುವ ಅಲ್ಬಿನೋ ಮತ್ತು ಪಾಸ್ಟಲ್ ರೆಡ್-ಇಯರ್ಡ್ ಸ್ಲೈಡರ್‌ಗಳನ್ನು ಮಾರುವುದಕ್ಕೆ ಇನ್ನೂ ಅವಕಾಶವಿದೆ.[೨೦]
ಆಹಾರ, ಸಾಂಪ್ರದಾಯಿಕ ಔಷಧ ಮತ್ತು ಪ್ರಸಾಧನವಾಗಿ
[ಬದಲಾಯಿಸಿ]
ಕಡಲಾಮೆಗಳ ಮಾಂಸವನ್ನು ಈ ಹಿಂದೆ ಮತ್ತು ಈಗಲೂ ಅನೇಕ ಸಂಸ್ಕೃತಿಯಲ್ಲಿ ಸ್ವಾದಿಷ್ಟ ಭಕ್ಷ್ಯ ಎಂದು ಪರಿಗಣಿಸಲಾಗಿದೆ.[೨೧] ಆಂಗ್ಲೋ-ಅಮೆರಿಕನ್ ಅಡುಗೆಯಲ್ಲಿ ಟರ್ಟಲ್ ಸೂಪ್ ಬೆಲೆಯುಳ್ಳ ಭಕ್ಷ್ಯವಾಗಿದೆ.[೨೨] ಮತ್ತು ದೂರಪ್ರಾಚ್ಯದ ಕೆಲವು ಭಾಗಗಳಲ್ಲಿ ಈಗಲೂ ಹೀಗೆಯೇ ಇದೆ. ಕುದಿಸಿದ ಗೋಫರ್ ಟರ್ಟೈಸ್ ಪ್ಲೋರಿಡಾದ ಕೆಲವು ಗುಂಪುಗಳಲ್ಲಿ ಜನಪ್ರಿಯವಾಗಿದೆ.[೨೩]
ಗ್ರಾಂಡ್ ಕೇಮನ್ ದ್ವೀಪದಲ್ಲಿ ಆಮೆಯು ಸಾಂಪ್ರದಾಯಿಕ ಆಹಾರದ ಭಾಗವಾಗಿದೆ. ಕಾಡಿನ ಸಂಗ್ರಹ ತೀರುತ್ತ ಬಂದ ಕಾರಣ ಒಂದು ಆಮೆಯ ಫಾರ್ಮ್ಅನ್ನು ವಿಶೇಷವಾಗಿ ಆಹಾರಕ್ಕಾಗಿಯೇ ಸಮುದ್ರ ಆಮೆಗಳನ್ನು ಹೆಚ್ಚಿಸಲು ಸ್ಥಾಪಿಸಲಾಗಿದೆ. ಕೆರಿಬಿಯನ್ ಸಮುದ್ರದಲ್ಲಿ ಆಮೆಯ ಸಂತತಿಯನ್ನು ಹೆಚ್ಚಿಸುವ ಪ್ರಯತ್ನದ ಅಂಗವಾಗಿ ಈ ಫಾರ್ಮ್ ಕಾಡಿಗೆ ಮಾದರಿಗಳನ್ನು ಬಿಡುಗಡೆ ಮಾಡಿದೆ.[೨೪]
ಕೆರಿಬಿಯನ್ ಮತ್ತು ಮೆಕ್ಸಿಕೋಗಳಲ್ಲಿ ಆಮೆಯ ಕೊಬ್ಬನ್ನು ಪ್ರಸಾಧನಗಳ ತಯಾರಿಕೆಯಲ್ಲಿ ಪ್ರಮುಖ ಸಾಮಗ್ರಿಯಾಗಿ ಬಳಸುತ್ತಾರೆ. ಇವನ್ನು ಸ್ಪ್ಯಾನಿಶ್ ಹೆಸರು ಕ್ರೀಮ್ ಡೆ ಟೋರ್ಟುಗಾ ಹೆಸರಿನಲ್ಲಿ ವ್ಯಾಪಾರ ಮಾಡುತ್ತಾರೆ.[೨೫]
ಆಮೆಯ ತಳಭಾಗದ ಚಿಪ್ಪನ್ನು (ಇದು ಆಮೆಯನ್ನು ತಳಭಾಗದಲ್ಲಿ ಆವರಿಸಿರುತ್ತದೆ) ಸಾಂಪ್ರದಾಯಿಕ ಚೀನಾ ಔಷಧಗಳಲ್ಲಿ ಬಳಸುತ್ತಾರೆ. ಅಂಕಿಅಂಶಗಳ ಪ್ರಕಾರ ತೈವಾನ್ ನೂರಾರು ಟನ್ ಆಮೆಯ ತಳಭಾಗದ ಚಿಪ್ಪನ್ನು ಪ್ರತಿವರ್ಷ ರಫ್ತು ಮಾಡುತ್ತದೆ.[೨೬] ಒಂದು ಜನಪ್ರಿಯ ಔಷಧ ತಯಾರಿಕೆಯು ಆಮೆಯ ತಳಕವಚದ ಪುಡಿಯನ್ನು (ಮತ್ತು ವಿವಿಧ ಗಿಡಮೂಲಿಕೆಗಳನ್ನು) ಆಧರಿಸಿದೆ. ಇದು ಗ್ವಿಲಿಂಗ್ಗಾವೋ ಜೆಲ್ಲಿ, ಈಚಿನ ದಿನಗಳಲ್ಲಿ ಇದನ್ನು ಕೇವಲ ಗಿಡಮೂಲಿಕೆ ಸಾಮಗ್ರಿಗಳಿಂದ ಮಾತ್ರ ತಯಾರಿಸುತ್ತಾರೆ.[೨೭][೨೮]
ಸಂರಕ್ಷಣೆಯ ಸ್ಥಾನಮಾನ
[ಬದಲಾಯಿಸಿ]ರಸಭರಿತ ಆಹಾರ ಮತ್ತು ಸಾಂಪ್ರದಾಯಿಕ ಔಷಧ ತಯಾರಕರ ಹೆಚ್ಚುತ್ತಿರುವ ಬೇಡಿಕೆಯನ್ನು ಪೂರೈಸಲು ಚೀನದ ಉದ್ದಿಮೆದಾರರು ಪ್ರಯತ್ನಗಳನ್ನು ಮಾಡಿದ್ದಾರೆ. ಸಹಜವಾಗಿ ಹುಟ್ಟಿ ಬೆಳೆದ ಕಡಲಾಮೆಗಳನ್ನು ಹಿಡಿಯುವದರ ಬದಲಿಗೆ ಫಾರ್ಮ್‌ಗಳಲ್ಲಿ ಬೆಳೆಸಿದ್ದನ್ನು ಪೂರೈಸುತ್ತಿದ್ದಾರೆ. ೨೦೦೭ರಲ್ಲಿ ಪ್ರಕಟವಾದ ಒಂದು ಅಧ್ಯಯನದ ಪ್ರಕಾರ, ಚೀನದಲ್ಲಿ ಒಂದು ಸಾವಿರಕ್ಕೂ ಅಧಿಕ ಆಮೆ ಫಾರ್ಮ್ ಕಾರ್ಯನಿರ್ವಹಿಸುತ್ತಿವೆ.[೨೯][೩೦] ಒಕ್ಲಹೋಮಾ ಮತ್ತು ಲೂಯಿಸಿಯಾನಾಗಳಲ್ಲಿಯ ಆಮೆ ಫಾರ್ಮ್‌ಗಳು ಚೀನಕ್ಕೆ ರಫ್ತು ಮಾಡಲು ಆಮೆಗಳನ್ನು ಬೆಳೆಸುತ್ತಿವೆ.
ಆದಾಗ್ಯೂ ನೈಸರ್ಗಿಕ ಆಮೆಗಳನ್ನು ಹಿಡಿಯುವುದು ಮತ್ತು ಭಾರೀ ಪ್ರಮಾಣದಲ್ಲಿ ಮಾರುಕಟ್ಟೆಗೆ ಕಳುಹಿಸುವುದು ಮುಂದುವರಿದಿದೆ. (ಆಮೆಗಳ ಫಾರ್ಮನ್ನು ಮರಿಗಳನ್ನು ಮಾಡುವ ಅಡ್ಡೆಯಾಗಿ ಬಳಸುವರು) ಇದರ ಪರಿಣಾಮ ಪರಿಸ್ಥಿತಿಯು ಸಂರಕ್ಷಣಕಾರರು ವರ್ಣಿಸುವಂತೆ "ಏಶಿಯದ ಆಮೆಗಳು ಸಂಕಷ್ಟದಲ್ಲಿವೆ".[೩೧] ಜೀವಶಾಸ್ತ್ರಜ್ಞ ಜಾರ್ಜ್ ಅಮಾಟೋ ಅವರ ಮಾತುಗಳಲ್ಲಿಯೇ ಹೇಳಬೇಕೆಂದರೆ, "ಹಿಡಿದಿರುವ ಆಮೆಗಳ ಮೊತ್ತ ಮತ್ತು ಪ್ರಮಾಣ..... ಆಗ್ನೇಯ ಏಶಿಯಾ ಪ್ರದೇಶದಲ್ಲಿ ಇಡೀ ಜಾತಿಯನ್ನೇ ನಾಮಾವಶೇಷ ಮಾಡಿಬಿಟ್ಟಿದೆ". ಈಗಲೂ ಕೂಡ ಜೀವಶಾಸ್ತ್ರಜ್ಞರು ಈ ಭಾಗದಲ್ಲಿ ಎಷ್ಟು ವಿಶಿಷ್ಟ ಆಮೆ ಜಾತಿ ಈ ಪ್ರದೇಶದಲ್ಲಿವೆ ಎಂಬುದನ್ನು ತಿಳಿದಿಲ್ಲ.[೩೨] ಏಶಿಯಾದ ೯೦ ಸಮುದ್ರ ಆಮೆಗಳು ಮತ್ತು ಸಿಹಿನೀರಿನ ಆಮೆಗಳ ಪ್ರಭೇದಗಳಲ್ಲಿ ಶೇ.೭೦ರಷ್ಟು ಅಪಾಯವನ್ನು ಎದುರಿಸುತ್ತಿವೆ.
ನೈಸರ್ಗಿಕ ಆಮೆಗಳ ಕೃಷಿ ಮಾಡುವುದು ಯುಎಸ್ಎಯ ಅನೇಕ ರಾಜ್ಯಗಳಲ್ಲಿ ಕಾನೂನುಬದ್ಧ. ಇವುಗಳಲ್ಲಿ ಒಂದು ರಾಜ್ಯ ಫ್ಲೋರಿಡಾದಲ್ಲಿ ಕೇವಲ ಒಂದು ಕಡಲಾಹಾರ ಕಂಪನಿ ಫೋರ್ಟ್ ಲಾಡರ್‌ಡೇಲ್ ೨೦೦೮ರಲ್ಲಿ ವಾರವೊಂದಕ್ಕೆ ಐದು ಸಾವಿರ ಮೃದು ಚಿಪ್ಪಿನ ಆಮೆಗಳನ್ನು ಖರೀದಿಸುತ್ತಿತ್ತು. ಈ ಕೃಷಿಕರಿಗೆ (ಬೇಟೆಗಾರರು) ಪ್ರತಿ ಪೌಂಡ್‍ಗೆ $೨ ಕೊಡುತ್ತಿದ್ದರು. ಕೆಲವರು ಒಳ್ಳೆಯ ದಿನಗಳಲ್ಲಿ ೩೦-೪೦ ಆಮೆಗಳನ್ನು (೫೦೦ಪೌಂಡ್) ಹಿಡಿಯುತ್ತಿದ್ದರು. ಹಿಡಿದವುಗಳಲ್ಲಿ ಕೆಲವನ್ನು ಸ್ಥಳೀಯ ರೆಸ್ಟೋರೆಂಟ್‌ಗಳಿಗೆ ಮಾರಿದರೆ, ಹೆಚ್ಚಿನವು ದೂರಪ್ರಾಚ್ಯ ದೇಶಗಳಿಗೆ ರಫ್ತಾಗುತ್ತಿವೆ. ಫ್ಲೋರಿಡಾ ಮೀನು ಮತ್ತು ವನ್ಯಜೀವಿ ಸಂರಕ್ಷಣೆ ಆಯೋಗವು ೨೦೦೮ರಲ್ಲಿ ಮಾಡಿದ ಅಂದಾಜಿನ ಪ್ರಕಾರ ೩೦೦೦ ಪೌಂಡ್ ಮೃದು ಚಿಪ್ಪಿನ ಆಮೆಗಳು ಪ್ರತಿ ವಾರ ಟ್ಯಾಂಪಾ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ರಫ್ತಾಗುತ್ತವೆ.
ಹೀಗಿದ್ದಾಗ್ಯೂ ಅಮೆರಿಕದಿಂದ ರಫ್ತಾಗುವ ಬಹುತೇಕ ಆಮೆಗಳು ಫಾರ್ಮ್‌ಗಳಲ್ಲಿ ಕೃಷಿಮಾಡಿದವು ಆಗಿವೆ. ವರ್ಲ್ಡ್ ಕೆಲೋನಿಯನ್ ಟ್ರಸ್ಟ್ ಮಾಡಿರುವ ಒಂದು ಅಂದಾಜಿನ ಪ್ರಕಾರ ಮೂರು ವರ್ಷಗಳ ಅವಧಿಯಲ್ಲಿ (ನವೆಂಬರ್ ೪, ೨೦೦೨- ನವೆಂಬರ್ ೨೬, ೨೦೦೫) ಅಮೆರಿಕದಲ್ಲಿ ಮಾಡಿರುವ ೩೨.೮ ದಶಲಕ್ಷ ಪ್ರಾಣಿಗಳ ಕೃಷಿಯಲ್ಲಿ ಸುಮಾರು ಶೇ.೯೭ರಷ್ಟು ರಫ್ತಾಗಿವೆ.[೩೩] (ಇದೇ ೨೦೦೨-೨೦೦೫ರ ಅವಧಿ ಎಂದುಕೊಳ್ಳಬಹುದು) ಅಮೆರಿಕದಿಂದ ರಫ್ತಾದ ಒಟ್ಟೂ ಆಮೆಗಳಲ್ಲಿ ಶೇ.೪೭ರಷ್ಟು ಪೀಪಲ್ಸ್ ರಿಪಬ್ಲಿಕ್ ಆಫ್ ಚೀನಕ್ಕೆ (ಹೆಚ್ಚಾಗಿ ಹಾಂಗ್ ಕಾಂಗ್‍ಗೆ), ಇನ್ನು ಶೇ.೨೦ ಭಾಗ ತೈವಾನ್‍ಗೆ ಮತ್ತು ಶೇ.೧೧ ಭಾಗ ಮೆಕ್ಸಿಕೋಗೆ ರಫ್ತಾಗಿದೆ ಎಂದು ಅಂದಾಜು ಮಾಡಲಾಗಿದೆ.[೩೪][೩೫]
ಚಿತ್ರ ಸಂಪುಟ
[ಬದಲಾಯಿಸಿ]-
ಉತ್ತರ ನ್ಯೂಯಾರ್ಕ್ ರಾಜ್ಯದಲ್ಲಿ ಸೇಂಟ್ ಲಾರೆನ್ಸ್ ನದಿಯ ಬಳಿ ಅತಿ ಹತ್ತಿರದಿಂದ ತೆಗೆದ ರೇಗುವ ಆಮೆಯ (ಚೆಲಿಂಡ್ರಾ ಸೆರ್ಪೆಂಟಿನಾ) ತಲೆಯ ಭಾಗದ ಚಿತ್ರ -
ಫ್ಲೋರಿಡಾ ನಿವಾಸಿಯೊಬ್ಬನ ಹಿತ್ತಿಲಿನಲ್ಲಿಯ ಆಮೆ.
ಹೆಚ್ಚಿನ ಓದಿಗಾಗಿ
[ಬದಲಾಯಿಸಿ]- Iskandar, DT (2000). Turtles and Crocodiles of Insular Southeast Asia and New Guinea. Bandung: Palmedia – ITB.
- Pritchard, Peter Charles Howard (1979). Encyclopedia of turtles. Neptune, NJ: T.F.H. Publications. ISBN 0-87666-918-6.
ಉಲ್ಲೇಖಗಳು
[ಬದಲಾಯಿಸಿ]- ↑ "Testudines". Integrated Taxonomic Information System.
- ↑ "Archelon-Enchanted Learning Software". Enchantedlearning.com. Retrieved 2009-03-14.
- ↑ James E. Barzyk Turtles in Crisis: The Asian Food Markets. The article itself is not dated, but mostly refers to data in the range 1995-2000.
- ↑ Michael J. Connor. "CTTC's Turtle Trivia". Tortoise.org. Retrieved 2009-03-14.
- ↑ "Marine Turtles". Oceansofkansas.com. Retrieved 2009-03-14.
- ↑ "Anatomy and Diseases of the Shells of Turtles and Tortoises". Peteducation.com. Retrieved 2009-03-14.
- ↑ All but Ageless, Turtles Face Their Biggest Threat: Humans
- ↑ Li C, Wu XC, Rieppel O, Wang LT, Zhao LJ (2008). "An ancestral turtle from the Late Triassic of southwestern China". Nature. 456 (7221): 497–501. doi:10.1038/nature07533. PMID 19037315.
{{cite journal}}: Invalid|ref=harv(help); Unknown parameter|month=ignored (help)CS1 maint: multiple names: authors list (link) - ↑ "Introduction to Procolophonoidea". Ucmp.berkeley.edu. Retrieved 2009-03-14.
- ↑ Rieppel O, DeBraga M (1996). "Turtles as diapsid reptiles". Nature. 384: 453–5. doi:10.1038/384453a0.
{{cite journal}}: Invalid|ref=harv(help) - ↑ Zardoya R, Meyer A (1998). "Complete mitochondrial genome suggests diapsid affinities of turtles". Proc. Natl. Acad. Sci. U.S.A. 95 (24): 14226–31. doi:10.1073/pnas.95.24.14226. PMC 24355. PMID 9826682.
{{cite journal}}: Invalid|ref=harv(help); Unknown parameter|month=ignored (help) - ↑ Benton, M. J. (2000). Vertebrate Paleontology (2nd ed.). London: Blackwell Science Ltd. ISBN 0632056142.
{{cite book}}: Cite has empty unknown parameter:|coauthors=(help), ೩ನೆ ಆವೃತ್ತಿ. ೨೦೦೪ ISBN ೦-೬೩೨-೦೫೬೩೭-೧ - ↑ Zardoya, R. (1998). "Complete mitochondrial genome suggests diapsid affinities of turtles". Proc Natl Acad Sci U S A. 95 (24): 14226–14231. doi:10.1073/pnas.95.24.14226. ISSN 0027-8424. PMC 24355. PMID 9826682.
{{cite journal}}: Invalid|ref=harv(help); Unknown parameter|coauthors=ignored (|author=suggested) (help) - ↑ Rieppel, O. (1996). "Turtles as diapsid reptiles". Nature. 384: 453–455. doi:10.1038/384453a0.
{{cite journal}}: Invalid|ref=harv(help); Unknown parameter|coauthors=ignored (|author=suggested) (help) - ↑ http://www.bartleby.com/೬೧/೧/T೦೧೨೦೧೦೦.html
- ↑ King, .L. and Berrow, S,D. 2009. Marine turtles in Irish waters. Ir. Nat. J. Special Supplement 2009
- ↑ David Alderton (1986). An Interpret Guide to Reptiles & Amphibians, Salamander Books Ltd., London & New York.
- ↑ GCTTS FAQ: "4 Inch Law", actually an FDA regulation
- ↑ Turtles intrastate and interstate requirements; FDA Regulation, Sec. 1240.62, page 678 part d1.
- ↑ Turtle ban begins today; New state law, newszap.com, 2007-07-01. Retrieved 2007-07-06.
- ↑ James E. Barzyk Turtles in Crisis: The Asian Food Markets. The article itself is not dated, but mostly refers to data in the range 1995-2000.
- ↑ Turtle soup recipe in The Household Cyclopedia of General Information (1881)
- ↑ "Gopher Tortoise Stew", in: Recipes from Another Time: Savor the flavor of old St. Augustine and try a couple of these original recipes. Smithsonian magazine, October 2001
- ↑ "Cayman Islands Turtle Farm". Archived from the original on 2009-12-19. Retrieved 2009-10-28.
- ↑ NOAA Marine Forensics Branch
- ↑ Chen1, Tien-Hsi; Chang2, Hsien-Cheh; Lue, Kuang-Yang (2009). "Unregulated Trade in Turtle Shells for Chinese Traditional Medicine in East and Southeast Asia: The Case of Taiwan". Chelonian Conservation and Biology. 8 (1): 11–18. doi:10.2744/CCB-0747.1.
{{cite journal}}: Invalid|ref=harv(help)CS1 maint: numeric names: authors list (link) - ↑ Dharamanda, APPENDIX 1: "Golden Coin Turtle" (A report dated April 27, 2002 by ECES News (Earth Crash Earth Spirit)). Quote: "The popularity of turtle jelly can be seen in the success of Ng Yiu-ming. His chain of specialty stores has grown from one shop in 1991 to 68 today, in Hong Kong, Macau, and mainland China. Ng also packs turtle jelly into portable containers sold at convenience stores. He insists no golden coin turtles are used. 'They're too expensive' he said. '... [I]f you know how to choose the herbal ingredients, jelly made from other kinds of turtles will be just as good.'"
- ↑ Dharamanda, APPENDIX 3: "Tortoise Jelly (Turtle Jelly)"
- ↑ "Turtle farms threaten rare species, experts say Archived 2012-02-18 ವೇಬ್ಯಾಕ್ ಮೆಷಿನ್ ನಲ್ಲಿ.". Fish Farmer, 30 March 2007. Their source is an article by James Parham, Shi Haitao, and two other authors, published in Feb 2007 in the journal Conservation Biology
- ↑ Hilary Hylton, "Keeping U.S. Turtles Out of China Archived 2012-03-27 ವೇಬ್ಯಾಕ್ ಮೆಷಿನ್ ನಲ್ಲಿ.", Time Magazine, 2007-05-08. There is also a copy Archived 2016-03-09 ವೇಬ್ಯಾಕ್ ಮೆಷಿನ್ ನಲ್ಲಿ. of the article at the TSA site. Articles by Peter Paul van Dijk are mentioned as the main source.
- ↑ Sze Man Cheung, David Dudgeon, "Quantifying the Asian turtle crisis: market surveys in southern China, 2000-2003". Aquatic Conservation: Marine and Freshwater Ecosystems, Volume 16 Issue 7, Pages 751-770. Published Online: 25 Oct 2006
- ↑ A Conversation at the Museum of Natural History: filmmaker Eric Daniel Metzgar, the creator of the film The Chances of the World Changing, talks to George Amato, the director of conservation genetics at the American Museum of Natural History about turtle conservation and the relationship between evolution and extinction
- ↑ Declared Turtle Trade From the United States - Totals
- ↑ Declared Turtle Trade From the United States - Destinations (Major destinations: 13,625,673 animals to Hong Kong, 1,365,687 to the rest of the PRC, 6,238,300 to Taiwan, 3,478,275 to Mexico, and 1,527,771 to Japan, 945,257 to Singapore, and 596,966 to Spain.
- ↑ Declared Turtle Trade From the United States - Observations
ಬಾಹ್ಯ ಕೊಂಡಿಗಳು
[ಬದಲಾಯಿಸಿ]
- ಯುಸಿ ಬರ್ಕಲಿ ಮ್ಯುಸಿಯಂ ಆಫ್ ಪಾಲೆಯೆಂಟೋಲಜಿ
- ಕೆಲೋನಿಯನ್ ಸ್ಟಡ್‍ಬುಕ್ Archived 2010-07-30 ವೇಬ್ಯಾಕ್ ಮೆಷಿನ್ ನಲ್ಲಿ. ಕಲೆಕ್ಷನ್ ಆ್ಯಂಡ್ ಡಿಸ್ಪ್ಲೇ ಆಫ್ ದಿ ವೇಟ್ಸ್/ಸೈಜಸ್ ಆಫ್ ಕ್ಯಾಪ್ಟಿವ್ ಟರ್ಟಲ್ಸ್
- ಬಯೋಜಿಯೋಗ್ರಫಿ ಆ್ಯಂಡ್ ಫಿಲೋಜೆನಿ ಆಫ್ ದಿ ಕೆಲೋನಿಯಾ Archived 2007-06-14 ವೇಬ್ಯಾಕ್ ಮೆಷಿನ್ ನಲ್ಲಿ. (ಟಾಕ್ಷೋನಮಿ,ಮ್ಯಾಪ್ಸ್)
- 'ಟರ್ಟಲ್' ಪದ ಬೇರೆಬೇರೆ ಭಾಷೆಗಳಲ್ಲಿ
- ಸೈಂಟಿಸ್ಟ್ ಆರ್ಟಿಕಲ್ (ಇನ್‍ಕ್ಲೂಡಿಂಗ್ ವೀಡಿಯೋ) ಆನ್ ಹೌ ದಿ ಟರ್ಟಲ್ ಇವಾಲ್ವಡ್ ಇಟ್ಸ್ ಶೆಲ್)
- Pages using the JsonConfig extension
- CS1 errors: unsupported parameter
- CS1 errors: invalid parameter value
- CS1 maint: multiple names: authors list
- CS1 errors: empty unknown parameters
- CS1 maint: numeric names: authors list
- Harv and Sfn no-target errors
- ವೆಬ್ ಆರ್ಕೈವ್ ಟೆಂಪ್ಲೇಟಿನ ವೇಬ್ಯಾಕ್ ಕೊಂಡಿಗಳು
- Articles using diversity taxobox
- Articles with 'species' microformats
- Taxoboxes with the error color
- Taxobox articles missing a taxonbar
- ಸರೀಸೃಪಗಳು
- ಮೈಸೂರು ವಿಶ್ವವಿದ್ಯಾನಿಲಯ ವಿಶ್ವಕೋಶ