ಬಂಗುಡೆ

ಬಂಗುಡೆ
Conservation status
Data Deficient  (IUCN 3.1)
Scientific classification
ಕ್ಷೇತ್ರ:	ಯೂಕ್ಯಾರ್ಯೋಟಾ
ಸಾಮ್ರಾಜ್ಯ:	ಅನಿಮೇಲಿಯಾ
ವಿಭಾಗ:	ಕಾರ್ಡೇಟಾ
ವರ್ಗ:	ಆ್ಯಕ್ಟಿನೋಟೆರಿಜೀ
ಗಣ:	ಪರ್ಸಿಫ಼ಾರ್ಮೀಸ್
ಉಪಗಣ:	ಸ್ಕಾಂಬ್ರಾಯ್ಡೀ
ಕುಟುಂಬ:	ಸ್ಕಾಂಬ್ರಿಡೇ
ಉಪಕುಟುಂಬ:	ಸ್ಕಾಂಬ್ರಿನೇ
ಪಂಗಡ:	ಸ್ಕಾಂಬ್ರಿನಿ
ಕುಲ:	ರಾಸ್ಟ್ರೆಲಿಗರ್
ಪ್ರಜಾತಿ:	R. kanagurta
Binomial name
Rastrelliger kanagurta (Cuvier, 1816)

ಬಂಗುಡೆ ಮೀನು

ಬಂಗುಡೆ ಒಂದು ಸಮುದ್ರ ಮೀನಿನಲ್ಲಿ ಕಂಡು ಬರುವ ಪ್ರಭೇದ. ಇದನ್ನು ಇಂಡಿಯನ್ ಮ್ಯಾಕೆರೆಲ್ ಅಥವಾ ರಾಸ್ಟ್ರೆಲ್ಲಿಗರ್ ಕನಗುರ್ಟಾ ಎಂದು ಕರೆಯುತ್ತಾರೆ. ಇದು ಸಾಮಾನ್ಯವಾಗಿ ಭಾರತೀಯ ಮತ್ತು ಪಶ್ಚಿಮ ಪೆಸಿಫಿಕ್ ಸಮುದ್ರಗಳಲ್ಲಿ ಕಂಡುಬರುತ್ತದೆ. ಇದನ್ನು ಸಾಮಾನ್ಯವಾಗಿ ದಕ್ಷಿಣ ಮತ್ತು ಆಗ್ನೇಯ ಏಷ್ಯಾದ ಪಾಕಪದ್ಧತಿಯಲ್ಲಿ ಬಳಸಲಾಗುತ್ತದೆ. ಇದನ್ನು ಇಂಡೋನೇಷ್ಯಾದಲ್ಲಿ 'ಕೆಂಬಂಗ್', ಗುಜರಾತಿನಲ್ಲಿ ಬಂಗ್ಡಿ (ಬಾಂಗ್ಡಿ), ಮರಾಠಿ ಭಾಷೆಯಲ್ಲಿ ಬಂಗ್ಡಾ (ಬಾಂಗ್ಡಾ) ಮತ್ತು ತುಳು, ಕೊಂಕಣಿ ಮತ್ತು ಕನ್ನಡದಲ್ಲಿ 'ಬಂಗುಡೆ' ಎಂದು ಕರೆಯುತ್ತಾರೆ.

ಮ್ಯಾಕರಲ್‍ನ ಕೆಲವು ಪ್ರಜಾತಿಗಳು ಕರಾವಳಿಯುದ್ದಕ್ಕೆ ಬಹಳ ದೂರಗಳವರೆಗೆ ಗುಂಪಿನಲ್ಲಿ ವಲಸೆ ಹೋಗುತ್ತವೆ ಮತ್ತು ಇತರ ಪ್ರಜಾತಿಗಳು ಮಹಾಸಾಗರಗಳನ್ನು ದಾಟುತ್ತವೆ

ಉಷ್ಣ ಮತ್ತು ಸಮಶೀತೋಷ್ಣ ವಲಯಗಳ ಸಮುದ್ರಗಳಲ್ಲಿ ವಾಸಿಸುವ ಮ್ಯಾಕರಲ್ ಎನ್ನುವುದು ಮುಖ್ಯವಾಗಿ ಪಶ್ಚಿಮ ಕರಾವಳಿಯ ಪ್ರಧಾನ ಮೀನುಗಾರಿಕೆಗೆ ಕಾರಣವಾದ ಬಂಗುಡೆ (ರಾಸ್ಟ್ರೆಲ್ಲಿಜರ್ ಕನಗುರ್ತ) ಮೀನು.

ಆವಾಸಸ್ಥಾನ ಮತ್ತು ವಿಧ

ಭಾರತೀಯ ಮತ್ತು ಪೆಸಿಫಿಕ್ ಸಮುದ್ರ ತೀರದ ಬೆಚ್ಚಗಿನ ಆಳವಿಲ್ಲದ ನೀರಿನಲ್ಲಿ ಇವುಗಳು ಹೆಚ್ಚಾಗಿ ಕಂಡುಬರುತ್ತವೆ. ಇದು ಕರ್ನಾಟಕದ ಕರಾವಳಿ ತೀರ ಪ್ರದೇಶ ಮತ್ತು ಮಂಗಳೂರಿನ ಅತ್ಯಂತ ಜನಪ್ರಿಯ ಮೀನು ಆಹಾರ. ಬಂಗುಡೆಯಲ್ಲಿ ಸುಮಾರು ೨೧ ವಿಧಗಳಿವೆ. ಬಂಗುಡೆಯು ಸ್ಕೊಂಬ್ರಿಡೆ ಕುಟುಂಬಕ್ಕೆ ಸೇರಿದೆ. ಸ್ಕೊಂಬರ್ ಮತ್ತು ರಾಶ್ಟ್ರೆಲ್ಲಿಗೆರ್ ಬಂಗುಡೆಯ ಪ್ರಮುಖ ಪ್ರಜಾತಿಗಳು. ಭಾರತೀಯ ಬಂಗುಡೆ ಮೀನಿಗೆ ಇಂಡಿಯನ್ ಮ್ಯಾಕೆರೆಲ್ ಎಂದು ಕರೆಯುತ್ತಾರೆ. ಕರಾವಳಿಯ ಬಂಗುಡೆಗಳಲ್ಲಿ ನುರುವಾಯಿ ಬಂಗುಡೆಯು ಒಂದು ವಿಧ.

ಗುಣಲಕ್ಷಣಗಳು

ಹೆಚ್ಚಿನ ಬಂಗುಡೆ ಮೀನುಗಳು ಸ್ಕೊಂಬ್ರಿಡೆ ಕುಟುಂಬಕ್ಕೆ ಸೇರಿದೆ. ಇವು ಸಾಧಾರಣವಾಗಿ ಟ್ಯೂನ ಮೀನಿಗಿಂತಲೂ ಚಿಕ್ಕದಾಗಿರುತ್ತವೆ. ಇದರ ಕಿವಿರುಗಳು ಮತ್ತು ರೆಕ್ಕೆಗಳು ಸಣ್ಣದಾಗಿರುತ್ತವೆ.

ದೇಹರಚನೆ

ದೇಹದ ಮೇಲ್ಭಾಗ ನೀಲಿಬಣ್ಣದ್ದು. ಕೆಳಭಾಗ ಬಿಳಿ. ಬೆನ್ನಿನ ರೆಕ್ಕೆ ಮತ್ತು ಗುದದ ರೆಕ್ಕೆಗಳ ಹಿಂದೆ ಕಿರಿರೆಕ್ಕೆಗಳ ಸಾಲೊಂದು ಇರುವುದು.

ಆಹಾರಾಂಶ

ಬಂಗುಡೆ ಮೀನಿನಲ್ಲಿ ಸರಾಸರಿ ೧೩% ಕೊಬ್ಬಿನಾಂಶ,೧೮% ಪ್ರೋಟೀನ್ ಹಾಗೂ ಎ ಮತ್ತು ಡಿ ಜೀವಸತ್ವ ಇದೆ. ಖನಿಜಾಂಶಗಳಾದ ಕ್ಯಾಲ್ಸಿಯಂ, ರಂಜಕ, ಪೊಟಾಶಿಯಂ, ಸೋಡಿಯಂ, ಮೆಗ್ನೇಶಿಯಂ, ಕಾರ್ಬೊಹೈಡ್ರೇಟ್ ಮತ್ತು ಸತು ಇದರಲ್ಲಿ ಇದೆ. ಬಂಗುಡೆ ಸುಮಾರು ೬೩% ನೀರಿನಾಂಶ ಹೊಂದಿದೆ.

ಮುಖ್ಯ ಜಾತಿಗಳು

ನಿಜವಾದ ಮ್ಯಾಕರಲ್‌ಗಳು ಎಂದು ಹೇಳಬಹುದಾದ ಜಾತಿಗಳು:

1. ಸ್ಕಾಂಬರ್: ಮೆಡಿಟರೇನಿಯನ್ ಮತ್ತು ಉತ್ತರ ಅಟ್ಲಾಂಟಿಕ್ ಮಹಾಸಾಗರಗಳಲ್ಲಿ ನೆಲಸಿರುವ ಸ್ಕಾಂಬರ್ ಸ್ಕಾಂಬ್ರಸ್ ಜಾತಿಯ ಮೀನು. ಸ್ಕಾಂಬರ್ ಜಾತಿಯ ಮೀನುಗಾರಿಕೆ ಅಮೆರಿಕ ಸಂಯುಕ್ತ ಸಂಸ್ಥಾನಗಳು, ಜಪಾನ್, ಸ್ಕಾಂಡಿನೇವಿಯ, ನೆದರ್‌ಲ್ಯಾಂಡ್ಸ್, ಸ್ಪೇನ್, ಪೋರ್ಚುಗಲ್ ಮತ್ತು ಬ್ರಿಟನ್‌ಗಳಲ್ಲಿ ವಿಶೇಷವಾಗಿದೆ. ಸ್ಕಾಂಬರ್ ಜಪಾನಿಕಸ್ ಪ್ರಭೇದ ಪೆಸಿಫಿಕ್ ಮಹಾಸಾಗರದ ಪ್ರಧಾನ ಮ್ಯಾಕರಲ್ ಮೀನು.
2. ರಾಸ್ಟ್ರೆಲ್ಲಿಜರ್: ರಾಸ್ಟ್ರೆಲ್ಲಿಜರ್ ಕನಗುರ್ತ (ಬಂಗುಡೆ) ಹಿಂದೂ ಮಹಾಸಾಗರದ ಮುಖ್ಯವಾದ ಮ್ಯಾಕರಲ್ ಮೀನು. ಭಾರತ ಮತ್ತು ಥಾಯ್ಲೆಂಡ್ ದೇಶಗಳಲ್ಲಿ ಇದರ ಮೀನುಗಾರಿಕೆ ಮುಖ್ಯವೆನಿಸಿದೆ.

ಬೇರೆ ಮುಖ್ಯವಾದ ಮೀನುಗಳು

ಮ್ಯಾಕರಲ್ ಗುಂಪಿಗೆ ಸೇರಿದ ಆದರೆ ನಿಜವಾದ ಮ್ಯಾಕರಲ್‌ಗಳಲ್ಲದ ಬೇರೆ ಮುಖ್ಯವಾದ ಮೀನುಗಳು ಸ್ಕಾಂಬಿರೋಮೋರಸ್ (ಸುರ್ಮೈ) ಮತ್ತು ಆಕ್ಸಿಸ್ ಜಾತಿಗಳಿಗೆ ಸೇರಿದ ಮೀನುಗಳು. ಸ್ಕಾಂಬಿರೋಮೋರಸ್ ಕೆವಲ್ಲಾ ಪ್ರಭೇದ ಗುಂಪಿನ ಅತಿ ದೊಡ್ಡ ಮೀನು. ಇದು ಸುಮಾರು 50 ಕೆಜಿ ತೂಕದ್ದು. ಉತ್ತರ ಮತ್ತು ದಕ್ಷಿಣ ಅಮೆರಿಕ ಖಂಡಗಳ ಪೂರ್ವ ಸಮುದ್ರಗಳ ನಿವಾಸಿ. ಆ.ಥಿನ್ನಾಯ್‌ಡೆಸ್ (ಆ.ಟಾನೋಸೋಮಾ) ಸಿಕ್ಕಿರುವುದು ವರದಿಯಾಗಿದೆ.

ಜೀವನ ಚಕ್ರ

ಹೆಣ್ಣು ಮೀನು ೩,೦೦,೦೦೦ ದಿಂದ ೧೫,೦೦,೦೦೦ ಮೊಟ್ಟೆಗಳನ್ನು ಇಡುತ್ತವೆ. ಬಂಗುಡೆ ಮೀನಿನ ಮೊಟ್ಟೆಗಳು ಲಾರ್ವಾ ರೂಪದಲ್ಲಿರುವುದರಿಂದ ತೆರೆದ ಸಮುದ್ರದಲ್ಲಿ ತೇಲುತ್ತವೆ.

ಉಲ್ಲೇಖ

ವಿಕಿಸೋರ್ಸ್ ನಲ್ಲಿ ಲಭ್ಯವಿರುವ ಲೇಖನದ ವಿಷಯವನ್ನು ಇಲ್ಲಿ ಅಳವಡಿಸಲಾಗಿದೆ:

ಮೈಸೂರು ವಿಶ್ವವಿದ್ಯಾನಿಲಯ ವಿಶ್ವಕೋಶ/ಮ್ಯಾಕರಲ್