ಗೀತಾಂಜಲಿ ಶರ್ಮಾ

ಗೀತಾಂಜಲಿ ಶರ್ಮಾ
ಜನನ	(1984-09-03) ೩ ಸೆಪ್ಟೆಂಬರ್ ೧೯೮೪ ಮಥುರಾ, ಉತ್ತರ ಪ್ರದೇಶ ಭಾರತ
ಸಂಗೀತ ಶೈಲಿ	ಭಾರತೀಯ ಶಾಸ್ತ್ರೀಯ ನೃತ್ಯಗಾರ್ತಿ
ವೃತ್ತಿ	ಕಥಕ್ ನರ್ತಕಿ, ಕೃಷ್ಣ ರಾಸ್ಲೀಲಾ,ನೃತ್ಯ ಸಂಯೋಜಕಿ, ಶಿಕ್ಷಕಿ, ಪ್ರಚಾರಕಿ, ಸಂಘಟಕಿ
ಸಕ್ರಿಯ ವರ್ಷಗಳು	೧೯೯೮
Associated acts	ಉಮಾ ಡೋಗ್ರಾ, ಹೇಮಾ ಮಾಲಿನಿ, ಪಂ. ಶಿವ ಕುಮಾರ್ ಶರ್ಮಾ
ಅಧೀಕೃತ ಜಾಲತಾಣ	geetanjalisharma.in

ಗೀತಾಂಜಲಿ ಶರ್ಮಾ (ಜನನ ೩ ಸೆಪ್ಟೆಂಬರ್ ೧೯೮೪) ಒಬ್ಬ ಭಾರತೀಯ ಜಾನಪದ ಮತ್ತು ಕಥಕ್ ನೃತ್ಯಗಾರ್ತಿ. ಅವರು ಉಮಾ ಡೋಗ್ರಾ ಅವರ ಶಿಷ್ಯೆ. ಇವರು ಜೈಪುರ ಘರಾನಾದ ಕಥಕ್ ಮಾಂತ್ರಿಕರಾಗಿದ್ದ ಪಂ. ದುರ್ಗಾ ಲಾಲ್ ಅವರ ಹಿರಿಯ ಶಿಷ್ಯೆ. ಅವರು ೨೪ ವರ್ಷಗಳಿಂದ ಭಾರತ ಮತ್ತು ವಿದೇಶಗಳಲ್ಲಿ ನೃತ್ಯ ಪ್ರದರ್ಶಿಸುತ್ತಿದ್ದಾರೆ.

ಅವರಿಗೆ ರಾಷ್ಟ್ರೀಯ ಯುವ ಪ್ರಶಸ್ತಿ (೨೦೧೦), ಸಂಗೀತ ನಾಟಕ ಅಕಾಡೆಮಿಯ ಉಸ್ತಾದ್ ಬಿಸ್ಮಿಲ್ಲಾ ಖಾನ್ ಯುವ ಪುರಸ್ಕಾರ (೨೦೧೧), ಯಶ್ ಭಾರತಿ ಪ್ರಶಸ್ತಿ, ಉತ್ತರ ಪ್ರದೇಶ ಸರ್ಕಾರದ ಅತ್ಯುನ್ನತ ಪ್ರಶಸ್ತಿ ೨೦೧೫ ಮತ್ತು ಹಲವಾರು ಇತರ ಪ್ರಾದೇಶಿಕ ಮತ್ತು ರಾಷ್ಟ್ರೀಯ ಮಟ್ಟದ ಪ್ರಶಸ್ತಿಗಳು ದೊರಕಿವೆ.

ಆರಂಭಿಕ ಜೀವನ

ಗೀತಾಂಜಲಿ ಅವರು ೩ ಸೆಪ್ಟೆಂಬರ್ ೧೯೮೪ ರಂದು ಉತ್ತರ ಪ್ರದೇಶದ ಮಥುರಾದಲ್ಲಿ, ನಿರ್ಮಲ್ ಆಚಾರ್ಯ ಮತ್ತು ಡಾ ಪಿಆರ್ ಶರ್ಮಾ ದಂಪತಿಗೆ ಜನಿಸಿದರು. ಗೋವರ್ಧನದಲ್ಲಿರುವ ಸರಸ್ವತಿ ವಿದ್ಯಾ ಮಂದಿರದಿಂದ ಪ್ರಾಥಮಿಕ ಶಿಕ್ಷಣ ಪಡೆದರು. ಅವರ ಕುಟುಂಬದಿಂದ ಯಾರೂ ಕಲಾ ಹಿನ್ನೆಲೆಯನ್ನು ಹೊಂದಿರಲಿಲ್ಲ. ಅವರಿಗೆ ಕುಟುಂಬದಿಂದ ಹೆಚ್ಚಿನ ಮಾರ್ಗದರ್ಶನ ಮತ್ತು ಬೆಂಬಲ ಸಿಗಲಿಲ್ಲ. ತಮ್ಮ ವೃತ್ತಿಜೀವನದ ಆರಂಭಿಕ ಹಂತದಲ್ಲಿ ಅವರು ಯಾವುದೇ ಔಪಚಾರಿಕ ತರಬೇತಿಯಿಲ್ಲದೆ ಶಾಲಾ ಮಟ್ಟದಲ್ಲಿ ಪ್ರದರ್ಶನ ನೀಡಲು ಪ್ರಾರಂಭಿಸಿದರು. ಅವರ ಮೊದಲ ವಿದೇಶಿ ಪ್ರದರ್ಶನ ಸಿಂಗಾಪುರದಲ್ಲಿ ನಡೆಯಿತು. ನಂತರ, ಅವರು ಚೀನಾ, ಮೆಕ್ಸಿಕೋ, ಲಂಡನ್, ಅಮೆರಿಕ ಮತ್ತು ಇತರ ಹಲವು ದೇಶಗಳಲ್ಲಿ ಪ್ರದರ್ಶನ ನೀಡಿದರು.

ವೃತ್ತಿ

ಗೀತಾಂಜಲಿ ಶರ್ಮಾ ಅವರು ತಮ್ಮ ನೃತ್ಯ ವೃತ್ತಿಜೀವನವನ್ನು ಅತ್ಯಂತ ಚಿಕ್ಕ ವಯಸ್ಸಿನಲ್ಲೇ ಪ್ರಾರಂಭಿಸಿದರು. ಸ್ಥಳೀಯ ಮತ್ತು ಪ್ರಾದೇಶಿಕ ಮಟ್ಟದಲ್ಲಿ ಪ್ರದರ್ಶನ ನೀಡುವ ಮೂಲಕ ಅವರು ಸ್ವತಃ ಬ್ರಿಜ್ ಜಾನಪದ ನೃತ್ಯಗಾರ್ತಿಯಾಗಿ ಕಾರ್ಯ ನಿರ್ವಹಿಸಿದರು. ೧೯೯೭ ರಲ್ಲಿ, ಅವರು ಬ್ರಿಜ್ ಜಾನಪದ ಮತ್ತು ಸಾಂಪ್ರದಾಯಿಕ ಕಲೆಗಳನ್ನು ಉತ್ತೇಜಿಸಲು "ಗೀತಾಂಜಲಿ ಇಂಟರ್ನ್ಯಾಷನಲ್ ಫೋಕ್ ಟ್ಯಾಂಗ್" ಎಂಬ ಅಕಾಡೆಮಿಯನ್ನು ಸ್ಥಾಪಿಸಿದರು. ೨೦೦೮ ರಲ್ಲಿ, ಅವರು ನವದೆಹಲಿಯ ಕಥಕ್ ಕೇಂದ್ರದಲ್ಲಿ ರಾಜೇಂದ್ರ ಗಂಗಣಿಯವರ ಮಾರ್ಗದರ್ಶನದಲ್ಲಿ ಕಥಕ್ ಕಲಿಯಲು ಪ್ರಾರಂಭಿಸಿದರು. ನಂತರ ಅವರು ೨೦೧೦ ರಲ್ಲಿ ಉಮಾ ಡೋಗ್ರಾ ಅವರೊಂದಿಗೆ ಸೇರಿದರು. ಅವರು ಅಲಹಾಬಾದ್‌ನ ಪ್ರಯಾಗ್ ಸಂಗೀತ ಸಮಿತಿಯಿಂದ ಪ್ರಭಾಕರ್ ಪದವಿಯನ್ನು ಪೂರ್ಣಗೊಳಿಸಿದರು. ಅವರು ಉತ್ತರ ಪ್ರದೇಶದ ಮಥುರಾದಿಂದ ತರಬೇತಿ ಪಡೆದ ಮೊದಲ ಕಥಕ್ ಕಲಾವಿದೆಯಾಗಿ ಹೊರಹೊಮ್ಮಿದರು.

ತಮ್ಮ ಅಭಿನಯದಲ್ಲಿ ರಾಧಾ ಪಾತ್ರವನ್ನು ನಿರ್ವಹಿಸಿದರು. ಶ್ರೀಕೃಷ್ಣನ ಜನ್ಮಸ್ಥಳವಾದ ಮಥುರಾ ಮತ್ತು ಶ್ರೀಕೃಷ್ಣ ತನ್ನ ಬಾಲ್ಯವನ್ನು ಕಳೆದ ಸ್ಥಳವಾದ ವೃಂದಾವನದ ಪರಂಪರೆಯನ್ನು ಅವರು ಸಂರಕ್ಷಿಸುತ್ತಿದ್ದರು. ಮಯೂರ್ ನೃತ್ಯ, ಲಾತ್ ಮಾರ್ ಹೋಳಿ, ಬರ್ಸಾನಾದ ಹೂಗಳ ಹೋಳಿ ಮತ್ತು ಉತ್ತರ ಪ್ರದೇಶದ ಬ್ರಜ್ ಪ್ರದೇಶದ ವಿಶೇಷ ನೃತ್ಯದ ಚಾರುಕಲಾ ಅವರ ರಾಸ ಲೀಲೆಯ ಪ್ರದರ್ಶನಗಳು.

ಅವರು ಹಿರಿಯ ಕಲಾವಿದರಾದ ಬಾಲಿವುಡ್ ನಟಿ ಹೇಮಾ ಮಾಲಿನಿ, ಜಾನಪದ ಗಾಯಕಿ ಮಾಲಿನಿ ಅವಸ್ತಿ, ಸಂತೂರ್ ವಾದಕ ಪಂಡಿತ್ ಶಿವಕುಮಾರ್ ಶರ್ಮಾ ಮತ್ತು ಇತರ ಅನೇಕ ಪ್ರಸಿದ್ಧ ಕಲಾವಿದರೊಂದಿಗೆ ಕಥಕ್ ಪ್ರದರ್ಶನಗಳನ್ನು ನೀಡಿದ್ದಾರೆ.

ನವೆಂಬರ್ ೨೦೧೬ ರ ಮೊದಲ ವಾರದಲ್ಲಿ, ಅವರು ಭಾರತೀಯ ವಾರಪತ್ರಿಕೆ ಪಾಂಚಜನ್ಯದ ಮುಖ್ಯಪುಟದಲ್ಲಿ ಕಾಣಿಸಿಕೊಂಡರು. ಡಿಸೆಂಬರ್ ೨೦೧೬ ರಲ್ಲಿ, ಅವರು ಉತ್ತರ ಪ್ರದೇಶದ ಬ್ರಿಜ್ ಪ್ರದೇಶದ ಅತ್ಯುನ್ನತ ಪ್ರಶಸ್ತಿಯಾದ ಬ್ರಿಜ್ ರತ್ನ ಪ್ರಶಸ್ತಿಯನ್ನು ಪಡೆದರು.

೧೮ ಡಿಸೆಂಬರ್ ೨೦೧೭ ರಂದು, ಭಾರತ ಸರ್ಕಾರವು ನಡೆಸುತ್ತಿರುವ ಅಭಿಯಾನವಾದ ಸ್ವಚ್ಛ ಭಾರತ ಅಭಿಯಾನಕ್ಕಾಗಿ ಗೀತಾಂಜಲಿ ಅವರನ್ನು ಮಥುರಾ - ವೃಂದಾವನದ ಬ್ರಾಂಡ್ ಅಂಬಾಸಿಡರ್ ಎಂದು ಘೋಷಿಸಲಾಯಿತು.

ಸಾಂಸ್ಕೃತಿಕ ಪ್ರದರ್ಶನಗಳು

ರಾಷ್ಟ್ರೀಯ

• ಖಜುರಾಹೊ ನೃತ್ಯ ಉತ್ಸವ, ತಾಜ್ ಮಹೋತ್ಸವ, ಗಂಗಾ ಮಹೋತ್ಸವ, ಪಂ. ದುರ್ಗಾಲಾಲ್ ಮಹೋತ್ಸವ,
• ರೇನ್‌ಡ್ರಾಪ್ ಫೆಸ್ಟಿವಲ್ ಮತ್ತು ಅವರ ಗುರು ಉಮಾ ಡೋಗ್ರಾ ಜೊತೆಗೆ ಅನೇಕ ಇತರ ಹಬ್ಬಗಳು.
• ಉತ್ತರ ಪ್ರದೇಶದ ಕನೌಜ್ ಮಹೋತ್ಸವ.
• ಜಿ ೨೦ ಶೃಂಗಸಭೆಯಲ್ಲಿ ಸಾಂಸ್ಕೃತಿಕ ಪ್ರದರ್ಶನ

ಅಂತರಾಷ್ಟ್ರೀಯ

• ದುಬೈ ಎಕ್ಸ್‌ಪೋ ೨೦೨೦ ನಲ್ಲಿ ಸಾಂಸ್ಕೃತಿಕ ಪ್ರದರ್ಶನ
• ಫಿಜಿಯಲ್ಲಿ ಫೆಸ್ಟಿವಲ್ ಆಫ್ ಇಂಡಿಯಾ ಸಾಂಸ್ಕೃತಿಕ ಪ್ರದರ್ಶನ