ಮರುಗ

ಮರುಗ
ಹೂ ಬಿಟ್ಟ ಮರುಗ
Scientific classification
Kingdom:	plantae
(unranked):	ಅಂಜಿಯೋಸ್ಪೆರ್ಮ್ಸ್
(unranked):	ಯೂಡಿಕೋಟ್ಸ್
(unranked):	ಆಸ್ಟೆರಿಡ್ಸ್
Order:	ಲ್ಯಾಮಿಯೇಲ್ಸ್
Family:	ಲ್ಯಾಮಿಯೇಸಿ
Genus:	ಒರಿಗಾನಮ್
Species:	ಓ. ವಲ್ಗೇರ್
Binomial name
ಒರಿಗಾನಮ್ ವಲ್ಗೇರ್ L.

ಹೂಮೊಗ್ಗುಗಳೊಂದಿಗೆ ಬೆಳೆಯುತ್ತಿರುವ ತುದಿ

ಮರುಗ ಲ್ಯಾಮಿಯೇಸಿ ಕುಟುಂಬಕ್ಕ ಸೇರಿದ ಒಂದು ಸುವಾಸನಾಯುಕ್ತ ಔಷಧೀಯ ಸಸ್ಯ. ಇದರ ವೈಜ್ಞಾನಿಕ ಹೆಸರು ಒರಿಗಾನಮ್ ವಲ್ಗೇರ್ ಎಂದು. ಪುದೀನ ಹಾಗೂ ದವನಗಳ ಹತ್ತಿರದ ಸಂಬಂಧಿ. ಇದರಿಂದ ಪಡೆಯಲ್ಪಡುವ ತೈಲ ಹಲವಾರು ರೋಗಗಳಿಗೆ ಔಷಧವಾಗಿ ಉಪಯೋಗಿಸಲ್ಪಡುತ್ತದೆ.

ವ್ಯಾಪ್ತಿ

ಇದು ಹಿಮಾಲಯದ ಸಮಶೀತೋಷ್ಣ ಪ್ರದೇಶಗಳಲ್ಲಿ, ಕಾಶ್ಮೀರದಿಂದ ಸಿಕ್ಕಿಮ್‌ವರೆಗೆ 1.500-3.600 ಮೀ ಎತ್ತರದ ಪರ್ವತಗಳಲ್ಲಿ ಬೆಳೆಯುತ್ತದೆ. ಯೂರೋಪ್, ಉತ್ತರ ಆಫ್ರಿಕ, ಉತ್ತರ ಮತ್ತು ಪಶ್ಚಿಮ ಏಷ್ಯಗಳಲ್ಲೂ ಉಂಟು. ಭಾರತದಲ್ಲಿ ಇದನ್ನು ಹೂತೋಟಗಳಲ್ಲಿ ಬೆಳೆಸುವುದಿದೆ. ಸಿಮ್ಲಾ ಮತ್ತು ಕಾಶ್ಮೀರಗಳಲ್ಲಿ ಇದನ್ನು ವ್ಯಾಪಕವಾಗಿ ಬೆಳೆಸಲಾಗುತ್ತದೆ.

ಸಸ್ಯ ವಿವರಣೆ

ಇದು ಬಹುವಾರ್ಷಿಕ ಮೂಲಿಕೆ ಸಸ್ಯ. ಇದರ ಸಾಮಾನ್ಯ ಎತ್ತರ 20-90 ಸೆಂಮೀ. ಎಲೆಗಳು ಸರಳ; 1.5 ಸೆಂಮೀ ಉದ್ದ, 0.6 ಸೆಂಮೀ ಅಗಲ ಇದ್ದು ಅಂಡಾಕಾರದವಾಗಿವೆ. ಎಲೆಯಲಗಿನ ಮೇಲೆಲ್ಲ ನವುರಾದ ರೋಮಗಳುಂಟು. ಇಡೀ ಗಿಡ, ಪ್ರಧಾನವಾಗಿ ಎಲೆಗಳು, ಸುವಾಸನಾಯುಕ್ತ. ಹೂಗಳು ಊದಾ ಇಲ್ಲವೆ ನಸುಗೆಂಪು ಬಣ್ಣದವು; ಸೀಮಾಕ್ಷಿ ಮಾದರಿಯ ಗೊಂಚಲುಗಳಲ್ಲಿ ಸಮಾವೇಶಗೊಂಡಿವೆ.

ಕೃಷಿ

ಬೀಜಗಳಿಂದ, ಕಾಂಡ ಮತ್ತು ಬೇರು ತುಂಡುಗಳಿಂದ ವೃದ್ಧಿ. ಗಿಡ ನೆಡುವ ಕಾಲ ಮೈದಾನಗಳಲ್ಲಿ ಅಕ್ಟೋಬರ್, ಬೆಟ್ಟ ಸೀಮೆಗಳಲ್ಲಿ ಮಾರ್ಚಿ-ಏಪ್ರಿಲ್.

ಉಪಯೋಗಗಳು

ಈ ಸಸ್ಯದಿಂದ ಪಡೆಯಲಾಗುವ ಪರಿಮಳಯುಕ್ತ ಚಂಚಲತೈಲ ಉದರಶೂಲೆ, ಅತಿಸಾರ ಮತ್ತು ಉನ್ಮಾದಗಳಲ್ಲಿ ಉತ್ತೇಜಕವಾಗಿ ಉಪಯುಕ್ತವೆನಿಸಿದೆ. ಸಂಧಿವಾತ ಸಂದರ್ಭಗಳಲ್ಲಿ ಇದನ್ನು ನೋವಿರುವ ಗಂಟುಗಳಿಗೆ ಹಚ್ಚುವುದುಂಟು. ಹಲ್ಲುನೋವನ್ನು ಇದು ಶಮನ ಮಾಡುವುದೆನ್ನಲಾಗಿದೆ. ಈ ತೈಲವನ್ನು ಕಿವಿನೋವಿದ್ದಾಗ ಹಾಕಿದರೆ ನೋವು ವಾಸಿಯಾಗುತ್ತದೆ. ಕೂದಲ ಬೆಳೆವಣಿಗೆಗೆ ಉತ್ತೇಜನಕಾರಿ. ಹಿತವಾದ ಪರಿಮಳದಿಂದಾಗಿ ಇದರ ಎಲೆಗಳನ್ನು ಮಲ್ಲಿಗೆ ಮುಂತಾದ ಹೂಗಳ ಮಾಲೆಯಲ್ಲಿ ಹೂಗಳ ಮಧ್ಯೆ ಇಟ್ಟು ಕಟ್ಟುವುದುಂಟು. ಕೇಶಾಲಂಕಾರಕ್ಕಾಗಿ ಕೂಡ ಉಪಯೋಗಿಸುತ್ತಾರೆ. ದೇವತಾರ್ಚನೆಗೂ ಇದು ಪವಿತ್ರ ಎಂಬ ಭಾವನೆ ಹಿಂದೂಗಳಲ್ಲಿದೆ. ಮರುಗದ ಎಲೆಗಳು ಖಾದ್ಯ ಯೋಗ್ಯ. ಇವುಗಳ ಚಟ್ನಿ ಬಲು ರುಚಿಕರ ಎಂದು ಹೆಸರಾಗಿದೆ.

ಹೊರಗಿನ ಕೊಂಡಿಗಳು

• Origanum majorana List of Chemicals in Dr. Duke's Databases
• Origanum majorana in the Plants For A Future database
• "Marjoram" . The American Cyclopædia. 1879.

ವಿಕಿಸೋರ್ಸ್ ನಲ್ಲಿ ಲಭ್ಯವಿರುವ ಲೇಖನದ ವಿಷಯವನ್ನು ಇಲ್ಲಿ ಅಳವಡಿಸಲಾಗಿದೆ:

ಮೈಸೂರು ವಿಶ್ವವಿದ್ಯಾನಿಲಯ ವಿಶ್ವಕೋಶ/ಮರುಗ