ಮಯಾಂಕ್ ಅಗರ್ವಾಲ್

ಮಯಾಂಕ್ ಅಗರ್‌ವಾಲ್

ವಯಕ್ತಿಕ ಮಾಹಿತಿ
ಪೂರ್ಣ ಹೆಸರು	ಮಯಾಂಕ್ ಅನುರಾಗ್ ಅಗರ್‌ವಾಲ್
ಹುಟ್ಟು	(1991-02-16) ೧೬ ಫೆಬ್ರವರಿ ೧೯೯೧ ಬೆಂಗಳೂರು, ಕರ್ನಾಟಕ, ಭಾರತ
ಅಡ್ಡಹೆಸರು	ಮಾಂಕ್
ಎತ್ತರ	5 ft 9 in (1.75 m)
ಬ್ಯಾಟಿಂಗ್	ಬಲಗೈ
ಬೌಲಿಂಗ್	ಬಲಗೈ ಆಫ್ ಬ್ರೇಕ್
ಪಾತ್ರ	Batter
ಅಂತಾರಾಷ್ಟ್ರೀಯ ಮಾಹಿತಿ
ರಾಷ್ಟೀಯ ತಂಡ	ಭಾರತ (೨೦೧೮-೨೦೨೨)
ಟೆಸ್ಟ್ ಚೊಚ್ಚಲ (ಕ್ಯಾಪ್ ೨೯೫)	೨೬ ಡಿಸೆಂಬರ್ ೨೦೧೮ v ಆಸ್ಟ್ರೇಲಿಯಾ
ಕೊನೆಯ ಟೆಸ್ಟ್	೧೨ ಮಾರ್ಚ್ ೨೦೨೨ v ಶ್ರೀಲಂಕಾ
ಅಂ. ಏಕದಿನ​ ಚೊಚ್ಚಲ (ಕ್ಯಾಪ್ ೨೩೦)	೫ ಫೆಬ್ರುವರಿ ೨೦೨೦ v ನ್ಯೂಜಿಲ್ಯಾಂಡ್
ಕೊನೆಯ ಅಂ. ಏಕದಿನ​	೨೯ ನವಂಬರ್ ೨೦೨೦ v ಆಸ್ಟ್ರೇಲಿಯಾ
ಅಂ. ಏಕದಿನ​ ಅಂಗಿ ನಂ.	೧೬
ದೇಶೀಯ ತಂಡದ ಮಾಹಿತಿ
ವರ್ಷಗಳು	ತಂಡ
೨೦೧೦ರಿಂದ	ಕರ್ನಾಟಕ ಕ್ರಿಕೆಟ್ ತಂಡ
೨೦೧೧-೨೦೧೩	ರಾಯಲ್ ಚಾಲೆಂಜರ್ಸ್
೨೦೧೪-೨೦೧೬	ಡೆಲ್ಲಿ ಡೇರ್‌ಡೆವಿಲ್ಸ್ (squad no. ೧೪)
೨೦೧೭	ರೈಸಿಂಗ್ ಪುಣೆ ಸೂಪರ್ ಜೈಂಟ್ಸ್
೨೦೧೮-೨೦೨೨	ಪಂಜಾಬ್ ಕಿಂಗ್ಸ್ (squad no. ೧೬)
೨೦೨೩	ಸನ್‌ರೈಸರ್ಸ್ ಹೈದರಾಬಾದ್
ವೃತ್ತಿ ಅಂಕಿಅಂಶಗಳು
ಸ್ಪರ್ಧೆ ಟೆಸ್ಟ್ ಒಡಿಐ FC LA ಪಂದ್ಯಗಳು ೧೯ ೫ ೭೨ ೮೯ ಗಳಿಸಿದ ರನ್ಗಳು ೧,೪೨೯ ೮೬ ೫,೪೭೩ ೪,೦೮೫ ಬ್ಯಾಟಿಂಗ್ ಸರಾಸರಿ ೪೩.೩೦ ೧೭.೨೦ ೪೫.೯೯ ೪೭.೫೦ ೧೦೦/೫೦ ೪/೬ ೦/೦ ೧೨/೨೯ ೧೩/೧೫ ಉನ್ನತ ಸ್ಕೋರ್ ೨೪೩ ೩೨ ೩೦೪* ೧೭೬ ಎಸೆತಗಳು – ೬ ೩೯೩ ೩೬ ವಿಕೆಟ್‌ಗಳು – ೦ ೩ ೦ ಬೌಲಿಂಗ್ ಸರಾಸರಿ – – ೮೫.೬೬ – ಐದು ವಿಕೆಟ್ ಗಳಿಕೆ – – ೦ – ಹತ್ತು ವಿಕೆಟ್ ಗಳಿಕೆ – – ೦ – ಉನ್ನತ ಬೌಲಿಂಗ್ – – ೨/೧೮ – ಹಿಡಿತಗಳು/ ಸ್ಟಂಪಿಂಗ್‌ ೧೨/– ೨/– ೪೧/– ೩೩/–
ಮೂಲ: Cricinfo, ೧೨ ಮಾರ್ಚ್ ೨೦೨೨

ಮಯಾಂಕ್ ಅನುರಾಗ್ ಅಗರ್ವಾಲ್ ಅವರು ೧೬ ಫೆಬ್ರವರಿ ೧೯೯೧ರಲ್ಲಿ ಜನಿಸಿದರು . ಇವರು ಕರ್ನಾಟಕದವರಾಗಿದ್ದು ಬಲಗೈ ಆರಂಭಿಕ ಬ್ಯಾಟ್ಸ್‌ಮನ್‌ ಆಗಿ ಆಡುವ ಭಾರತದ ಅಂತಾರಾಷ್ಟ್ರೀಯ ಕ್ರಿಕೆಟಿಗ. ಅವರು ೨೬ ಡಿಸೆಂಬರ್ ೨೦೧೮ ರಂದು ಆಸ್ಟ್ರೇಲಿಯಾ ವಿರುದ್ಧ ಭಾರತದ ಪರವಾಗಿ ಅಂತಾರಾಷ್ಟ್ರೀಯ ಪಂದ್ಯಾವಳಿಗೆ ಪಾದಾರ್ಪಣೆ ಮಾಡಿದರು.

ಆರಂಭಿಕ ವೃತ್ತಿಜೀವನ

ಅವರು ಬಿಷಪ್ ಕಾಟನ್ ಬಾಲಕರ ಶಾಲೆ ಮತ್ತು ಬೆಂಗಳೂರಿನ ಜೈನ ವಿಶ್ವವಿದ್ಯಾಲಯದ ಹಳೆಯ ವಿದ್ಯಾರ್ಥಿಯಾಗಿದ್ದಾರೆ.

೨೦೦೮-೦೯ ರಲ್ಲಿ ನಡೆದ ಅಂಡರ್ -19 ಕೂಚ್ ಬೆಹರ್ ಟ್ರೋಫಿಯಲ್ಲಿ ಅವರು ತೋರಿದ ಸಾಧನೆಗಳಿಂದ ಬೆಳಕಿಗ ಬಂದ ಇವರು, ಇದಕ್ಕೆ ಮಾನ್ಯತೆವೆಂಬಂತೆ ೨೦೧೦ ರ ಐಸಿಸಿ ಅಂಡರ್ -19 ಕ್ರಿಕೆಟ್ ವಿಶ್ವಕಪ್‌ನಲ್ಲೂ ಅವರು ಸ್ಥಾನ ಪಡೆದರು. ಈ ಪಂದ್ಯಾಕೂಟದಲ್ಲಿ ಅವರು ಭಾರತದ ಪ್ರಮುಖ ರನ್ ಗಳಿಸುವವರಾಗಿದ್ದರು. ೨೦೧೦ ರಲ್ಲಿ ಕರ್ನಾಟಕ ಪ್ರೀಮಿಯರ್ ಲೀಗ್‌ನಲ್ಲಿ ಅವರನ್ನು ಮ್ಯಾನ್ ಆಫ್ ದಿ ಸೀರೀಸ್ ಎಂದು ಆಯ್ಕೆ ಮಾಡಲಾಯಿತು. ಆ ಪಂದ್ಯಾವಳಿಯಲ್ಲಿ ಅವರು ಒಂದು ಶತಕವನ್ನೂ ಗಳಿಸಿದ್ದರು.

ದೇಶೀಯ ಕ್ರಿಕೆಟ್

ನವೆಂಬರ್ ೨೦೧೭ ರಲ್ಲಿ, ಅವರು ಪ್ರಥಮ ದರ್ಜೆ ಕ್ರಿಕೆಟ್‌ನ ತಮ್ಮ ಚೊಚ್ಚಲ ತ್ರಿಶತಕವನ್ನು ಗಳಿಸಿದರು. ಅವರು ೨೦೧೭-೧೮ ರಣಜಿ ಟ್ರೋಫಿಯಲ್ಲಿ ಮಹಾರಾಷ್ಟ್ರದ ವಿರುದ್ಧ ಕರ್ನಾಟಕದ ಪರವಾಗಿ ೩೦೪* ಹೊಡೆದಿದ್ದರು. ಇದು ಭಾರತದ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ದಾಖಲಾದ ೫೦ ನೇ ತ್ರಿಶತಕವಾಗಿದೆ. ಅದೇ ತಿಂಗಳಲ್ಲಿ, ಅವರು ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ೧,೦೦೦ ರನ್ ಪೂರ್ಣಗೊಳಿಸಿದರು. ಅವರು ೨೦೧೭-೧೮ರ ರಣಜಿ ಟ್ರೋಫಿಯಲ್ಲಿ ಅತೀ ಹೆಚ್ಚು ರನ್ ಗಳಿಸಿದವರಾಗಿದ್ದು, ಪಂದ್ಯಾವಳಿಯನ್ನು ೧,೧೬೦ ರನ್‌ಗಳೊಂದಿಗೆ ಮುಗಿಸಿ ಸ್ಮರಣೀಯಗೊಳಿಸಿದರು.

೨೦೧೮ ರ ಜನವರಿಯಲ್ಲಿ ನಡೆದ ಐಪಿಎಲ್ ಹರಾಜಿನಲ್ಲಿ ಅವರನ್ನು ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡವು ಖರೀದಿಸಿತು. ಫೆಬ್ರವರಿ ೨೦೧೮ ರಲ್ಲಿ ಅವರು, ೨೦೧೭-೧೮ರ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಎಂಟು ಪಂದ್ಯಗಳಲ್ಲಿ ೭೨೩ ರನ್ ಗಳಿಸಿ ಹೆಚ್ಚು ರನ್ ಗಳಿಸಿದವರಾಗಿ ಗುರುತಿಸಲ್ಪಟ್ಟರು. ೨೦೧೭-೧೮ರ ದೇಶೀಯ ಕ್ರಿಕೆಟ್ ಋತುವಿನಲ್ಲಿ ಅವರು ಎಲ್ಲಾ ಸ್ವರೂಪಗಳಲ್ಲಿ ಒಟ್ಟು ೨,೧೪೧ ರನ್ ಗಳಿಸಿದ್ದರು. ಇದು ಭಾರತೀಯ ದೇಶೀಯ ಋತುವಿನಲ್ಲಿ ಯಾವುದೇ ಬ್ಯಾಟ್ಸ್‌ಮನ್ ಗಳಿಸಿದ ಗರಿಷ್ಠ ಮೊತ್ತವಾಗಿದೆ. ಜೂನ್ ೨೦೧೮ ರಲ್ಲಿ, ರಣಜಿ ಟ್ರೋಫಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದವರಿಗೆ ನೀಡುವ ಮಾಧವರಾವ್ ಸಿಂಧಿಯಾ ಪ್ರಶಸ್ತಿಯನ್ನು ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ನೀಡಿತು.

ಅವರು ೨೦೧೮-೧೯ರ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಕರ್ನಾಟಕದ ಪರ ಏಳು ಪಂದ್ಯಗಳಲ್ಲಿ ೨೫೧ ರನ್ ಗಳಿಸಿದ್ದಾರೆ.

ಅಂತರ್‌ರಾಷ್ಟ್ರೀಯ ಕ್ರಿಕೆಟ್ ಜೀವನ

ಸೆಪ್ಟೆಂಬರ್ ೨೦೧೮ ರಲ್ಲಿ, ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿಗಾಗಿ ಭಾರತದ ಟೆಸ್ಟ್ ತಂಡದಲ್ಲಿ ಅವರನ್ನು ಹೆಸರಿಸಲಾಯಿತು, ಆದರೆ ಅವರಿಗೆ ಆಡಲು ಅವಕಾಶ ಸಿಗಲಿಲ್ಲ. ಗಾಯದಿಂದಾಗಿ ಪೃಥ್ವಿ ಶಾ ಭಾರತ ತಂಡದಿಂದ ಹೊರಗುಳಿದ ನಂತರ, ಡಿಸೆಂಬರ್ ೨೦೧೮ ರಲ್ಲಿ, ಆಸ್ಟ್ರೇಲಿಯಾ ವಿರುದ್ಧದ ಸರಣಿಗಾಗಿ ಭಾರತದ ಟೆಸ್ಟ್ ತಂಡಕ್ಕೆ ಅವರನ್ನು ಸೇರಿಸಲಾಯಿತು. ಮೆಲ್ಬೋರ್ನ್ ಕ್ರಿಕೆಟ್ ಮೈದಾನದಲ್ಲಿ, ೨೬ ಡಿಸೆಂಬರ್ ೨೦೧೮ ರಂದು ಆಸ್ಟ್ರೇಲಿಯಾ ವಿರುದ್ಧ ಚೊಚ್ಚಲ ಅಂತರ್ರಾಷ್ಟ್ರೀಯ ಕ್ರಿಕೆಟ್ ಪಂದ್ಯವಾಡಿದ ಅವರು, ತಮ್ಮ ಮೊದಲ ಇನ್ನಿಂಗ್ಸ್‌ನಲ್ಲಿಯೇ ಎಪ್ಪತ್ತಾರು ರನ್ ಗಳಿಸಿರು. ೧೯೪೭ರಲ್ಲಿ ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ (ಎಸ್‌ಸಿಜಿ) ದತ್ತು ಫಡ್ಕರ್ ಅವರು ನಿರ್ಮಿಸಿದ ೫೧ ರನ್‌ಗಳ ದಾಖಲೆಯನ್ನು ಮೀರಿ ಆಸ್ಟ್ರೇಲಿಯಾದಲ್ಲಿ ನಡೆದ ಚೊಚ್ಚಲ ಟೆಸ್ಟ್ ಪಂದ್ಯವೊಂದರಲ್ಲಿ ಇದು ಭಾರತೀಯ ಕ್ರಿಕೆಟಿಗರ ಅತ್ಯಧಿಕ ಸ್ಕೋರ್ ಆಗಿದೆ.

ಜುಲೈ ೨೦೧೯ ರಲ್ಲಿ, ಅವರನ್ನು ೨೦೧೯ ರ ಕ್ರಿಕೆಟ್ ವಿಶ್ವಕಪ್ಗಾಗಿ ಭಾರತದ ತಂಡಕ್ಕೆ ಸೇರಿಸಲಾಯಿತು. ಗಾಯದಿಂದಾಗಿ ಟೂರ್ನಿಯ ಉಳಿದ ಭಾಗಗಳಿಂದ ಹೊರಗುಳಿದಿದ್ದ ವಿಜಯ್ ಶಂಕರ್ ಅವರ ಬದಲಿಗೆ ಇವರನ್ನು ಸೇರಿಸಲಾಗಿತ್ತು.

ಅಕ್ಟೋಬರ್ ೨೦೧೯ ರಲ್ಲಿ, ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ, ಅಗರ್ವಾಲ್ ರವರು ಅಂತರ್ರಾಷ್ಟ್ರೀಯ ಟೆಸ್ಟ್ ಕ್ರಿಕೆಟ್‌ನಲ್ಲಿ ತಮ್ಮ ಚೊಚ್ಚಲ ಶತಕವನ್ನು ಗಳಿಸಿದರು. ಟೆಸ್ಟ್ ಇನ್ನಿಂಗ್ಸ್ ಒಂದರಲ್ಲಿ ೩೭೧ ಎಸೆತಗಳಿಂದ, ೨೩ ಬೌಂಡರಿ ಮತ್ತು ೬ ಸಿಕ್ಸರ್ ಗಳೊಂದಿಗೆ ೨೧೫ ರನ್ ಗಳಿಸಿ ಔಟಾದರು. ತಮ್ಮ ಚೊಚ್ಚಲ ಶತಕವನ್ನೇ ದ್ವಿಶತಕವಾಗಿ ಪರಿವರ್ತಿಸಿದ್ದರು.

ವೈಯಕ್ತಿಕ ಜೀವನ

ಅಗರ್ವಾಲ್ ರವರು ವಿಪಶ್ಯಾನನ ಧ್ಯಾನ ತಂತ್ರವನ್ನು ಅಭ್ಯಾಸ ಮಾಡುತ್ತಾರೆ. ಅವರಿಗೆ ಇದನ್ನು ಅವರ ತಂದೆ ಅನುರಾಗ್ ಅಗರ್ವಾಲ್ ರವರು ಪರಿಚಯಿಸಿರುತ್ತಾರೆ. ಜೋಸೆಫ್ ಮರ್ಫಿ ರವರ ಪುಸ್ತಕ ದಿ ಪವರ್ ಆಫ್ ದಿ ಸಬ್‌ಕಾನ್ಷಿಯಸ್ ಮೈಂಡ್‌ನಿಂದ ಅವರು ಸ್ಫೂರ್ತಿ ಪಡೆದಿದ್ದಾರೆ ಎನ್ನಲಾಗಿದೆ.

೨೦೧೮ ರ ಜನವರಿಯಲ್ಲಿ ಅಗರ್ವಾಲ್ ರವರು ಬೆಂಗಳೂರು ಪೊಲೀಸ್ ಆಯುಕ್ತರಾದ ಪ್ರವೀಣ್ ಸೂದ್ ಅವರ ಪುತ್ರಿ ಆಶಿತಾ ಸೂದ್ ಅವರೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು ಮತ್ತು ಅದೇ ವರ್ಷ ಜೂನ್ ತಿಂಗಳಲ್ಲಿ ಅವರನ್ನು ಮದುವೆಯಾದರು.

ಬಾಹ್ಯ ಸಂಪರ್ಕಗಳು

• ಮಯಾಂಕ್ ಅಗರ್ವಾಲ್