ಸಾನಿಯಾ ಮಿರ್ಜಾ
ಸಾನಿಯಾ ಮಿರ್ಜಾ ಭಾರತದ ಶ್ರೇಷ್ಟ ವೃತ್ತಿಪರ ಟೆನ್ನಿಸ್ ಆಟಗಾರ್ತಿ. ಇದುವರೆಗೆ ಟೆನ್ನಿಸ್ ಆಟದಲ್ಲಿ ಅತಿ ಹೆಚ್ಚಿನ ಕ್ರಮಾಂಕ ಪಡೆದ ಎಕೈಕ ಭಾರತೀಯ ಮಹಿಳೆ ಸಾನಿಯಾ. ಭಾರತದ ಹೈದರಾಬಾದ್ ನಗರದ ಸಾನಿಯಾರ ಈಗಿನ ವಿಶ್ವಕ್ರಮಾಂಕ ೩೧.
ಜೀವನ[ಬದಲಾಯಿಸಿ]
ಸಾನಿಯಾ ಮಿರ್ಜಾರವರ ಜನ್ಮ ನವೆಂಬರ್ ೧೫ ೧೯೮೬ರಲ್ಲಿ ಮುಂಬೈ ನಗರದಲ್ಲಾಯಿತು. ತಂದೆಯವರಾದ ಇಮಾಂ ಮಿರ್ಜಾರವರ ಮಾರ್ಗದರ್ಶನದಲ್ಲಿ ಆರನೆ ವರ್ಷದ ಎಳೆ ವಯಸ್ಸಿನಲ್ಲಿಯೆ ಸಾನಿಯ ಟೆನ್ನಿಸ್ ತರಬೇತಿ ಆರಂಭಿಸಿದರು. ೨೦೦೩ರ ಜೂನಿಯರ್ ವಿಂಬಲ್ಡನ್ ಡಬಲ್ಸ್ ಪಂದ್ಯಾವಳಿಯನ್ನು ಗೆದ್ದ ಸಾನಿಯ, ಜೂನಿಯರ್ ವಿಂಬಲ್ಡನ್ ಮುಕ್ತ ಟೆನ್ನಿಸ್ ಪಂದ್ಯಾವಳಿ ಗೆದ್ದ ಅತ್ಯಂತ ಕಿರಿಯ ಭಾರತೀಯ ಕ್ರೀಡಾ ಪಟು ಮತ್ತು ಪ್ರಥಮ ಮಹಿಳಾ ಪಟುವಾದರು. ೨೦೦೩ರಲ್ಲಿಯೆ ತಮ್ಮ ೧೬ನೆ ವಯಸ್ಸಿನಲ್ಲಿ ಸಾನಿಯ ವೃತ್ತಿಪರ ಟೆನ್ನಿಸ್ ರಂಗಕ್ಕೆ ಪದಾರ್ಪಣೆ ಮಾಡಿದರು. ೨೦೦೫ನೆ ಆಸ್ಟ್ರೇಲಿಯಾ ಮುಕ್ತ ಟೆನ್ನಿಸ್ ಪಂದ್ಯಾವಳಿಯ ಮೂರನೆ ಸುತ್ತು ಮತ್ತು ೨೦೦೫ನೆ ಅಮೇರಿಕಾ ಮುಕ್ತ ಟೆನ್ನಿಸ್ ಪಂದ್ಯಾವಳಿಯ ನಾಲ್ಕನೆ ಸುತ್ತಿಗೆ ತಲುಪಿದ ಸಾನಿಯ ಯಾವುದೆ ಗ್ರ್ಯಾಂಡ್ಸ್ಲ್ಯಾಮ್ ಪಂದ್ಯದಲ್ಲಿ ಆ ಸುತ್ತಿನವರೆಗೆ ತಲುಪಿದ ಮೊದಲ ಹಾಗು ಎಕೈಕ ಭಾರತೀಯ ಮಹಿಳೆಯಾದರು. ೫ ಅಡಿ ೭ಇಂಚು ಎತ್ತರದ ಬಲಗೈ ಆಟಗಾರ್ತಿಯಾದ ಸಾನಿಯಾ ತಮ್ಮ ಉನ್ನತ ಸಾಧನೆಗಳಿಂದಾಗಿ ಭಾರತದೆಲ್ಲಡೆ ಅಭಿಮಾನಿಗಳನ್ನು ಹೊಂದಿದ್ದಾರೆ. ವಿಶ್ವಮಟ್ಟದಲ್ಲಿ ಇವರು ನೀಡಿರುವ ಉನ್ನತ ಪ್ರದರ್ಶನಕ್ಕಾಗಿ ಭಾರತ ಸರ್ಕಾರವು ೨೦೦೪ನೆ ವರ್ಷದ ಅರ್ಜುನ ಪ್ರಶಸ್ತಿಯನ್ನು ಇವರಿಗಿತ್ತು ಸನ್ಮಾನಿಸಿದೆ.
ಸಾಧನೆಗಳು[ಬದಲಾಯಿಸಿ]
- ೨೦೦೫ ಅಮೇರಿಕಾ ಮುಕ್ತ ಟೆನ್ನಿಸ್ ಪಂದ್ಯಾವಳಿಯ ನಾಲ್ಕನೆ ಸುತ್ತಿಗೆ ಪ್ರವೇಶಿಸಿ ಯಾವುದೆ ಗ್ರ್ಯಾಂಡ್ಸ್ಲ್ಯಾಮ್ ಪಂದ್ಯದಲ್ಲಿ ನಾಲ್ಕನೆ ಸುತ್ತು ತಲುಪಿದ ಮೊದಲ ಹಾಗು ಎಕೈಕ ಭಾರತೀಯ ಮಹಿಳೆಯಾದರು (ಮೂರನೆ ಸುತ್ತಿನಲ್ಲಿ ಫ್ರಾಂಸ್ನ ಮೆರಿಯಾನ್ ಬಾರ್ಟೋಲಿಯವರನ್ನು ೭-೬, ೬-೪ ರಿಂದ ಸೊಲಿಸಿದರು ಮತ್ತು ನಾಲ್ಕನೆ ಸುತ್ತಿನಲ್ಲಿ ರಷ್ಯಾದ ಮರಿಯಾ ಶರಪೊವಾರಿಂದ ೬-೨, ೬-೧ ರಿಂದ ಪರಭಾವಗೊಂಡರು)
- ೨೦೦೫ ಫಾರೆಸ್ಟ್ ಹಿಲ್ಸ್ ವುಮನ್ಸ್ ಕ್ಲಾಸಿಕ್ ಟೆನ್ನಿಸ್ ಪಂದ್ಯಾವಳಿಯ ಫೈನಲ್ಸ್ನ್ನು ಪ್ರವೇಶಿಸಿದರು (ಫೈನಲ್ಸ್ನಲ್ಲಿ ಚೆಕ್ ರಿಪಬ್ಲಿಕ್ನ ಲೂಸಿ ಸಫರೊವರಿಂದ ೩-೬, ೭-೫, ೬-೪ರಿಂದ ಸೋಲುಕಂಡರು )
- ೨೦೦೫ ಆಕ್ಯುರಾ ಕ್ಲಾಸಿಕ್ ಪಂದ್ಯಾವಳಿಯಲ್ಲಿ ಮೂರನೆ ಸುತ್ತಿಗೆ ಪ್ರವೇಶಿಸಿದರು. (ಎರಡನೆ ಸುತ್ತಿನಲ್ಲಿ ಎಂಟನೆ ಕ್ರಮಾಂಕದ ರಷ್ಯಾದ ನಾಡಿಯ ಪೆಟ್ರೊವರನ್ನು ೬-೨, ೬-೧ ರಿಂದ ಸೊಲಿಸಿದರು ಮತ್ತು ಮೂರನೆ ಸುತ್ತಿನಲ್ಲಿ ಜಪಾನಿನ ಅಕಿಕೊ ಮೊರಗಾಮಿಯಿಂದ ೬-೨, ೬-೧ ರಿಂದ ಪರಭಾವಗೊಂಡರು). ಎಂಟನೆ ಕ್ರಮಾಂಕದ ನಾಡಿಯ ಪೆಟ್ರೊವರನ್ನು ಸೊಲಿಸಿದ ಕಾರಣ ಮೊದಲ ಬಾರಿ ಮೇಲಿನ ೫೦ನೆ ಕ್ರಮಾಂಕದ ಆಟಗಾರ್ತಿಯರ ಪಟ್ಟಿ ಸೇರಿದರು.
- ೨೦೦೫ ದುಬೈ ಮುಕ್ತ ಪಂದ್ಯಾವಳಿಯಲ್ಲಿ ಎರಡನೆ ಸುತ್ತಿನಲ್ಲಿ ೨೦೦೪ರ ಅಮೇರಿಕಾ ಮುಕ್ತ ಟೆನ್ನಿಸ್ ಪಂದ್ಯಾವಳಿಯ ವಿಜೇತೆಯಾದ ರಷ್ಯಾದ ಸ್ವೆತ್ಲಾನಾ ಕುಜ್ನೆಟ್ಸೊವರನ್ನು ೬-೪, ೬-೨ ರಿಂದ ಸೋಲಿಸಿ ಕ್ವಾಟರ್ ಫೈನಲ್ಸ್ ತಲುಪಿದರು (ಕ್ವಾಟರ್ ಫೈನಲ್ಸ್ನಲ್ಲಿ ಜೆಲೆನಾ ಜಾನ್ಕೊವಿಚ್ರಿಂದ ೬-೨, ೬-೨ ರಿಂದ ಸೋಲು ಕಂಡರು )
- ೨೦೦೫ ಹೈದರಾಬಾದ್ ಮುಕ್ತ ಟೆನ್ನಿಸ್ ಪಂದ್ಯಾವಳಿಯಲ್ಲಿ ಉಕ್ರೇನ್ ದೇಶದ ಅಲ್ಯೋನಾ ಬೊಂಡರೆಂಕೊರವರನ್ನು ೬-೪, ೫-೭, ೬-೩ ರಿಂದ ಫೈನಲ್ಸ್ನಲ್ಲಿ ಸೋಲಿಸಿ ಡಬ್ಲ್ಯುಟಿಎ ಪಂದ್ಯಾವಳಿಯನ್ನು ಗೆದ್ದ ಮೊದಲ ಭಾರತೀಯ ಆಟಗಾರ್ತಿಯೆಂಬ ಹೆಗ್ಗಳಿಕೆಗೆ ಪಾತ್ರರಾದರು.
- ೨೦೦೫ ಆಸ್ಟೇಲಿಯಾ ಮುಕ್ತ ಟೆನ್ನಿಸ್ ಪಂದ್ಯಾವಳಿಯ ಮೂರನೆ ಸುತ್ತಿಗೆ ಪ್ರವೇಶಿಸಿ ಯಾವುದೆ ಗ್ರ್ಯಾಂಡ್ಸ್ಲ್ಯಾಮ್ ಪಂದ್ಯದಲ್ಲಿ ಮೂರನೆ ಸುತ್ತು ತಲುಪಿದ ಮೊದಲ ಹಾಗು ಎಕೈಕ ಭಾರತೀಯ ಮಹಿಳೆಯಾದರು (ಮೂರನೆ ಸುತ್ತಿನಲ್ಲಿ ಅಮೇರಿಕಾದ ಸರೀನಾ ವಿಲಿಯಮ್ಸ್ರಿಂದ ೬-೨, ೬-೧ ರಿಂದ ಪರಭಾವಗೊಂಡರು)
- ೨೦೦೪ ಹೈದರಾಬಾದ್ ಮುಕ್ತ ಡಬಲ್ಸ್ ಪಂದ್ಯಾವಳಿಯನ್ನು ಲೈಜೆಲ್ ಹ್ಯುಬೆರ್ ಜೊತೆ ಸೇರಿ ಗೆದ್ದು ಭಾರತದ ಅತ್ಯಂತ ಕಿರಿಯ ಡಬ್ಲ್ಯುಟಿಎ ಅಥವಾ ಎಟಿಪಿ ಟೂರ್ ಪಂದ್ಯಾವಳಿ ವಿಜೇತೆಯಾದರು ಮತ್ತು ಡಬ್ಲ್ಯುಟಿಎ ಟೂರ್ ಪಂದ್ಯಾವಳಿ ಗೆದ್ದ ಪ್ರಥಮ ಮಹಿಳೆಯಾದರು.
- ೨೦೦೩ ಜೂನಿಯರ್ ವಿಂಬಲ್ಡನ್ ಡಬಲ್ಸ್ ಪಂದ್ಯಾವಳಿಯನ್ನು ಅಲೀಸಾ ಕ್ಲೇಯ್ಬಾನೊವ ಜೊತೆಯಲ್ಲಿ ಗೆದ್ದು ಜೂನಿಯರ್ ವಿಂಬಲ್ಡನ್ ಮುಕ್ತ ಟೆನ್ನಿಸ್ ಪಂದ್ಯಾವಳಿ ಗೆದ್ದ ಅತ್ಯಂತ ಕಿರಿಯ ಭಾರತೀಯ ಆಟಗಾರ್ತಿ ಮತ್ತು ಪ್ರಥಮ ಮಹಿಳಾ ಪಟುವಾದರು
ವಿವಾದ[ಬದಲಾಯಿಸಿ]
ಸಾನಿಯ ೨೦೦೫ರ ನವೆಂಬರ್ನಲ್ಲಿ ಸುರಕ್ಷಿತ ವಿವಾಹ ಪೂರ್ವ ಲೈಂಗಿಕ ಸಂಬಂಧದ ಬಗ್ಗೆ ಕೊಟ್ಟ ಹೇಳಿಕೆ ವಿವಾದವನ್ನು ಮಾಡಿತು. ಹಲವಾರು ಕಡೆ ಆಕೆಯ ಹೇಳಿಕೆಯ ತೀವ್ರ ಖಂಡನೆ ನೆಡಯಿತು ಮತ್ತು ಕೆಲವು ಕಡೆ ಆಕೆಯ ಪ್ರತಿಕ್ಕೃತಿ ದಹನ ಕೂಡ ನೆಡಯಿತು. ತಾನು ವಿವಾಹ ಪೂರ್ವ ಲೈಂಗಿಕ ಸಂಬಂಧವನ್ನು ಪುರಸ್ಕರಿಸಿಲ್ಲ ಎಂದು ಸಾನಿಯ ಮತ್ತೊಂದು ಹೇಳಿಕೆಯನ್ನು ನೀಡಿದರೂ ಕೂಡ ವಿವಾದ ಅವರ ಬೆನ್ನು ಬಿಡಲಿಲ್ಲ. ಹಲವಾರು ಮುಸಲ್ಮಾನ ಸಂಪ್ರದಾಯವಾದಿಗಳು ಸಾನಿಯ ಟೆನ್ನಿಸ್ ಆಡುವಾಗ ಧರಿಸುವ ಪೋಷಾಕಿನ ಬಗ್ಗೆ ಕೂಡ ಆಕ್ಷೇಪವೆತ್ತಿದ್ದಾರೆ. ಆದರೆ ವಿಚಾರವಾದಿಗಳು ಆಕೆಯನ್ನು ಎರಡು ವಿಚಾರದಲ್ಲಿ ಸಮರ್ಥಿಸಿದರು.
