ಅನುಷ್ಕಾ ಶಂಕರ್

ಅನುಷ್ಕಾ ಶಂಕರ್
೨೦೧೬ರ ರುಡೋಲ್ಸ್ಟಾಟ್ ಹಬ್ಬದಲ್ಲಿ ಅನುಷ್ಕಾ ಶಂಕರ್
ಜನನ	ಜೂನ್ ೯, ೧೯೮೧ ಲಂಡನ್
ವೃತ್ತಿ(ಗಳು)	ಸಂಗೀತಗಾರರು, ಸಂಗೀತ ಸಂಯೋಜಕರು
ಸಕ್ರಿಯ ವರ್ಷಗಳು	೧೯೯೫ - ಪ್ರಸ್ತುತ
ಜಾಲತಾಣ	anoushkashankar.com

ಅನುಷ್ಕಾ ಶಂಕರ್ರವರು (ಜನನ: ೦೯ ಜೂನ್, ೧೯೮೧) ಒಬ್ಬ ಬ್ರಿಟಿಷ್–ಭಾರತೀಯ ಸಿತಾರ್ ವಾದಕರು ಮತ್ತು ಸಂಯೋಜಕರಾಗಿದ್ದಾರೆ. ಅವರು ಭಾರತದ ಸುಪ್ರಸಿದ್ಧ ಸಿತಾರ್ ವಾದಕರಾಗಿದ್ದ ದಿ. ಪಂಡಿತ್ ರವಿಶಂಕರ್ರವರ ಪುತ್ರಿಯಾಗಿದ್ದಾರೆ.

ಆರಂಭಿಕ ಜೀವನ

ಸುಕನ್ಯಾ ಶಂಕರ್ ಮತ್ತು ಪಂ. ರವಿ ಶಂಕರ್ ರವರಿಗೆ ಲಂಡನ್ನಿನಲ್ಲಿ ಜನಿಸಿದ ಅನುಷ್ಕಾರವರು ತಮ್ಮ ಬಾಲ್ಯವನ್ನು ಲಂಡನ್ ಮತ್ತು ದೆಹಲಿಯಲ್ಲಿ ಕಳೆದಿದ್ದಾರೆ. ಅವರು ಕ್ಯಾಲಿಫೊರ್ನಿಯದ ಎನ್ಸಿನಿಟಾಸ್ ಪಟ್ಟಣದ ಸ್ಯಾನ್ ಡಿಯಗ್ವಿಟೋಸ್ ಹೈಸ್ಕೂಲ್ ಅಕಾಡೆಮಿಯಲ್ಲಿ ಓದಿದ್ದಾರೆ. ಅನುಷ್ಕಾರವರು ಮುಂದೆ ಕಾಲೇಜು ಅಧ್ಯಯನದ ಬದಲಾಗಿ ಸಂಗೀತದಲ್ಲಿ ವೃತ್ತಿಜೀವನವನ್ನು ಮುಂದುವರಿಸಲು ನಿರ್ಧರಿಸಿದರು.

ವೃತ್ತಿಜೀವನ

ಅನುಷ್ಕಾ ಏಳು ವರ್ಷ ವಯಸ್ಸಿನಲ್ಲೇ ತಮ್ಮ ತಂದೆ ರವಿ ಅವರ ಹತ್ತಿರ ಸಿತಾರಿನಲ್ಲಿ ತರಬೇತಿ ಪಡೆಯಲು ಪ್ರಾರಂಭಿಸಿದರು. ತಮ್ಮ ತರಬೇತಿಯ ಭಾಗವಾಗಿ, ಅವರು ಹತ್ತು ವರ್ಷ ವಯಸ್ಸಿನವರಾಗಿದ್ದಾಗ ತಂಬೂರಿಯೊಂದಿಗೆ ತಮ್ಮ ತಂದೆಯ ಜೊತೆ ವೇದಿಕೆ ಹಂಚಿಕೊಳ್ಳುತಿದ್ದರು. ಅನುಷ್ಕಾರವರು ಫೆಬ್ರವರಿ ೨೭, ೧೯೯೫ರಂದು ೧೩ನೇ ವಯಸ್ಸಿನಲ್ಲಿ, ದೆಹಲಿಯ ಸಿರಿ ಕೋಟೆಯಲ್ಲಿ ತಮ್ಮ ಮೊದಲ ಸಾರ್ವಜನಿಕ ಸಿತಾರ್ ಪ್ರದರ್ಶನವನ್ನು ನೀಡಿದರು. ಅದು ಅವರ ತಂದೆಯ ೭೫ನೇ ಹುಟ್ಟುಹಬ್ಬದ ಆಚರಣೆಗೆ ಏರ್ಪಡಿಸಿದ ಕಚೇರಿಯಾಗಿತ್ತು. ಈ ಚೊಚ್ಚಲ ಏಕವ್ಯಕ್ತಿ ಪ್ರದರ್ಶನಕ್ಕಾಗಿ, ತಬಲಾ ಪರಿಣಿತ ಝಾಕೀರ್ ಹುಸೇನ್ ಅವರ ಜೊತೆಗೂಡಿದರು.

ಪ್ರಶಸ್ತಿಗಳು

• ಬ್ರಿಟಿಷ್ ಹೌಸ್ ಆಫ಼್ ಕಾಮನ್ಸ್ ಫ಼ಲಕ, ೧೯೯೮
• ವರ್ಷದ ಮಹಿಳೆ ಪ್ರಶಸ್ತಿ, ಅಂತರರಾಷ್ಟ್ರೀಯ ಮಹಿಳಾ ದಿನ, ೨೦೦೩

ವೈಯಕ್ತಿಕ ಜೀವನ

ಬ್ರಿಟಿಷ್ ನಿರ್ದೇಶಕ ಜೋ ರೈಟ್‌ರೊಂದಿಗೆ‌ ಸಂಬಂಧವನ್ನು ಪ್ರಾರಂಭಿಸಿದ ನಂತರ, ೨೦೦೯ರಲ್ಲಿ ಅವರು ಲಂಡನ್ನಿನಲ್ಲಿ ನೆಲೆಯೂರಿ ಸೆಪ್ಟೆಂಬರ್ ೨೬, ೨೦೧೦ರಂದು ಅವರಿಬ್ಬರು ವಿವಾಹವಾದರು. ಅವರ ಮೊದಲ ಪುತ್ರ ಜುಬಿನ್ ಶಂಕರ್ ರೈಟ್ ಫೆಬ್ರವರಿ 22, 2011 ರಂದು ಜನಿಸಿದರು, ನಂತರ ಎರಡನೇ ಮಗ, ಮೋಹನ್ ಶಂಕರ್ ರೈಟ್, ಫೆಬ್ರವರಿ 17, 2015 ರಂದು ಜನಿಸಿದರು.