ಬೈಕಲ್ ಸರೋವರ

ವಿಕಿಪೀಡಿಯ ಇಂದ
ಇಲ್ಲಿಗೆ ಹೋಗು: ಸಂಚರಣೆ, ಹುಡುಕು
ಬೈಕಲ್ ಸರೋವರ ಮತ್ತು ಒಖ್ಲೋನ್ ದ್ವೀಪ
ಸರೋವರದ ನಕಾಶೆ

ಬೈಕಲ್ ಸರೋವರವು ರಷ್ಯನ್ ಒಕ್ಕೂಟದ ಸೈಬೀರಿಯಾದ ದಕ್ಷಿಣ ಭಾಗದಲ್ಲಿ ಇರ್ಕುಟ್ಸ್ಕ್ ನಗರದ ಬಳಿ ಇದೆ. ಮಂಗೋಲಿಯನ್ ಭಾಷೆಯಲ್ಲಿ ಪ್ರಕೃತಿ ಎಂಬರ್ಥ ಕೊಡುವ ಬೈಗಾಲ್ ಎಂಬ ಪದದಿಂದ ಬೈಕಲ್ ಹೆಸರು ವ್ಯುತ್ಪತ್ತಿಯಾಗಿದೆ. ಇದಕ್ಕೆ "ಸೈಬೀರಿಯಾದ ನೀಲಾಕ್ಷಿ" ಎಂಬ ಇನ್ನೊಂದು ಹೆಸರೂ ಇದೆ.

೧೬೩೭ ಮೀ. ( ೫೩೭೧ ಅಡಿ) ಗಳವರೆಗೆ ಆಳವಿರುವ ಬೈಕಲ್ ಸರೋವರ ಜಗತ್ತಿನ ಅತ್ಯಂತ ಆಳದ ಸರೋವರವಾಗಿದೆ. ಅಲ್ಲದೆ ಬೈಕಲ್ ಸರೋವರವು ಪ್ರಪಂಚದಲ್ಲಿಯೇ ಅತ್ಯಂತ ಹೆಚ್ಚು ಸಿಹಿನೀರನ್ನು ಹೊಂದಿರುವ ಸರೋವರವೂ ಕೂಡ. ಇದರಲ್ಲಿರುವ ನೀರಿನ ಒಟ್ಟು ಪ್ರಮಾಣ ಸುಮಾರು ೨೩೦೦೦ ಘನ ಕಿ.ಮೀ.ಗಳಷ್ಟು. ಜಗತ್ತಿನ ಭೂಪ್ರದೇಶದಲ್ಲಿರುವ ಒಟ್ಟು ಸಿಹಿನೀರಿನಲ್ಲಿ ಸುಮಾರು ೨೦% ದಷ್ಟು ಭಾಗ ಬೈಕಲ್ ಸರೋವರದಲ್ಲಿಯೇ ಇರುವುದು. ಟಾಂಗನ್ಯೀಕ ಸರೋವರದಂತೆ ಬೈಕಲ್ ಸರೋವರ ಕೂಡ ಪ್ರಾಚೀನ ಬಿರುಕು ಕಣಿವೆಯಲ್ಲಿ ರೂಪುಗೊಂಡಿದೆ. ಬೈಕಲ್ ಸರೋವರದ ಉದ್ದ ಸುಮಾರು ೬೩೬ ಕಿ.ಮೀ. ಮತ್ತು ಅಗಲ ೮೦ ಕಿ.ಮೀ. ಇದ್ದು ವಿಸ್ತೀರ್ಣ ಸುಮಾರು ೩೧೫೦೦ ಚ.ಕಿ.ಮೀ ಗಳಷ್ಟಾಗುವುದು.

ಬೈಕಲ್ ಸರೋವರವು ೧೫೦೦ಕ್ಕೂ ಹೆಚ್ಚಿನ ಪ್ರಾಣಿ ಪ್ರಭೇದಗಳಿಗೆ ನೆಲೆಯಾಗಿದೆ. ಜಗತ್ತಿನ ಏಕೈಕ ಸಿಹಿನೀರಿನ ಸೀಲ್ ಇಲ್ಲಿ ಮಾತ್ರ ಕಂಡು ಬರುವುದು. ಬೈಕಲ್ ಸರೋವರವನ್ನು ೧೯೯೬ರಲ್ಲಿ ಯುನೆಸ್ಕೋ ವಿಶ್ವ ಪರಂಪರೆಯ ತಾಣವೆಂದು ಘೋಷಿಸಿತು.

ಬೈಕಲ್ ಸರೋವರದಲ್ಲಿರುವ ಒಲ್ಖೋನ್ ದ್ವೀಪವು ಜಗತ್ತಿನಲ್ಲಿರುವ ಸರೋವರದೊಳಗಿನ ದ್ವೀಪಗಳಲ್ಲಿ ಎರಡನೆಯ ಅತಿ ದೊಡ್ಡದು.


ಸರೋವರದ ಇತಿಹಾಸ ಮತ್ತು ರೂಪುರೇಷೆಗಳು[ಬದಲಾಯಿಸಿ]

ಟ್ರಾನ್ಸ್-ಸೈಬೀರಿಯನ್ ರೈಲುಮಾರ್ಗದ ನಿರ್ಮಾಣವಾಗುವವರೆಗೆ ಬೈಕಲ್ ಸರೋವರದ ಬಗ್ಗೆ ಜಗತ್ತಿಗೆ ತಿಳಿದಿದ್ದು ಬಹಳ ಕಡಿಮೆ. ಈ ಮಾರ್ಗದ ಒಂದು ಅಂಗವಾಗಿ ಬೈಕಲ್ ಸರೋವರದ ಸುತ್ತ ಒಂದು ಹೆಚ್ಚುವರಿ ರೈಲುದಾರಿಯನ್ನು ಕಲ್ಪಿಸಲಾಯಿತು. ಈ ರೈಲುದಾರಿಯಲ್ಲಿ ೨೦೦ ಸೇತುವೆಗಳು ಮತ್ತು ೩೩ ಸುರಂಗಗಳಿವೆ. ಈ ರೈಲುಮಾರ್ಗದ ನಿರ್ಮಾಣದ ಸಮಯದಲ್ಲಿ ಎಫ್.ಕೆ.ಡ್ರಿಝೆಂಕೊ ನೇತೃತ್ವದಲ್ಲಿ ಜಲತಜ್ಞರ ತಂಡವೊಂದು ಬೈಕಲ್ ಸರೋವರದ ವಿವರವಾದ ಕಾಂಟೂರ್ ನಕ್ಷೆಯನ್ನು ತಯಾರಿಸಿತು. ಆಗಷ್ಟೆ ಜಗತ್ತಿಗೆ ಈ ಬೈಕಲ್ ಸರೋವರದ ಅಗಾಧತೆಯ ಅರಿವಾಯಿತು. ಬೈಕಲ್ ಸರೋವರದಲ್ಲಿರುವ ನೀರಿನ ಪ್ರಮಾಣವು ಉತ್ತರ ಅಮೆರಿಕದ ಪಂಚ ಮಹಾಸರೋವರಗಳ ಓಟ್ಟು ನೀರಿಗೆ ಸಮನಾಗಿದೆ. ಅತಿ ಪ್ರಾಚೀನವಾದ ಬೈಕಲ್ ಸರೋವರವು ವಿರಳ ಜನವಸತಿಯಿರುವ ಪ್ರಾಂತ್ಯದಲ್ಲಿರುವುದರಿಂದ ಮಾನವನು ಪ್ರಕೃತಿಯ ಮೇಲೆ ಎಸಗುವ ದುರಾಚಾರಗಳಿಂದ ದೂರವುಳಿದಿದೆ. ಈ ಕಾರಣದಿಂದಾಗಿ ಬೈಕಲ್ ಸರೋವರವು ಹಲವು ಬಗೆಯ ಅತಿ ವಿಶಿಷ್ಟ ಸಿಹಿನೀರಿನ ಜೀವಜಂತುಗಳಿಗೆ ಇನ್ನೂ ಆಶ್ರಯತಾಣವಾಗಿದ್ದು ಜೀವವಿಕಾಸ ವಿಜ್ಞಾನಕ್ಕೆ ಅಮೂಲ್ಯ ಕೊಡುಗೆಯಿತ್ತಿದೆ.

ಬೈಕಲ್ ಸರೋವರವು ಸುಮಾರು ೨೫ ರಿಂದ ೩೦ ಮಿಲಿಯನ್ ವರ್ಷಗಳಷ್ಟು ಹಳೆಯದೆಂದು ಅಂದಾಜು ಮಾಡಲಾಗಿದೆ. ಹೀಗೆ ಇದು ಪ್ರಪಂಚ ಅತಿ ಪ್ರಾಚೀನ ಜಲಸಮೂಹಗಳಲ್ಲಿ ಒಂದು. ಬೈಕಲ್ ಸರೋವರವು ಸಂಪೂರ್ಣವಾಗಿ ಪರ್ವತಗಳಿಂದ ಸುತ್ತುವರೆಯಲ್ಪಟ್ಟಿದೆ. ಸರಸ್ಸಿನ ಉತ್ತರತೀರದಲ್ಲಿರುವ ಬೈಕಲ್ ಪರ್ವತಪ್ರಾಂತ್ಯವನ್ನು ರಾಷ್ಟ್ರೀಯ ಉದ್ಯಾನವನ್ನಾಗಿಸಿ ಸಂರಕ್ಷಿಸಲಾಗಿದೆ. ಬೈಕಲ್ ಸರೋವರದಲ್ಲಿ ೨೨ ದ್ವೀಪಗಳಿವೆ. ಇವುಗಳಲ್ಲಿ ಎಲ್ಲಕ್ಕಿಂತ ದೊಡ್ಡದಾದ ಒಖ್ಲೋನ್ ದ್ವೀಪದ ಉದ್ದ ೭೨ ಕಿ.ಮೀ.

ಬೈಕಲ್ ಸರೋವರವನ್ನು ಸುಮಾರು ೩೦೦ ನದಿಗಳ ನೀರು ಬಂದು ಸೇರುತ್ತದೆ. ಇವುಗಳಲ್ಲಿ ಮುಖ್ಯವಾದ ಆರು ಇವು: ಸೆಲೆಂಗಾ, ಚಿಕೋಯ್, ಉಡಾ, ಬರ್ಗುಝಿನ್, ಅಂಗಾರಾ ಮತ್ತು ಮೇಲಿನ ಅಂಗಾರಾ ನದಿಗಳು. ಅತಿ ಆಳದ ಹೊರತಾಗಿಯೂ ಬೈಕಲ್ ಸರೋವರದ ನೀರು ಎಲ್ಲ ಕಡೆ ಉತ್ತಮಮಟ್ಟದಲ್ಲಿ ಆಮ್ಲಜನಕವನ್ನು ಹೊಂದಿದ್ದು ಜಲಜಂತುಗಳಿಗೆ ಅನುಕೂಲಕರವಾಗಿದೆ.

ಬಾಹ್ಯ ಸಂಪರ್ಕಗಳು[ಬದಲಾಯಿಸಿ]

"https://kn.wikipedia.org/w/index.php?title=ಬೈಕಲ್_ಸರೋವರ&oldid=493242" ಇಂದ ಪಡೆಯಲ್ಪಟ್ಟಿದೆ