ಎಡ್ವರ್ಡ್ ಚಾರ್ಲ್ಸ್ ಪಿಕೆರಿಂಗ್

ಎಡ್ವರ್ಡ್ ಚಾರ್ಲ್ಸ್ ಪಿಕೆರಿಂಗ್
Born	ಎಡ್ವರ್ಡ್ ಚಾರ್ಲ್ಸ್ ಪಿಕೆರಿಂಗ್ ೧೮೪೬ ಜುಲೈ ೧೯ ಅಮೇರಿಕ
Nationality	ಅಮೇರಿಕ

ಅಮೇರಿಕದ ಖಗೋಳವಿಜ್ಞಾನಿ ಮತ್ತು ಭೌತವಿಜ್ಞಾನಿಯೂ ಆಗಿದ್ದ ಎಡ್ವರ್ಡ್ ಚಾರ್ಲ್ಸ್ ಪಿಕೆರಿಂಗ್‌ರವರು ೧೮೪೬ರ ಜುಲೈ ೧೯ರಂದು ಮೆಸಾಚುಸೆಟ್ಸ್‌ನ ಬಾಸ್ಟನ್‌ನಲ್ಲಿ ಜನಿಸಿದರು. ಪಿಕೆರಿಂಗ್‌ರವರು ಕಾರ್ಲ್ ವೋಗೆಲ್‌ರವರ (೧೮೪೧-೧೯೦೭) ಜೊತೆ ಮೊದಲ ರೋಹಿತ-ಯುಗಳ ತಾರೆಗಳನ್ನು (spectroscopic binary stars) ಕಂಡುಹಿಡಿದರು. ಪಿಕೆರಿಂಗ್‌ರವರು ಹಾರ್ವರ್ಡ್ ವೀಕ್ಷಣಾಲಯದಲ್ಲಿ ನಿರ್ದೇಶಕರಾಗಿದ್ದಾಗ ಅನ್ನೀ ಜಂಪ್ ಕ್ಯಾನನ್‌ರವರೂ ಸೇರಿದಂತೆ ಅನೇಕ ಮಹಿಳೆಯರನ್ನು ಸಹಾಯಕ್ಕೆ ತೆಗೆದುಕೊಂಡಾಗ ಅವರುಗಳು ಖಗೋಳವಿಜ್ಞಾನದ ಕ್ಷೇತ್ರಕ್ಕೆ ಅಮೂಲ್ಯವಾದ ಕೊಡುಗೆಯನ್ನು ನೀಡಿದರು. ಲೆವಿಟ್‌ರವರು (೧೮೬೮-೧೯೨೧) ಸಿಫೀಡ್ ಚಂಚಲ ತಾರೆಗಳಿಗೂ (Cepheids-variable stars) ಆವರ್ತ-ಕಾಂತಿಮಾನಗಳಿಗೂ (period-luminosity) ಇರುವ ಸಂಬಂಧವನ್ನು ಕಂಡುಹಿಡಿದಿದ್ದರು. ಪಿಕೆರಿಂಗ್‌ರವರು ಅವರ ಸಂಶೋಧನೆಗಳನ್ನು ಪ್ರಕಟಿಸಿದರು. ಗಮನಾರ್ಹ ಸಂಗತಿಯೆಂದರೆ ಪ್ರಸ್ತುತ ಪಿಕೆರಿಂಗ್‌ರವರು ಮತ್ತು ಅವರ ಸಹೋದರರಾಗಿದ್ದ ಖಗೋಳವಿಜ್ಞಾನಿ ವಿಲಿಯಂ ಹೆನ್ರಿ ಪಿಕೆರಿಂಗ್‌ರವರುಗಳ (೧೮೫೮-೧೯೩೮) ಗೌರವಾರ್ಥವಾಗಿ (ಜಂಟಿಯಾಗಿ) ಚಂದ್ರನ ಮೇಲಿನ ಒಂದು ಕುಳಿಗೆ (crater) ’ಪಿಕೆರಿಂಗ್’ ಎಂಬುದಾಗಿಯೂ, ಮಂಗಳಗ್ರಹದ ಒಂದು ಕುಳಿಗೆ ’ಪಿಕೆರಿಂಗ್’ ಎಂಬುದಾಗಿಯೂ, ಒಂದು ಕ್ಷುದ್ರಗ್ರಹಕ್ಕೆ (asteroid) ’೭೮೪ ಪಿಕೆರಿಂಗಿಯಾ’ ಎಂಬುದಾಗಿಯೂ ನಾಮಕರಣ ಮಾಡಲಾಗಿದೆ. ಪಿಕೆರಿಂಗ್‌ರವರು ೧೯೧೯ರ ಫೆಬ್ರವರಿ ೩ರಂದು ಮೆಸಾಚುಸೆಟ್ಸ್‌ನ ಕೇಂಬ್ರಿಜ್‌ನಲ್ಲಿ ನಿಧನರಾದರು.