ಕನ್ನಡ ಅಕ್ಷರಮಾಲೆ
ಕನ್ನಡ ಅಕ್ಷರಮಾಲೆಯು ಬ್ರಾಹ್ಮಿ ಲಿಪಿಯಿಂದ ಬೆಳೆದು ಬಂದಿದೆ[೧]. ಇದನ್ನು ಸ್ವರಗಳು, ಅನುಸ್ವಾರ, ವಿಸರ್ಗ, ವ್ಯಂಜನಗಳು, ಅವರ್ಗೀಯ ವ್ಯಂಜನಗಳೆಂದು ವಿಭಾಗಿಸಲಾಗಿದೆ. ಕನ್ನಡ ಅಕ್ಷರಮಾಲೆಯನ್ನು ಕನ್ನಡ ವರ್ಣಮಾಲೆಯೆಂದೂ ಕರೆಯಲಾಗುತ್ತದೆ.
ಪರಿವಿಡಿ |
[ಬದಲಾಯಿಸಿ] ಅಕ್ಷರಮಾಲೆ
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| ಕನ್ನಡ ಅಕ್ಷರಮಾಲೆ |
|---|
| ಅ ಆ ಇ ಈ ಉ ಊ ಋ ಎ ಏ ಐ ಒ ಓ ಔ ಅ೦ ಅಃ |
| ಕ ಖ ಗ ಘ ಙ |
| ಚ ಛ ಜ ಝ ಞ |
| ಟ ಠ ಡ ಢ ಣ |
| ತ ಥ ದ ಧ ನ |
| ಪ ಫ ಬ ಭ ಮ |
| ಯ ರ ಱ ಲ ವ ಶ ಷ ಸ ಹ ಳ ೞ |
- ೠ ಸ್ವರವನ್ನು ಕನ್ನಡ ವರ್ಣಮಾಲೆಯಿಂದ ೧೯೯೦ ರಲ್ಲಿ ಬಿಡಲಾಯಿತು.
- ಹಳೆಗನ್ನಡದ ಮೂರು ಅಕ್ಷರಗಳಾದ ಱ, ೞ ಮತ್ತು
(ನ್, ಇದಕ್ಕೆ ಯೂನಿಕೋಡ್ ಇಲ್ಲ) ಇವನ್ನು ಇಂದು ಹೆಚ್ಚಾಗಿ ಬಳಸುತ್ತಿಲ್ಲವಾದರೂ ಹಳೆಗನ್ನಡವನ್ನು ಓದಲು ಇವನ್ನು ತಿಳಿದಿರಬೇಕು. - ಇಂಗ್ಲಿಷ್ನ F ಮತ್ತು Z ಅಕ್ಷರಗಳಿಗೆ ಫ಼ ಮತ್ತು ಜ಼ ಹೊಸ ಅಕ್ಷರಗಳು ಉಪಯೋಗಕ್ಕೆ ಬಂದಿವೆ. [೨]
| ಅಕ್ಷರ | ಗಣನೆ | ವಿವರಣೆ |
|---|---|---|
| ಸ್ವರ | ೧೩ | ಅ - ಔ |
| ಅನುಸ್ವಾರ, ವಿಸರ್ಗ | ೨ | ಂ ಮತ್ತು ಃ |
| ವ್ಯಂಜನ | ೨೫ | ಕಚಟತಪ-ವರ್ಗಗಳು |
| ಅವರ್ಗೀಯ ವ್ಯಂಜನಗಳು | ೧೧ | ಯ-ೞ |
| ಹೊಸ ಸೇರ್ಪಡೆ | ೨ | ಫ಼ ಮತ್ತು ಜ಼ |
| ಕೈಬಿಟ್ಟ ಅಕ್ಷರಗಳು | ೧ | ೠ |
ಈ ರೀತಿ ಕನ್ನಡದಲ್ಲಿ ೫೩ ಅಕ್ಷರಗಳಿವೆ(ೠ ಬಿಟ್ಟು ಮತ್ತು ಫ಼, ಜ಼ ಸೇರಿ).[೩]
[ಬದಲಾಯಿಸಿ] ಸ್ವರಗಳು
ಅವನ್ನು "ಅ ಆ ಇ ಈ ಉ ಊ ಋ ೠ ಎ ಏ ಐ ಒ ಓ ಔ" ಹೀಗೆ 'ಅ'ಯಿಂದ ಮೊದಲು ಮಾಡಿ, 'ಔ'ಯಿಂದ ಕೊನೆ ಮಾಡಿ, ಹೀಗೆ ಬರೆಯುವುದು ಸಂಸ್ಕೃತ ವ್ಯಾಕರಣದ ಅನುಕರಣೆ. ಸಂಸ್ಕೃತದಲ್ಲಿ ಈ ಬಗೆಯಲ್ಲಿ ಬರೆಯಲು ಕಾರಣ ಅದರ ಮಾಹೇಶ್ವರ ಸೂತ್ರ ಮತ್ತು ಸಂಧಿನಿಯಮಗಳು. ಆದರೆ ಹೀಗೆ ಬರೆಯುವುದರಿಂದ ಕನ್ನಡದ ಸಂಧಿನಿಯಮಗಳನ್ನು ಅರಿಯಲು ಯಾವ ಅನುಕೂಲವೂ ಆಗುವುದಿಲ್ಲ.
"ಇ ಈ ಎ ಏ ಉ ಊ ಒ ಓ ಅ ಆ" ಎಂದು ಇನ್ನೊಂದು ಬಗೆಯಲ್ಲಿಯೂ ಬರೆಯುವುದುಂಟು. ಇಲ್ಲಿ ಸ್ವರಗಳನ್ನು ನಾಲಗೆಯ ತುದಿಯಿಂದ ಕೊನೆಯ ತನಕ ಅವುಗಳು ಹೊರಡುವ ನಾಲಗೆಯ ಭಾಗಕ್ಕೆ ಅನುಕ್ರಮವಾಗಿ ಬರೆಯಲಾಗಿದೆ. ಅಂದರೆ "ಇ ಈ" ನಾಲಗೆಯ ತುತ್ತುದಿಯಿಂದ ಉಲಿದರೆ, "ಅ ಆ" ನಾಲಗೆಯ ಕಟ್ಟಕಡೆಯಲ್ಲಿ ಹೊರಡುವುದು. ೠ, ಱ, ೞಗಳನ್ನು ಬಿಟ್ಟಮಾತ್ರಕ್ಕೆ ಆ ಅಕ್ಷರಗಳು ಕನ್ನಡದಲ್ಲಿ ಇಲ್ಲ ಅಥವಾ ಜನರಿಗೆ ಉಚ್ಚರಿಸಲಾಗದೆಂದು ಹೇೞಲಾಗದು. ಸ್ವರಗಳಲ್ಲಿ ಎರಡು ವಿಧ. ಹ್ರಸ್ವಸ್ವರ/ಗಿಡ್ಡಸ್ವರ ಮತ್ತು ದೀರ್ಘಸ್ವರ/ಉದ್ದಸ್ವರ.
ಹ್ರಸ್ವಸ್ವರ: ಹ್ರಸ್ವ ಅಂದರೆ ಚಿಕ್ಕದು, ಗಿಡ್ದದ್ದು ಎಂದು. ಒಂದು ಹ್ರಸ್ವಸ್ವರವನ್ನು ಉಲಿಯಲು (ಉಚ್ಚಾರ ಮಾಡಲು) ಬರಿ ಒಂದು ಮಾತ್ರೆಯಷ್ಟು( ಒಂದು ಸರತಿ ಕಣ್ಣು ಮಿಟುಕುವಷ್ಟು/ಎವೆಯಿಕ್ಕುವಷ್ಟು ) ಹೊತ್ತು ಬೇಕಾಗುವುದು.
ಹ್ರಸ್ವಸ್ವರಗಳು : ಅ ಇ ಉ ಋ ಎ ಒ
ದೀರ್ಘಸ್ವರ: ದೀರ್ಘ ಅಂದರೆ ಉದ್ದದ್ದು ಎಂದು. ಒಂದು ದೀರ್ಘ ಸ್ವರವನ್ನು ಉಲಿಯಲು ಎರಡು ಮಾತ್ರೆಯಷ್ಟು( ಎರಡು ಸರತಿ ಕಣ್ಣು ಮಿಟುಕುವಷ್ಟು/ಎವೆಯಿಕ್ಕುವಷ್ಟು ) ಹೊತ್ತು ಬೇಕಾಗುವುದು.
ದೀರ್ಘ ಸ್ವರಗಳು : ಆ ಈ ಊ ೠ ಏ ಐ ಓ ಔ
ಗಮನಿಸಿರಿ:
೧. 'ಐ' ಅನ್ನು 'ಅಯ್' ಮತ್ತು 'ಔ' ಅನ್ನು 'ಅವ್' ಎಂದು ಉಲಿಯುವುದರಿಂದ 'ಐ' ಮತ್ತು 'ಔ' ಗಳು ಕನ್ನಡದಲ್ಲಿ ಇಲ್ಲದಿದ್ದರೂ ನಡೆಯುವುದೆಂದು ಕೆಲವರ ವಾದ. ಅವರಂತೆ ಕನ್ನಡಕ್ಕೆ "ಋ ೠ ಐ ಔ" ಈ ನಾಲ್ಕು ಸ್ವರಗಳು ಕನ್ನಡದ ಅಕ್ಕರಮಾಲೆಯಲ್ಲಿ ಸಂಸ್ಕೃತ ನೆರಳಿನಿಂದ ಬಂದಿವೆ.
೨. ಇದಲ್ಲದೆ ಮೂರು ಇಲ್ಲವೆ ಅದಕ್ಕಿಂತ ಹೆಚ್ಚು ಮಾತ್ರೆಗಳ ಹೊತ್ತು ಉಲಿಯುವ ಸ್ವರಕ್ಕೆ "ಪ್ಲುತಸ್ವರ" ಎಂದು ಹೆಸರು.
[ಬದಲಾಯಿಸಿ] ಯೋಗವಾಹಕಗಳು
ಸ್ವತಂತ್ರವಾಗಿ ಪ್ರಯೋಗಿಸಲಾಗದೆ, ಯಾವುದಾದರು ಸ್ವರದೊಂದಿಗೆ ಮಾತ್ರ ಪ್ರಯೋಗ ಮಾಡಬಹುದಾದ ಅಕ್ಷರಗಳು. ಕನ್ನಡ ವರ್ಣಮಾಲೆಯಲ್ಲಿ ಎರಡು ಯೋಗವಾಹಕಗಳಿದ್ದಾವೆ.
ಅನುಸ್ವಾರ (ಂ) ಮತ್ತು ವಿಸರ್ಗ (ಃ)
ವಿವಿಧ ಸ್ವರಗಳೊಡನೆ ಅನುಸ್ವಾರ: ಅಂಜೂರ, ಆಂಧ್ರಪ್ರದೇಶ, ಇಂಚರ, ಉಂಗುರ, ಎಂಬತ್ತು, ಒಂಟೆ, ಓಂಕಾರ ಕನ್ನಡದಲ್ಲಿ ಪದದ ನಡುವಿನಲ್ಲಿ ಬರುವ ಅನುನಾಸಿಕ ವ್ಯಂಜನಗಳ ಅರ್ಧಾಕ್ಷರ( ನ್, ಮ್ ಮುಂತಾದವು) ಬದಲು ಅನುಸ್ವರವನ್ನು ಬಳಸುವುದುಂಟು. ಉದಾ: ಅಙ್ಕ = ಅಂಕ ( ಇದನ್ನು ಅಮ್ಕ ಎಂದು ಉಲಿಯಬಾರದು ) ಅಞ್ಚೆ = ಅಂಚೆ ತಙ್ಗಿ = ತಂಗಿ ಗಣ್ಟೆ = ಗಂಟೆ ಅನ್ದ = ಅಂದ ಅಮ್ಬ = ಅಂಬ
ವಿವಿಧ ಸ್ವರಗಳೊಡನೆ ವಿಸರ್ಗ: ಅಂತಃಕರಣ, ದುಃಖ
ಅಚ್ಚ-ಕನ್ನಡ (ಹೊರನುಡಿಗಳ ಪದಗಳನ್ನು ಬಿಟ್ಟ ಕನ್ನಡ) ದಲ್ಲಿ ವಿಸರ್ಗವಿರುವ ಪದವಿಲ್ಲ.
[ಬದಲಾಯಿಸಿ] ವ್ಯಂಜನಗಳು
ವ್ಯಂಜನಗಳಲ್ಲಿ ಎರಡು ವಿಧ. ವರ್ಗೀಯ ವ್ಯಂಜನ ಮತ್ತು ಅವರ್ಗೀಯ ವ್ಯಂಜನ.
'ಕ' ಅಕ್ಷರದಿಂದ 'ಮ' ಅಕ್ಷರದವರೆಗೆ ವರ್ಗೀಯ ವ್ಯಂಜನಗಳು. ಇದರಲ್ಲಿ ಐದು ವರ್ಗಗಳು. ಕ ವರ್ಗ, ಚ ವರ್ಗ, ಟ ವರ್ಗ, ತ ವರ್ಗ ಮತ್ತು ಪ ವರ್ಗ.
'ಯ' ಅಕ್ಷರದಿಂದ 'ಳ' ಅಕ್ಷರದವರೆಗೆ ಅವರ್ಗೀಯ ವ್ಯಂಜನಗಳು.
