ಶ್ರೇಢಿಗಳು (ಗಣಿತ)

ಗಣಿತಶಾಸ್ತ್ರದಲ್ಲಿ, ನಿರ್ದಿಷ್ಟ ನಿಯಮಕ್ಕನುಸಾರವಾದ ಸಂಖ್ಯೆಗಳ ಒಂದು ಕ್ರಮಬದ್ಧವಾದ ಜೋಡಣೆಯನ್ನು ಶ್ರೇಢಿ ಎಂದು ಕರೆಯುತ್ತಾರೆ. ಶ್ರೇಢಿಯಲ್ಲಿನ ಪ್ರತಿ ಸಂಖ್ಯೆಯನ್ನು ಶ್ರೇಢಿಪದ ಎಂದು ಕರೆಯಲಾಗುತ್ತದೆ.

$2,6,10,14,...$

ಈ ಶ್ರೇಢಿಯಲ್ಲಿ ಸಂಖ್ಯೆ 2 ಮೊದಲನೇ ಶ್ರೇಢಿಪದ, 6 ಎರಡನೇ ಶ್ರೇಢಿಪದ, 10 ಮೂರನೆಯದು. ಒಂದು ಶ್ರೇಢಿಯಲ್ಲಿ ಪ್ರತೀ ಪದವನ್ನೂ ಒಂದೊಂದು ಚಿಹ್ನೆಯ ಮೂಲಕ ಸೂಚಿಸಲಾಗುತ್ತದೆ. ಉದಾಹರಣೆಗೆ, ಮೇಲಿನ ಶ್ರೇಢಿಯಿಂದ:

ಪದ	ಮೊದಲನೇ	ಎರಡನೇ	ಮೂರನೇ	ನಾಲ್ಕನೇ	nನೇ
ಚಿಹ್ನೆ	$T_{1}$	$T_{2}$	$T_{3}$	$T_{4}$	$T_{n}$

ಇಲ್ಲಿ $n$ ಶ್ರೇಢಿಯಲ್ಲಿನ ಪದದ ಸ್ಥಾನವನ್ನು ಸೂಚಿಸುತ್ತದೆ.

ಪರಿಮಿತ ಮತ್ತು ಅಪರಿಮಿತ ಶ್ರೇಢಿಗಳು

ಪರಿಮಿತ ಸಂಖ್ಯೆಯ ಪದಗಳನ್ನು ಹೊಂದಿರುವ ಶ್ರೇಢಿಯನ್ನು ಪರಿಮಿತ ಶ್ರೇಢಿ ಎಂದು ಕರೆಯುತ್ತಾರೆ. ಪರಿಮಿತ ಶ್ರೇಢಿಯ ಸಾಮಾನ್ಯ ರೂಪ: $T_{1},T_{2},T_{3},...T_{n}$

ಉದಾಹರಣೆಗೆ:

$1,3,5,7,9,11,13,15$

$S=\{x:(2x+1),1\leq x\leq 15\}$

ಅಪರಿಮಿತ ಸಂಖ್ಯೆಯ ಪದಗಳನ್ನು ಹೊಂದಿರುವ ಶ್ರೇಢಿಯನ್ನು ಅಪರಿಮಿತ ಶ್ರೇಢಿ ಎಂದು ಕರೆಯುತ್ತಾರೆ. ಅಪರಿಮಿತ ಶ್ರೇಢಿಯ ಸಾಮಾನ್ಯ ರೂಪ: $T_{1},T_{2},T_{3},...$ ಉದಾಹರಣೆಗೆ,

$2,4,6,8,10,...$

$S=\{x:2x,x>0\}$

ಸಮಾಂತರ ಶ್ರೇಢಿ

ಸಮಾಂತರ ಶ್ರೇಢಿಯಲ್ಲಿ ಪ್ರತಿ ಪದವನ್ನು (ಮೊದಲನೇ ಪದವನ್ನು ಹೊರತುಪಡಿಸಿ) ಅದರ ಹಿಂದಿನ ಪದಕ್ಕೆ ಒಂದು ನಿರ್ದಿಷ್ಟ ಸಂಖ್ಯೆಯನ್ನು ಕೂಡುವುದರಿಂದ ಪಡೆಯಲಾಗುತ್ತದೆ. ಸಮಾಂತರ ಶ್ರೇಢಿಯನ್ನು A.P. (Arithmetic Progression) ಎಂದು ಸೂಚಿಸಲಾಗುತ್ತದೆ.

ಶ್ರೇಢಿ	$T_{2}-T_{1}$	$T_{3}-T_{2}$	$T_{4}-T_{3}$
5, 8, 11, 14, ...	3	3	3
3, 13, 23, 33, ...	10	10	10
1, -1, -3, -5, ...	-2	-2	-2
1, 1.5, 2, 2.5, ...	0.5	0.5	0.5

ಸಮಾಂತರ ಶ್ರೇಢಿಗಳಲ್ಲಿ ಯಾವುದೇ ಪದ ಮತ್ತದರ ಹಿಂದಿನ ಪದದ ನಡುವಿನ ವ್ಯತ್ಯಾಸವು ಸ್ಥಿರವಾಗಿರುತ್ತದೆ. ಈ ವ್ಯತ್ಯಾಸವನ್ನು ಸಾಮಾನ್ಯ ವ್ಯತ್ಯಾಸ ಅಥವಾ ಸ್ಥಿರಾಂಕ (Common Difference, C.D) ಎಂದು ಕರೆಯುತ್ತಾರೆ. ಸಾಮಾನ್ಯವಾಗಿ ಇದನ್ನು $d$ ಇಂದ ಸೂಚಿಸುತ್ತಾರೆ.

$T_{1},T_{2},T_{3},T_{4},...$

$d=T_{2}-T_{1}=T_{3}-T_{2}=T_{4}-T_{3}...$

ಒಂದು ಸಮಾಂತರ ಶ್ರೇಢಿಯಲ್ಲಿ ಸಾಮಾನ್ಯ ವ್ಯತ್ಯಾಸವು ಧನಸಂಖ್ಯೆ, ಋಣಸಂಖ್ಯೆ ಅಥವಾ ಸೊನ್ನೆಯಾಗಿರಬಹುದು. ಸ್ಥಿರಾಂಕವು ಸೊನ್ನೆಯಿದ್ದರೆ, ಅಂಥಹ ಸಮಾಂತರ ಶ್ರೇಢಿಯನ್ನು ಸ್ಥಿರ ಸಮಾಂತರ ಶ್ರೇಢಿ ಎನ್ನುತ್ತಾರೆ.

$a$ ಮೊದಲನೇ ಪದವು, $d$ ಸ್ಥಿರಾಂಕವಾದರೆ,

$T_{1}=a$

$T_{2}=T_{1}+d=a+d$

$T_{3}=T_{2}+d=(a+d)+d=a+2d$

$T_{4}=T_{3}+d=(a+2d)+d=a+3d$

ಹಾಗಾಗಿ, $a$ ಮೊದಲನೇ ಪದವಾಗಿ, $d$ ಸಾಮಾನ್ಯ ವ್ಯತ್ಯಾಸವಾಗಿರುವ ಒಂದು ಸಮಾಂತರ ಶ್ರೇಢಿಯ ಸಾಮಾನ್ಯ ರೂಪವು:

$a,(a+d),(a+2d),(a+3d),...$

ಪರಿಮಿತ ಮತ್ತು ಅಪರಿಮಿತ ಸಮಾಂತರ ಶ್ರೇಢಿಗಳು

ಪರಿಮಿತ ಸಂಖ್ಯೆಯ ಅಂಶಗಳನ್ನೊಳಗೊಂಡ ಸಮಾಂತರ ಶ್ರೇಢಿಯನ್ನು ಪರಿಮಿತ ಸಮಾಂತರ ಶ್ರೇಢಿ ಎನ್ನುತ್ತಾರೆ. ಉದಾಹರಣೆಗೆ,

$5,10,15,20,25$

$S=\{x:(3x-1),0\leq x\leq 50\}$

ಅಪರಿಮಿತ ಸಂಖ್ಯೆಯ ಅಂಶಗಳನ್ನೊಳಗೊಂಡ ಸಮಾಂತರ ಶ್ರೇಡಿಯನ್ನು ಅಪರಿಮಿತ ಸಮಾಂತರ ಶ್ರೇಢಿ ಎನ್ನುತ್ತಾರೆ. ಉದಾಹರಣೆಗೆ,

$5,10,15,20,25,...$

$S=\{x:(3x-1),0\leq x\}$

ಸಮಾಂತರ ಶ್ರೇಢಿಯಲ್ಲಿ $a$ ಮೊದಲನೇ ಪದ ಹಾಗೂ $d$ ಸಾಮಾನ್ಯ ವ್ಯತ್ಯಾಸವಾಗಿದ್ದರೆ $n$ನೇ ಪದವು $T_{n}=a+(n-1)d$ ರೂಪದಲ್ಲಿರುತ್ತದೆ. ಸಮಾಂತರ ಶ್ರೇಢಿ $5,10,15,20,25,...$ನ್ನು ಉದಾಹರಣೆಗೆ ತೆಗೆದುಕೊಂಡರೆ:

$T_{1}=a=5,d=T_{2}-T_{1}=10-5=5$

$T_{1}=5=a=a+(1-1)d$

$T_{2}=10=5+5=a+d=a+(2-1)d$

$T_{3}=15=5+5+5=a+d+d=a+(3-1)d$

$T_{4}=20=5+5+5+5=a+d+d+d=a+(4-1)d$

$\cdots$

$T_{n}=a+d+d+d...=a+(n-1)d$

$\therefore T_{n}=a+(n-1)d$