ಘಾಟಿಯಾನ ದ್ವಿವರ್ಣ

ಘಾಟಿಯಾನ ದ್ವಿವರ್ಣ ಏಡಿ

ಘಾಟಿಯಾನ ದ್ವಿವರ್ಣ ಎಂಬುದು ಸಿಹಿನೀರಿನ ಏಡಿ ಪ್ರಭೇದದ ಹೆಸರು. ಇವು ಕರ್ನಾಟಕದ ಪಶ್ಚಿಮ ಘಟ್ಟಗಳಲ್ಲಿ ಪತ್ತೆಯಾಗಿದ್ದಾಗಿವೆ. ೨೦೨೨ರ ಆಗಸ್ಟ್ ೧೫ರಂದು ಇದರ ಪತ್ತೆಯನ್ನು ಘೋಷಿಸಲಾಯಿತು. ಈ ಏಡಿಯ ದೇಹವು ಎರಡು ಬಣ್ಣಗಳನ್ನು ಹೊಂದಿರುವುದರಿಂದ ದ್ವಿ (ಎರಡು) ವರ್ಣ(ಬಣ್ಣ) ಎಂಬ ಹೆಸರನ್ನು ಇಡಲಾಗಿದೆ. ಈ ಏಡಿಯ ಮೈ ಬಿಳಿಬಣ್ಣದ್ದಾಗಿದ್ದು ಇದರ ಕಾಲುಗಳು ನೇರಳೆ ಬಣ್ಣದಲ್ಲಿರುತ್ತವೆ. ಪಶ್ಚಿಮಘಟ್ಟದ ಏಡಿ ಪ್ರಭೇದಗಳಲ್ಲಿ ಇದು ೭೫ನೆಯದ್ದಾಗಿದೆ.

ವಾಸಸ್ಥಳ ಮತ್ತು ಆಹಾರ

ಈ ಏಡಿಗಳು ಸಿಹಿನೀರಿನಲ್ಲಿ ಬಂಡೆಗಳ ಬಿರುಕುಗಳಲ್ಲಿ ವಾಸಿಸುತ್ತವೆ. ಅವು ಸಣ್ಣ ಹುಳುಗಳು ಮತ್ತು ಪಾಚಿಗಳನ್ನು ತಿನ್ನುತ್ತವೆ. ಇವು ಮಳೆಗಾಲದಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ. ಮುಸ್ಸಂಜೆ ಮತ್ತು ಮುಂಜಾವದಲ್ಲಿ ಹೆಚ್ಚು ಚಟುವಟಿಕೆಯನ್ನು ತೋರಿಸುತ್ತವೆ.

ಪತ್ತೆ ಮತ್ತು ಅಧ್ಯಯನ

ಈ ಏಡಿಯನ್ನು ಮೊಟ್ಟಮೊದಲನೆಯದಾಗಿ ನಿಸರ್ಗ ಉತ್ಸಾಹಿ ಗೋಪಾಲಕೃಷ್ಣ ಹೆಗಡೆ, ಅರಣ್ಯ ಇಲಾಖೆ ಸಿಬ್ಬಂದಿ ಪರಶುರಾಮ ಪ್ರಭು ಭಜಂತ್ರಿಯವರು ಉತ್ತರಕನ್ನಡ ಜಿಲ್ಲೆಯ ಯಲ್ಲಾಪುರದ ಬಾರೆ ಎಂಬ ಊರಿನಲ್ಲಿ ಪತ್ತೆ ಹಚ್ಚಿದರು. ಅನಂತರ ಇದರ ಪ್ರಭೇದ ವರ್ಗೀಕರಣ ಅಧ್ಯಯನವನ್ನು ಜೂಆಲಜಿಕಲ್ ಸರ್ವೆ ಆಫ್ ಇಂಡಿಯಾದ ಡಾ. ಸಮೀರ್ ಕುಮಾರ್ ಪತಿ ಮತ್ತು ಠಾಕರೆ ವೈಲ್ಡ್ ಲೈಫ್ ಫೌಂಡೇಶನ್ ತೇಜಸ್ ಠಾಕರೆಯವರು ಕರ್ನಾಟಕ ಅರಣ್ಯ ಇಲಾಖೆಯೊಂದಿಗೆ ಸೇರಿ ಮಾಡಿದರು. Brazilian Crustacean Society (BCS) ಪ್ರಕಟಿಸುವ ಅಂತಾರಾಷ್ಟ್ರೀಯ ಜರ್ನಲ್ Nauplius ನಲ್ಲಿ ಇದರ ಬಗ್ಗೆ ಸಂಶೋಧನಾ ಲೇಖನವನ್ನು ಪ್ರಕಟಿಸಲಾಯಿತು.

ಹೊರಕೊಂಡಿಗಳು

• Meet the Western Ghats’ Wonderful New Freshwater Crabs, ರಿಚಾ ಮಲ್ಹೋತ್ರಾ, ದಿ ವೈರ್
• Freshwater crab species with striking colours found in Western Ghats, ಡೌನ್ ಟು ಅರ್ಥ್