ರಾಲ್ಫ್ ಥಾಮಸ್ ಹಾಚ್‍ಕಿನ್ ಗ್ರಿಫಿತ್

ರಾಲ್ಫ್ ಥಾಮಸ್ ಹಾಚ್‍ಕಿನ್ ಗ್ರಿಫಿತ್ (1826-1906) ಸಂಸ್ಕೃತ ಹಾಗೂ ಭಾರತೀಯ ಸಂಸ್ಕೃತಿಯ ಅಧ್ಯಯನ ಅಧ್ಯಾಪನಗಳಿಗೆ ವ್ಯಯಿಸಿದ ಒಬ್ಬ ವಿದ್ವಾಂಸ.

ಜೀವನ, ಬರೆದ ಕೃತಿಗಳು

ಕ್ರೈಸ್ತ ಪಾದ್ರಿ ರೆವರೆಂಡ್ ಆರ್.ಸಿ. ಗ್ರಿಫಿತ್‍ನ ಮಗನಾದ ಇವರು^[೧] 1846ರಲ್ಲಿ ಆಕ್ಸ್‌ಫರ್ಡಿನ ಕ್ವೀನ್ಸ್ ಕಾಲೇಜಿನಲ್ಲಿ ಬಿ.ಎ. ಪದವೀಧರನಾದ. ಆಗಿನ ಕಾಲಕ್ಕೆ ಪ್ರಸಿದ್ಧ ಸಂಸ್ಕೃತಜ್ಞನೆಂದು ಖ್ಯಾತಿ ಪಡೆದಿದ್ದ ಎಚ್.ಎಚ್. ವಿಲ್ಸನ್‍ನ ಶಿಷ್ಯನಾಗಿ 1849ರಲ್ಲಿ ಎಂ.ಎ ಪದವೀಧರರಾದರೂ. ಆಗ ಆಕ್ಸ್‌ಫರ್ಡ್ ವಿಶ್ವವಿದ್ಯಾನಿಲಯದ ಬೋದೆನ್ ಸಂಸ್ಕೃತ ವಿದ್ಯಾರ್ಥಿವೇತನ ಇವರಿಗೆ ಲಭಿಸಿತು. ಅಲ್ಲಿಂದ ಮುಂದೆ ಐವತ್ತೇಳು ವರ್ಷಗಳ ಕಾಲ ನಿರಂತರವಾಗಿ, 1906ರವರೆಗೆ ಸಂಸ್ಕೃತ ಗ್ರಂಥಗಳ ಭಾಷಾಂತರ, ಅಧ್ಯಾಪನಗಳಲ್ಲಿ ನಿರತರಾದರೂ.

ಎಂ.ಎ ಪದವಿ ಪಡೆದ ಮೊದಲ ಮೂರು ವರ್ಷಗಳ ಕಾಲ ಗ್ರಿಫಿತ್ ಇಂಗ್ಲೆಂಡಿನ ಮಾರ್ಲ್‌ಬರೋವಿನ ಕಾಲೇಜಿನಲ್ಲಿ ಸಹೋಪಾಧ್ಯಾಯನಾಗಿದ್ದು ಅನಂತರ 1853ರಲ್ಲಿ ಭಾರತೀಯ ವಿದ್ಯಾ ಇಲಾಖೆಯನ್ನು ಸೇರಿ ಬನಾರಸ್ ಕಾಲೇಜಿನಲ್ಲಿ 1863ರ ತನಕ ಇಂಗ್ಲಿಷ್ ಪ್ರಾಧ್ಯಾಪಕರಾದರಲ್ಲದೆ ಮುಂದೆ ಹದಿನೈದು ವರ್ಷಗಳ ಕಾಲ ಅಲ್ಲಿಯೇ ಪ್ರಿನ್ಸಿಪಾಲ್ ಆಗಿ ದುಡಿದರು. 1878ರಲ್ಲಿ ಆಗಿನ ಔದ್ ಮತ್ತು ವಾಯುವ್ಯ ಪ್ರಾಂತಗಳ ವಿದ್ಯಾ ಇಲಾಖಾ ನಿರ್ದೇಶಕನಾಗಿ ಸೇವೆ ಸಲ್ಲಿಸಿ ಅವರ ಅರುವತ್ತನೆಯ ವರ್ಷದಲ್ಲಿ (1885) ವಿಶ್ರಾಂತಿ ಪಡೆದರು. ಅವರು ಎಂಭತ್ತು ವರ್ಷಗಳ ಕಾಲ ಬದುಕಿದ್ದರು.

ಕೃತಿ/ ಸಾಹಿತ್ಯ

ಇವರು ಇಪ್ಪತ್ತಾರನೆಯ ವಯಸ್ಸಿನಿಂದಲೇ ಸಂಸ್ಕೃತ ಗ್ರಂಥಗಳ ಸಂಪಾದನೆ ಮತ್ತು ಭಾಷಾಂತರ ಮಾಡಲು ಪ್ರಾರಂಭಿಸಿದ್ದರು.

ಸ್ಪೆಸಿಮೆನ್ಸ್ ಆಫ್ ಓಲ್ಡ್ ಇಂಡಿಯನ್ ಪೊಯೆಟ್ರಿ 1852 (ಪ್ರಾಚೀನ ಭಾರತೀಯ ಕಾವ್ಯ ಮಾದರಿಗಳು)
ದ ಬರ್ತ್ ಆಫ್ ದ ವಾರ್ ಗಾಡ್ 1853 (ಕುಮಾರ ಸಂಭವ)
ಇಡಿಲ್ಸ್ ಫ್ರಂ ಸ್ಯಾನ್‍ಸ್ಕ್ರಿಟ್ 1866 (ಸಂಸ್ಕೃತ ಸಾಹಿತ್ಯದ ಮನಮೋಹಕ ದೃಶ್ಯಗಳು)
ಸೀನ್ಸ್ ಫ್ರಂ ದ ರಾಮಾಯಣ 1868 (ರಾಮಾಯಣದ ಚಿತ್ರಗಳು),
ರಾಮಾಯಣದ ಪದ್ಯಾನುವಾದ ಐದು ಭಾಗಗಳೂ (1870-75)
ಋಗ್ವೇದ, ನಾಲ್ಕು ಸಂಪುಟಗಳು 1989-92);
ಸಾಮವೇದ (1893);
ಅಥರ್ವವೇದ, ಎರಡು ಸಂಪುಟಗಳು (1895-96)
ಶುಕ್ಲ ಯಜುರ್ವೇದ (1899).

ಹೀಗೆ ಪ್ರಾಚೀನ ಭಾರತೀಯರ ಪವಿತ್ರ ಗ್ರಂಥಗಳು ಹಾಗೂ ನಾಲ್ಕು ವೇದಗಳನ್ನು ಇಂಗ್ಲಿಷಿಗೆ ಸಂಪೂರ್ಣವಾಗಿ ಭಾಷಾಂತರಿಸಿದ ಕೀರ್ತಿ ಗ್ರಿಫಿತನವರದು.

ಇಂಗ್ಲಿಷ್, ಸಂಸ್ಕೃತ, ಹಿಂದಿ ಮತ್ತು ಪರ್ಷಿಯನ್ ಭಾಷೆಗಳನ್ನು ಅಭ್ಯಸಿಸಿ ಪಾಂಡಿತ್ಯ ಗಳಿಸಿದ ಇವರಿಗೆ ಆಗಿನ ಬ್ರಿಟಿಷ್ ಸರ್ಕಾರ ಸಿ.ಐ.ಇ. ಪ್ರಶಸ್ತಿಯನ್ನಿತ್ತಿತ್ತು. ಕಲ್ಕತ್ತ ವಿಶ್ವವಿದ್ಯಾಲಯ ತನ್ನ ಸದಸ್ಯತ್ವವನ್ನು (ಫೆಲೋಷಿಪ್) ಕೊಟ್ಟು ಗೌರವಿಸಿತು. ಭಾಷಾಭಿವೃದ್ದಿಗಾಗಿಯೇ ಮೀಸಲಾಗಿದ್ದು ವಾರಾಣಸಿಯಿಂದ ಪ್ರಕಟವಾಗುತ್ತಿದ್ದ ಪಂಡಿತ ಎಂಬ ಸಂಸ್ಕೃತ ನಿಯತಕಾಲಿಕೆಯೊಂದಕ್ಕೆ ಗ್ರಿಫಿತ್ ಸಂಪಾದಕನಾಗಿ ಕೆಲಸ ಮಾಡಿದರು. ಯಾವ ಐಹಿಕ ಜೀವನದ ಆಕರ್ಷಣೆಗಳಿಗೂ ಪಕ್ಕಾಗದ ಇವರು ನಿವೃತ್ತಿಯ ನಂತರ ನೀಲಗಿರಿಯ ಕೋಟಗಿರಿಯಲ್ಲಿ ನೆಲಸಿ ನಾಲ್ಕು ವೇದಗಳನ್ನೂ ಇಂಗ್ಲಿಷಿಗೆ ಭಾಷಾಂತರ ಮಾಡುವ ಕಾರ್ಯವನ್ನು ಸಾಧಿಸಿದರು.

ಗ್ರಿಫಿತ್ತನ ಸಮಾಧಿ ಕೋಟಗಿರಿಯಲ್ಲಿಯೇ ಇದೆ.^[೨]

ಉಲ್ಲೇಖಗಳು

↑ Buckland, C.E. (1968). "Rev. R. C. Griffith". Dictionary of Indian Biography. New York: Haskell House. p. 181. GGKEY:BDL52T227UN.
↑ Macdonell 1912.

ಗ್ರಂಥಸೂಚಿ

This article incorporates text from a publication now in the public domain: Macdonell, Arthur Anthony (1912). "Griffith, Ralph Thomas Hotchkin". In Lee, Sidney (ed.). Dictionary of National Biography (2nd supplement) (in ಇಂಗ್ಲಿಷ್). London: Smith, Elder & Co.

ಹೊರಗಿನ ಕೊಂಡಿಗಳು

[1] Buckland, C.E. (1968). "Rev. R. C. Griffith". Dictionary of Indian Biography. New York: Haskell House. p. 181. GGKEY:BDL52T227UN.

[FOOTNOTEMacdonell1912-2] Macdonell 1912.

[೧]

[೨]