ಪೊಟೆಮ್ಕಿನ್ ಮೆಟ್ಟಿಲುಗಳು
ಪೊಟೆಮ್ಕಿನ್ ಮೆಟ್ಟಿಲುಗಳು (Potemkin Stairs) ಅಥವಾ ಪೊಟೆಮ್ಕಿನ್ ಹೆಜ್ಜೆಗಳು (Potemkin Steps) (ಉಕ್ರೇನಿಯನ್: Потьомкінські сходи, ಲ್ಯಾಟಿನ್ ಲಿಪ್ಯಂತರ: Potiomkinski skhody; ರಷ್ಯನ್: Потёмкинская лестница), ಅಧಿಕೃತವಾಗಿ ಪ್ರಿಮೋರ್ಸ್ಕಿ ಮೆಟ್ಟಿಲುಗಳು (ಉಕ್ರೇನಿಯನ್: Приморські сходи) ಎಂದು ಕರೆಯಲ್ಪಡುವ ಈ ಮೆಟ್ಟಿಲುಗಳು ಉಕ್ರೇನ್ನ ಒಡೆಸಾ ನಗರದಲ್ಲಿರುವ ಬೃಹತ್ ಮೆಟ್ಟಿಲುಗಳಾಗಿವೆ. ಇವು ಸಮುದ್ರದ ಕಡೆಯಿಂದ ನಗರವನ್ನು ಪ್ರವೇಶಿಸುವ ಪ್ರಮುಖ ದ್ವಾರವೆಂದು ಪರಿಗಣಿಸಲಾಗುತ್ತದೆ ಮತ್ತು ಒಡೆಸಾ ನಗರದ ಅತ್ಯಂತ ಪ್ರಸಿದ್ಧ ಸಂಕೇತವಾಗಿದೆ.[೧]
ಈ ಮೆಟ್ಟಿಲುಗಳನ್ನು ಆರಂಭದಲ್ಲಿ ಬುಲೆವಾರ್ಡ್ ಮೆಟ್ಟಿಲುಗಳು, ದೈತ್ಯ ಮೆಟ್ಟಿಲುಗಳು ಅಥವಾ ರಿಶೆಲಿಯು ಮೆಟ್ಟಿಲುಗಳು ಎಂದು ಕರೆಯಲಾಗುತ್ತಿತ್ತು. ಮೇಲಿನ ಮೆಟ್ಟಿಲಿನ ಅಗಲ ಸುಮಾರು 12.5 ಮೀಟರ್ಗಳಿದ್ದು, ಕೆಳಗಿನ ಮೆಟ್ಟಿಲಿನ ಅಗಲ ಸುಮಾರು 21.7 ಮೀಟರ್ಗಳಾಗಿದೆ. ಮೆಟ್ಟಿಲುಗಳ ಒಟ್ಟು ಉದ್ದ ಸುಮಾರು 142 ಮೀಟರ್ಗಳಾದರೂ, ಅವುಗಳ ವಿನ್ಯಾಸದಿಂದಾಗಿ ಇನ್ನೂ ಹೆಚ್ಚಿನ ಉದ್ದವಿರುವಂತೆ ಭಾಸವಾಗುತ್ತದೆ.[೨]
ಇತಿಹಾಸ
[ಬದಲಾಯಿಸಿ]ನಿರ್ಮಾಣ
ಎತ್ತರದ ಹುಲ್ಲುಗಾವಲು ಪ್ರದೇಶದ ಮೇಲೆ ನೆಲೆಗೊಂಡಿರುವ ಒಡೆಸಾ ನಗರಕ್ಕೆ ಕೆಳಭಾಗದಲ್ಲಿದ್ದ ಬಂದರಿಗೆ ನೇರ ಸಂಪರ್ಕದ ಅಗತ್ಯವಿತ್ತು. ಮೆಟ್ಟಿಲುಗಳನ್ನು ನಿರ್ಮಿಸುವ ಮೊದಲು ಬಂದರಿಗೆ ಹೋಗಲು ತಿರುವುಮುರುವುಗಳ ದಾರಿಗಳು ಮತ್ತು ಸರಳವಾದ ಮರದ ಮೆಟ್ಟಿಲುಗಳು ಮಾತ್ರ ಇದ್ದವು.[೩]
1837ರಲ್ಲಿ ಒಂದು ಬೃಹತ್ ಮೆಟ್ಟಿಲು ನಿರ್ಮಿಸುವ ನಿರ್ಧಾರ ಕೈಗೊಳ್ಳಲಾಯಿತು. ಇದರ ನಿರ್ಮಾಣವು 1837ರಿಂದ 1841ರವರೆಗೆ ನಡೆಯಿತು. ಮೂಲತಃ ಸುಮಾರು 200 ಮೆಟ್ಟಿಲುಗಳನ್ನು ಹೊಂದಿದ್ದ ಈ ಯೋಜನೆಯನ್ನು ಪ್ರಾದೇಶಿಕ ಗವರ್ನರ್-ಜನರಲ್ ಆಗಿದ್ದ ಪ್ರಿನ್ಸ್ ಮಿಖಾಯಿಲ್ ಸೆಮ್ಯೋನೋವಿಚ್ ವೊರೊನ್ಸೋವ್ ಅವರು ಪ್ರಾರಂಭಿಸಿದರು. ಇದು ಅವರ ಪತ್ನಿ ಎಲ್ಝ್ಬಿಯೆಟಾ ಬ್ರಾನಿಕಾಗೆ ಉಡುಗೊರೆಯಾಗಿಯೂ, ಭವಿಷ್ಯದ ಮೆಟ್ಟಿಲುಗಳ ಮೇಲ್ಭಾಗದ ಪ್ರಿಮೋರ್ಸ್ಕಿ ಬುಲೆವಾರ್ಡ್ ಪ್ರದೇಶದಲ್ಲಿ ವಾಸಿಸುತ್ತಿದ್ದ ಸ್ಥಳೀಯ ಗಣ್ಯರ ಬೆಂಬಲ ಪಡೆಯುವ ಉದ್ದೇಶದಿಂದಲೂ ನಿರ್ಮಿಸಲಾಯಿತು. ಆದ್ದರಿಂದ ಆರಂಭದಲ್ಲಿ ಇವುಗಳನ್ನು ಪ್ರಿಮೋರ್ಸ್ಕಿ ಮೆಟ್ಟಿಲುಗಳು, ಬುಲೆವಾರ್ಡ್ ಮೆಟ್ಟಿಲುಗಳು ಅಥವಾ ದೈತ್ಯ ಮೆಟ್ಟಿಲುಗಳು ಎಂದು ಕರೆಯಲಾಗುತ್ತಿತ್ತು.[೪]
ಈ ಮೆಟ್ಟಿಲುಗಳನ್ನು 1837ರಲ್ಲಿ ಸ್ವಿಸ್ ವಾಸ್ತುಶಿಲ್ಪಿ ಫ್ರಾನ್ಸೆಸ್ಕೊ ಬೊಫೊ ಹಾಗೂ ಸೇಂಟ್ ಪೀಟರ್ಸ್ಬರ್ಗ್ನ ವಾಸ್ತುಶಿಲ್ಪಿಗಳಾದ ಅವ್ರಾಮ್ ಮೆಲ್ನಿಕೊವ್ ಮತ್ತು ಪೊಟೆ ವಿನ್ಯಾಸಗೊಳಿಸಿದರು. ನಿರ್ಮಾಣಕ್ಕೆ ಸುಮಾರು 800,000 ರೂಬಲ್ಗಳ ವೆಚ್ಚವಾಯಿತು. ಹಸಿರು-ಬೂದು ಬಣ್ಣದ ಮರಳುಗಲ್ಲನ್ನು ಆಗಿನ ಆಸ್ಟ್ರಿಯನ್ ಸಾಮ್ರಾಜ್ಯದ ಟ್ರಿಯೆಸ್ಟೆ ಬಂದರಿನಿಂದ ತರಿಸಲಾಯಿತು. ನಿರ್ಮಾಣ ಕಾರ್ಯವನ್ನು ಇಂಗ್ಲಿಷ್ ಎಂಜಿನಿಯರ್ ಜಾನ್ ಅಪ್ಟನ್ ಮೇಲ್ವಿಚಾರಣೆ ಮಾಡಿದರು. ನಂತರ ಅವರು ಸೆವಾಸ್ಟೊಪೋಲ್ನಲ್ಲಿ ನಿರ್ಮಿಸಲಾದ ಬೃಹತ್ ಒಣ ಹಡಗುಕಟ್ಟೆಗಳ ನಿರ್ಮಾಣವನ್ನೂ ಮೇಲ್ವಿಚಾರಣೆ ಮಾಡಿದರು.[೫]
ನಂತರದ ಇತಿಹಾಸ
[ಬದಲಾಯಿಸಿ]1906ರಲ್ಲಿ ಮೆಟ್ಟಿಲುಗಳ ಎಡಭಾಗದಲ್ಲಿ ಫ್ಯೂನಿಕ್ಯುಲರ್ ರೈಲು ನಿರ್ಮಿಸಲಾಯಿತು. ಇದರಿಂದ ಜನರು ಮೆಟ್ಟಿಲುಗಳನ್ನು ಹತ್ತಿ ಇಳಿಯುವ ಬದಲು ರೈಲಿನ ಮೂಲಕ ಮೇಲಕ್ಕೆ ಮತ್ತು ಕೆಳಕ್ಕೆ ಸಂಚರಿಸಲು ಸಾಧ್ಯವಾಯಿತು.
1925ರಲ್ಲಿ ಸೆರ್ಗೆಯ್ ಐಸೆನ್ಸ್ಟೈನ್ ನಿರ್ದೇಶಿಸಿದ ಮೌನ ಚಲನಚಿತ್ರ Battleship Potemkinನಲ್ಲಿ ಈ ಮೆಟ್ಟಿಲುಗಳು ಕಾಣಿಸಿಕೊಂಡ ನಂತರ ಅವು ವಿಶ್ವದಾದ್ಯಂತ ಪ್ರಸಿದ್ಧವಾದವು.
ಕಾಲಕ್ರಮೇಣ ಸವೆತದಿಂದ ಮೆಟ್ಟಿಲುಗಳ ಮರಳುಗಲ್ಲು ಹಾನಿಗೊಳಗಾಯಿತು. 1933ರಲ್ಲಿ ಅವುಗಳನ್ನು ಬೋಹ್ ನದಿ ಪ್ರದೇಶದಿಂದ ತರಿಸಲಾದ ಗುಲಾಬಿ-ಬೂದು ಗ್ರಾನೈಟ್ನಿಂದ ಬದಲಾಯಿಸಲಾಯಿತು ಮತ್ತು ಮೆಟ್ಟಿಲುಗಳ ಮಧ್ಯದ ಸಮತಟ್ಟು ಭಾಗಗಳಿಗೆ ಡಾಂಬರು ಹಾಕಲಾಯಿತು. ಬಂದರನ್ನು ವಿಸ್ತರಿಸುವ ಸಂದರ್ಭದಲ್ಲಿ ಕೆಲವು ಮೆಟ್ಟಿಲುಗಳು ಮರಳಿನ ಅಡಿಯಲ್ಲಿ ಮುಚ್ಚಿಹೋದವು. ಇದರಿಂದ ಮೆಟ್ಟಿಲುಗಳ ಸಂಖ್ಯೆ 192ಕ್ಕೆ ಇಳಿಯಿತು ಮತ್ತು ಅವುಗಳಲ್ಲಿ ಹತ್ತು ಸಮತಟ್ಟು ಭಾಗಗಳು ಉಳಿದವು.
1955ರಲ್ಲಿ ಸೋವಿಯತ್ ಕಾಲದಲ್ಲಿ, ಯುದ್ಧನೌಕೆ Potemkinನಲ್ಲಿ ನಡೆದ ದಂಗೆಗೆ 50 ವರ್ಷಗಳು ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಪ್ರಿಮೋರ್ಸ್ಕಿ ಮೆಟ್ಟಿಲುಗಳಿಗೆ ಪೊಟೆಮ್ಕಿನ್ ಮೆಟ್ಟಿಲುಗಳು ಎಂಬ ಹೆಸರು ನೀಡಲಾಯಿತು.
1991ರಲ್ಲಿ ಉಕ್ರೇನ್ ಸ್ವಾತಂತ್ರ್ಯ ಪಡೆದ ನಂತರ, ಒಡೆಸಾದ ಅನೇಕ ರಸ್ತೆಗಳಂತೆ ಈ ಮೆಟ್ಟಿಲುಗಳ ಐತಿಹಾಸಿಕ ಹೆಸರು ಪ್ರಿಮೋರ್ಸ್ಕಿ ಮೆಟ್ಟಿಲುಗಳು ಎಂಬುದನ್ನು ಮರುಸ್ಥಾಪಿಸಲಾಯಿತು.
2015ರ ಜುಲೈನಲ್ಲಿ ನಡೆದ ಆರನೇ ಒಡೆಸಾ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ ಸಂದರ್ಭದಲ್ಲಿ ಯುರೋಪಿಯನ್ ಫಿಲ್ಮ್ ಅಕಾಡೆಮಿ ಮೆಟ್ಟಿಲುಗಳ ಮೇಲೆ ಸ್ಮರಣಾರ್ಥ ಫಲಕವನ್ನು ಸ್ಥಾಪಿಸಿತು. ಈ ಫಲಕವು ಪೊಟೆಮ್ಕಿನ್ ಮೆಟ್ಟಿಲುಗಳು ಯುರೋಪಿಯನ್ ಚಲನಚಿತ್ರರಂಗದ ಪ್ರಮುಖ ಸ್ಮರಣೀಯ ಸ್ಥಳವೆಂದು ಗುರುತಿಸುತ್ತದೆ.
ಸುಮಾರು ಹಲವು ದಶಕಗಳ ಕಾಲ ಕಾರ್ಯನಿರ್ವಹಿಸಿದ ಫ್ಯೂನಿಕ್ಯುಲರ್ ರೈಲನ್ನು 1970ರಲ್ಲಿ ಎಸ್ಕಲೇಟರ್ನಿಂದ ಬದಲಾಯಿಸಲಾಯಿತು. 1997ರಲ್ಲಿ ಎಸ್ಕಲೇಟರ್ ಸೇವೆಯನ್ನು ಸ್ಥಗಿತಗೊಳಿಸಲಾಯಿತು. ನಂತರ 2005ರ ಸೆಪ್ಟೆಂಬರ್ನಲ್ಲಿ ಹೊಸ ಫ್ಯೂನಿಕ್ಯುಲರ್ ಸೇವೆಯನ್ನು ಆರಂಭಿಸಲಾಯಿತು.
ಡ್ಯೂಕ್ ದೆ ರಿಶೆಲಿಯು ಸ್ಮಾರಕ
[ಬದಲಾಯಿಸಿ]ಮೆಟ್ಟಿಲುಗಳ ಮೇಲ್ಭಾಗದಲ್ಲಿ ಡ್ಯೂಕ್ ದೆ ರಿಶೆಲಿಯು ಸ್ಮಾರಕವಿದೆ. ಇದು ಒಡೆಸಾ ನಗರದ ಗವರ್ನರ್ ಆಗಿದ್ದ ಡ್ಯೂಕ್ ದೆ ರಿಶೆಲಿಯು ಅವರ ಪ್ರತಿಮೆಯನ್ನು ಹೊಂದಿದೆ. ರೋಮನ್ ಉಡುಪಿನ ಶೈಲಿಯಲ್ಲಿ ರೂಪಿಸಲಾದ ಈ ಪ್ರತಿಮೆಯನ್ನು ರಷ್ಯಾದ ಶಿಲ್ಪಿ ಇವಾನ್ ಪೆಟ್ರೋವಿಚ್ ಮಾರ್ತೋಸ್ ವಿನ್ಯಾಸಗೊಳಿಸಿದರು. ಪ್ರತಿಮೆಯನ್ನು ಯೆಫಿಮೊವ್ ಕಂಚಿನಲ್ಲಿ ಎರಕಹೊಯ್ದರು ಮತ್ತು 1826ರಲ್ಲಿ ಅನಾವರಣಗೊಳಿಸಲಾಯಿತು.
ಇದು ಒಡೆಸಾ ನಗರದಲ್ಲಿ ನಿರ್ಮಿಸಲಾದ ಮೊದಲ ಸ್ಮಾರಕವಾಗಿದೆ. ರಿಶೆಲಿಯು ಅವರ ಆಡಳಿತದ 11 ವರ್ಷಗಳ ಅವಧಿಯಲ್ಲಿ ನಗರವು ಕಂಡ ಬೆಳವಣಿಗೆ ಮತ್ತು ಸಮೃದ್ಧಿಯನ್ನು ಸ್ಮರಿಸುವ ಉದ್ದೇಶದಿಂದ ಈ ಸ್ಮಾರಕವನ್ನು ನಿರ್ಮಿಸಲಾಗಿದೆ.
ಮೆಟ್ಟಿಲುಗಳ ಕುರಿತಾದ ವಿವರಣೆಗಳು
[ಬದಲಾಯಿಸಿ]ಪೊಟೆಮ್ಕಿನ್ ಮೆಟ್ಟಿಲುಗಳು ನಿರ್ಮಾಣವಾದ ನಂತರ ಅನೇಕ ಪ್ರವಾಸಿಗರು ಮತ್ತು ಲೇಖಕರು ಅವುಗಳ ವೈಭವವನ್ನು ವಿವರಿಸಿದ್ದಾರೆ.
ಒಬ್ಬ ಪ್ರವಾಸಿಗರು, ಈ ಮೆಟ್ಟಿಲುಗಳು ಅದ್ಭುತ ವೈಭವವನ್ನು ಹೊಂದಿದ್ದು, ಇಳಿಜಾರಿನ ಮೂಲಕ ಸಮುದ್ರತೀರ ಮತ್ತು ಬಂದರಿನ ಕಡೆಗೆ ಸಾಗುತ್ತವೆ ಎಂದು ವರ್ಣಿಸಿದ್ದಾರೆ.
ಇನ್ನೊಬ್ಬರು ಈ ನಿರ್ಮಾಣವನ್ನು ಬಹಳ ದುಬಾರಿಯಾದರೂ ಉಪಯೋಗ ಕಡಿಮೆ ಇರುವ ಯೋಜನೆ ಎಂದು ಟೀಕಿಸಿದ್ದರು.
ಒಡೆಸಾದ ಪ್ರಮುಖ ದೃಶ್ಯಗಳಲ್ಲಿ ಒಂದಾಗಿ ಈ ಮೆಟ್ಟಿಲುಗಳನ್ನು ಹಲವು ಪ್ರವಾಸಿಗರು ಗುರುತಿಸಿದ್ದಾರೆ. ಬಂದರಿನ ತೀರದಿಂದ ಬೆಟ್ಟದ ಮೇಲಿರುವ ವಿಶಾಲ ಬುಲೆವಾರ್ಡ್ವರೆಗೆ ಸಾಗುವ ಈ ಮೆಟ್ಟಿಲುಗಳ ಸರಳ ವಿನ್ಯಾಸವೇ ಅವುಗಳಿಗೆ ಸ್ಮಾರಕದಂತಹ ಭವ್ಯತೆಯನ್ನು ನೀಡುತ್ತದೆ ಎಂದು ವಿವರಿಸಲಾಗಿದೆ. ಮೆಟ್ಟಿಲುಗಳನ್ನು ಹತ್ತುವುದು ಸುಲಭದ ಕೆಲಸವಲ್ಲದಿದ್ದರೂ, ಮಧ್ಯದಲ್ಲಿರುವ ಸಮತಟ್ಟು ಭಾಗಗಳು ವಿಶ್ರಾಂತಿ ಪಡೆಯಲು ಅನುಕೂಲವಾಗುತ್ತವೆ ಎಂದು ಪ್ರವಾಸಿಗರು ಬರೆದಿದ್ದಾರೆ.
ಆರಂಭಿಕ ಕಾಲದಲ್ಲಿ ಕೆಲವರು ಈ ಮೆಟ್ಟಿಲುಗಳ ವಿನ್ಯಾಸ ಮತ್ತು ಉಪಯುಕ್ತತೆಯನ್ನು ಟೀಕಿಸಿದ್ದರು. ಅವುಗಳ ನಿರ್ಮಾಣವು ಅಲಂಕಾರಕ್ಕಾಗಿ ಮಾಡಲಾಗಿದ್ದರೆ ವಿನ್ಯಾಸ ಸಮರ್ಪಕವಾಗಿಲ್ಲ ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದರು. ಮೆಟ್ಟಿಲುಗಳ ಮೇಲ್ಭಾಗದಲ್ಲಿರುವ ಡ್ಯೂಕ್ ದೆ ರಿಶೆಲಿಯು ಅವರ ಪ್ರತಿಮೆಯನ್ನು ಕುರಿತೂ ಹಾಸ್ಯಮಯ ಟೀಕೆಗಳು ಕೇಳಿಬಂದಿದ್ದವು.
ಕೆಳಗಿನಿಂದ ನೋಡಿದಾಗ ಡ್ಯೂಕ್ ದೆ ರಿಶೆಲಿಯು ಅವರ ಪ್ರತಿಮೆ ಮೆಟ್ಟಿಲುಗಳ ಬೃಹತ್ ಗಾತ್ರಕ್ಕೆ ಹೋಲಿಸಿದರೆ ತುಂಬಾ ಚಿಕ್ಕದಾಗಿ ಕಾಣುತ್ತದೆ ಎಂದು ಕೆಲವರು ಗಮನಿಸಿದ್ದರು. ಆದ್ದರಿಂದ ಪ್ರತಿಮೆಯು ಇನ್ನಷ್ಟು ದೊಡ್ಡದಾಗಿರಬೇಕಾಗಿತ್ತು ಅಥವಾ ಬೇರೆ ಸ್ಥಳದಲ್ಲಿ ಸ್ಥಾಪಿಸಬೇಕಾಗಿತ್ತು ಎಂಬ ಅಭಿಪ್ರಾಯವೂ ವ್ಯಕ್ತವಾಗಿತ್ತು.
ಉಲ್ಲೇಖಗಳು
[ಬದಲಾಯಿಸಿ]- ↑ "The Potemkin Stairs". Discover Ukraine. Retrieved 27 April 2022.
- ↑ Kononova, p. 48.
- ↑ Davis, G.; Dickinson, K.; Patti, L.; Villarejo, A. (2015). Film Studies: A Global Introduction. Taylor & Francis. p. 425. ISBN 978-1-317-62338-0. Retrieved 2023-03-09.
- ↑ "Odessa Funicular Railway". Ukrainian Travel. Archived from the original on 2 April 2015. Retrieved 25 March 2015.
- ↑ "Duke de Richelieu". Odessa 360. Archived from the original on 19 September 2018.