ಪೆರೆಯಾಸ್ಲಾವ್

ಪೆರಿಯಸ್ಲಾವ್ Переяслав
ಉಕ್ರೇನ್ ದ ಒಂದುನಗರ
ಮೇಲಿನಿಂದ ಎಡಕ್ಕೆ ಬಲಕ್ಕೆ: ಅಸೆನ್ಶನ್ ಮಠ, ಮೂರು ಪವಿತ್ರ ಶ್ರೇಣಿಗಳ ಚರ್ಚ್ (ರುಶ್ನಿಕ್ ವಸ್ತುಸಂಗ್ರಹಾಲಯ), ಸೇಂಟ್ ಜಾರ್ಜ್ ಚರ್ಚ್, ಪುನರುತ್ಥಾನದ ಚರ್ಚ್, ಬೋಯಾನ್ (ಬಾರ್ಡ್) ಸ್ಮಾರಕ.
ಧ್ವಜ ಲಾಂಛನ
ಪೆರಿಯಸ್ಲಾವ್ ನ ಸಂವಾದಾತ್ಮಕ ನಕ್ಷೆ
ಉಕ್ರೇನ್ ದೇಶದ ಪ್ರದೇಶ/ಒಬ್ಲಾಸ್ಟ್	ಕಿವ್ ಒಬ್ಲಾಸ್ಟ್
ಉಕ್ರೇನ್ ದ ರಾಯೊಲು/ರಾಯಾನ್	ಬೊರಿಸ್ಪಿಲ್ ರಾಯಾನ್
ಹ್ರೋಮಡ	ಪೆರೆಯಾಸ್ಲಾವ್ ನಗರ ಹ್ರೋಮಡಾ
ಸ್ಥಾಪನೆ ಆಯಿನ	907
ಮ್ಯಾಗ್ಡೆಬರ್ಗ್ ಹಕ್ಕುಲು	1585
ವಿಸ್ತೀರ್ಣ
• ಒಟ್ಟು	32 km2 (12 sq mi)
ಜನಸಂಖ್ಯೆ  (2022)
• ಒಟ್ಟು	೨೬,೨೭೩
• ಸಾಂದ್ರತೆ	820/km2 (2,100/sq mi)
ಸಮಯ ವಲಯ	UTC+2 (EET)
• ಬೇಸಿಗೆ (DST)	UTC+3 (EEST)
Zip code	08400–08409
ಪ್ರದೇಶ ಕೋಡ್	+380 4567

ಪೆರಿಯಾಸ್ಲಾವ್ (Ukrainian: Переяслав) ಮಧ್ಯ ಉಕ್ರೇನ್ನ ಕೀವ್ ಒಬ್ಲಾಸ್ಟ್ನ ಬೋರಿಸ್ಪಿಲ್ ರೈಯಾನ್ನಲ್ಲಿರುವ ಒಂದು ಐತಿಹಾಸಿಕ ನಗರವಾಗಿದೆ. ಇದು ಅಲ್ಟಾ ಮತ್ತು ಟ್ರುಬಿಜ್ ನದಿಗಳ ಸಂಗಮದ ಸಮೀಪದಲ್ಲಿದ್ದು, ಉಕ್ರೇನ್‌ನ ರಾಜಧಾನಿ ಕೀವ್ನಿಂದ ಸುಮಾರು 95 ಕಿ.ಮೀ. ಆಗ್ನೇಯದಲ್ಲಿದೆ. ಮಧ್ಯಯುಗದಲ್ಲಿ ಈ ನಗರವು ಈ ಪ್ರದೇಶದ ಪ್ರಮುಖ ರಾಜಕೀಯ ಕೇಂದ್ರಗಳಲ್ಲಿ ಒಂದಾಗಿದ್ದು, ಪೆರಿಯಾಸ್ಲಾವ್ ಸಂಸ್ಥಾನದ ರಾಜಧಾನಿಯಾಗಿತ್ತು. ಪೆರಿಯಾಸ್ಲಾವ್ ನಗರವು ಪೆರಿಯಾಸ್ಲಾವ್ ನಗರ ಹ್ರೊಮಾಡಾದ ಆಡಳಿತ ಕೇಂದ್ರವಾಗಿದೆ. 2022ರ ಅಂದಾಜಿನ ಪ್ರಕಾರ ನಗರದ ಜನಸಂಖ್ಯೆ 26,273 ಆಗಿದೆ. ನಗರದ ವಿಸ್ತೀರ್ಣ 32 ಚದರ ಕಿಲೋಮೀಟರ್‌ಗಳಷ್ಟಿದೆ.

20ಕ್ಕೂ ಹೆಚ್ಚು ವಸ್ತುಸಂಗ್ರಹಾಲಯಗಳನ್ನು ಹೊಂದಿರುವುದರಿಂದ ಪೆರಿಯಾಸ್ಲಾವ್ ಅನ್ನು ಕೆಲವೊಮ್ಮೆ "ಜೀವಂತ ವಸ್ತುಸಂಗ್ರಹಾಲಯ" ಎಂದು ಕರೆಯಲಾಗುತ್ತದೆ. ನಗರವು ಐತಿಹಾಸಿಕ ಮತ್ತು ಜನಾಂಗೀಯ ಸಂಗ್ರಹಾಲಯ-ಮೀಸಲು ಪ್ರದೇಶದ ಸ್ಥಾನಮಾನವನ್ನು ಹೊಂದಿದೆ.

ಹೆಸರು

ಪೆರಿಯಾಸ್ಲಾವ್‌ನ ಪ್ರಸ್ತುತ ಹೆಸರನ್ನು ಐತಿಹಾಸಿಕ ಹೆಸರನ್ನು ಪುನಃಸ್ಥಾಪಿಸುವ ಉದ್ದೇಶದಿಂದ ಉಕ್ರೇನ್‌ನ ವೆರ್ಖೋವ್ನಾ ರಾಡಾ 30 ಸೆಪ್ಟೆಂಬರ್ 2019ರಂದು ಅಧಿಕೃತವಾಗಿ ಜಾರಿಗೆ ತಂದಿತು.

ಉಕ್ರೇನಿಯನ್ ಭಾಷೆಯಲ್ಲಿ ಇದರ ಹೆಸರು Переяслав ಆಗಿದೆ. ನಗರವು ಇತಿಹಾಸದ ವಿವಿಧ ಕಾಲಘಟ್ಟಗಳಲ್ಲಿ ಬೇರೆ ಬೇರೆ ಹೆಸರುಗಳಿಂದಲೂ ಪರಿಚಿತವಾಗಿತ್ತು.

ಹಿಂದಿನ ಹೆಸರುಗಳು

• ಪೆರಿಯಾಸ್ಲಾವ್ಲ್ (907–1943); 12ನೇ ಶತಮಾನದಿಂದ ಕೆಲವೊಮ್ಮೆ ಪೆರಿಯಾಸ್ಲಾವ್-ರುಸ್ಕಿ ಎಂದೂ ಕರೆಯಲಾಗುತ್ತಿತ್ತು.
• ಪೆರಿಯಾಸ್ಲಾವ್-ಖ್ಮೆಲ್ನಿಟ್ಸ್ಕಿ (1943–2019).

12ನೇ ಮತ್ತು 13ನೇ ಶತಮಾನಗಳಲ್ಲಿ, ಉತ್ತರ-ಪೂರ್ವದ ಪೆರೆಯಾಸ್ಲಾವ್ಲ್-ಝಾಲೆಸ್ಕಿಯೊಂದಿಗೆ ಗೊಂದಲವಾಗದಂತೆ ನಗರವನ್ನು ಪೆರಿಯಾಸ್ಲಾವ್-ರುಸ್ಕಿ ಎಂದು ಕರೆಯಲಾಗುತ್ತಿತ್ತು.

ಇತಿಹಾಸ

ಕೀವನ್ ರುಸ್

ಪೆರಿಯಾಸ್ಲಾವ್ ಪ್ರದೇಶದ ಇತಿಹಾಸದಲ್ಲಿ ಮಹತ್ವದ ಪಾತ್ರ ವಹಿಸಿದೆ. 911ರ ಬೈಜಾಂಟೈನ್ ಸಾಮ್ರಾಜ್ಯದೊಂದಿಗಿನ ಒಪ್ಪಂದದ ದಾಖಲೆಯಲ್ಲಿ ನಗರವನ್ನು ಮೊದಲ ಬಾರಿಗೆ ಉಲ್ಲೇಖಿಸಲಾಗಿದೆ. ಆ ಸಮಯದಲ್ಲಿ ಅದನ್ನು ಬಲ್ಗೇರಿಯಾದ ಪ್ರೆಸ್ಲಾವ್ ನಗರದಿಂದ ಪ್ರತ್ಯೇಕಿಸಲು ಪೆರಿಯಾಸ್ಲಾವ್-ರುಸ್ಕಿ ಎಂದು ಉಲ್ಲೇಖಿಸಲಾಗಿತ್ತು. ವ್ಲಾಡಿಮಿರ್ I 992ರಲ್ಲಿ ದಕ್ಷಿಣದ ಹುಲ್ಲುಗಾವಲು ಪ್ರದೇಶಗಳಿಂದ ನಡೆಯುತ್ತಿದ್ದ ಅಲೆಮಾರಿ ಜನಾಂಗಗಳ ದಾಳಿಗಳಿಂದ ಕೀವನ್ ರುಸ್ನ ದಕ್ಷಿಣ ಗಡಿಯನ್ನು ರಕ್ಷಿಸಲು ಇಲ್ಲಿ ಒಂದು ದೊಡ್ಡ ಕೋಟೆಯನ್ನು ನಿರ್ಮಿಸಿದನು. 11ನೇ ಶತಮಾನದ ಮಧ್ಯಭಾಗದಿಂದ 1239ರವರೆಗೆ ಪೆರಿಯಾಸ್ಲಾವ್ ಪೆರಿಯಾಸ್ಲಾವ್ ಸಂಸ್ಥಾನದ ರಾಜಧಾನಿಯಾಗಿತ್ತು. 1239ರಲ್ಲಿ ಮಂಗೋಲ್ ಆಕ್ರಮಣೊದ ಸಂದರ್ಭದಲ್ಲಿ ತಾತಾರರು ನಗರವನ್ನು ಧ್ವಂಸಗೊಳಿಸಿದರು.

ಲಿಥುವೇನಿಯಾ ಮತ್ತು ಪೋಲೆಂಡ್

14ನೇ ಶತಮಾನದಲ್ಲಿ ಪೆರಿಯಾಸ್ಲಾವ್ ಲಿಥುವೇನಿಯಾದ ಗ್ರ್ಯಾಂಡ್ ಡಚಿಗೆ ಸೇರ್ಪಡೆಯಾಯಿತು. ನಂತರ ಇದು ಕೀವ್ ವೊಯೆವೊಡ್ಶಿಪ್‌ನ ಭಾಗವಾಯಿತು. 1569ರಲ್ಲಿ ಈ ಪ್ರದೇಶವು ಪೋಲಿಷ್ ಕಿರೀಟದ ಅಧೀನಕ್ಕೆ ಬಂದಿತು.

1585ರಲ್ಲಿ ಪೋಲೆಂಡ್‌ನ ಸ್ಟೀಫನ್ ಬಾಥೊರಿ ರಾಜನು ಪೆರಿಯಾಸ್ಲಾವ್‌ಗೆ ಮ್ಯಾಗ್ಡೆಬರ್ಗ್ ಹಕ್ಕುಗಳು ನೀಡಿದನು. ಇದರೊಂದಿಗೆ ನಗರವು ಪೋಲೆಂಡ್‌ನ ರಾಜಕೀಯ ನಗರವಾಗಿ ಗುರುತಿಸಲ್ಪಟ್ಟಿತು.

ಕೊಸಾಕ್ ಹೆಟ್ಮನೇಟ್

16ನೇ ಶತಮಾನದ ಉತ್ತರಾರ್ಧದಲ್ಲಿ ಪೆರಿಯಾಸ್ಲಾವ್ ಜಪೊರೊಝಿಯನ್ ಕೊಸಾಕ್‌ಗಳು/ಜಪೊರೊಝಿಯನ್ ಹೋಸ್ಟ್ನ ಒಂದು ರೆಜಿಮೆಂಟಲ್ ನಗರವಾಯಿತು.

1654ರಲ್ಲಿ ಬೊಹ್ದಾನ್ ಖ್ಮೆಲ್ನಿಟ್ಸ್ಕಿಯ ನೇತೃತ್ವದಲ್ಲಿ ಇಲ್ಲಿ ನಡೆದ ಪೆರಿಯಾಸ್ಲಾವ್ ಒಪ್ಪಂದದ ಸಭೆಯಲ್ಲಿ ಜಪೊರೊಝಿಯನ್ ಕೊಸಾಕ್‌ಗಳು ರಷ್ಯಾದ ಝಾರ್ ರಾಜ್ಯದೊಂದಿಗೆ ಸೈನಿಕ ಮೈತ್ರಿಗೆ ಒಪ್ಪಿಕೊಂಡರು. ಈ ಒಪ್ಪಂದವು ಎಡದಂಡೆಯ ಉಕ್ರೇನ್‌ನಲ್ಲಿ ರಷ್ಯಾದ ಅಧೀನದಲ್ಲಿದ್ದ ಕೊಸಾಕ್ ಹೆಟ್ಮನೇಟ್ ಸ್ಥಾಪನೆಗೆ ಕಾರಣವಾಯಿತು. ನಂತರ ಇದು ರಷ್ಯಾ–ಪೋಲೆಂಡ್ ಯುದ್ಧ (1654–1667)ದೊಂದಿಗೆ ಸಂಬಂಧಿಸಿತು. 1667ರ ಆಂಡ್ರುಸೊವೊ ಕದನವಿರಾಮದ ನಂತರ ಪೆರಿಯಾಸ್ಲಾವ್ ರಷ್ಯಾದ ಅಧೀನಕ್ಕೆ ಸೇರಿತು.

ಸೋವಿಯತ್ ಕಾಲ ಮತ್ತು ವಸ್ತುಸಂಗ್ರಹಾಲಯ ಕೇಂದ್ರ

ಎರಡನೇ ವಿಶ್ವಯುದ್ಧದ ಸಂದರ್ಭದಲ್ಲಿ, 1943ರ ಅಕ್ಟೋಬರ್‌ನಲ್ಲಿ ಸೋವಿಯತ್ ಸರ್ಕಾರವು ನಗರದ ಹೆಸರನ್ನು ಪೆರಿಯಾಸ್ಲಾವ್-ಖ್ಮೆಲ್ನಿಟ್ಸ್ಕಿ ಎಂದು ಬದಲಿಸಿತು. ಈ ಹೆಸರಿನ ಮೂಲಕ 1654ರ ಪೆರಿಯಾಸ್ಲಾವ್ ಒಪ್ಪಂದದಲ್ಲಿ ಬೊಹ್ದಾನ್ ಖ್ಮೆಲ್ನಿಟ್ಸ್ಕಿಯ ಪಾತ್ರವನ್ನು ಒತ್ತಿಹೇಳುವ ಉದ್ದೇಶವಿತ್ತು. ನಂತರ ನಗರವನ್ನು ಪ್ರಮುಖ ವಸ್ತುಸಂಗ್ರಹಾಲಯ ಮತ್ತು ಪ್ರವಾಸೋದ್ಯಮ ಕೇಂದ್ರವಾಗಿ ಅಭಿವೃದ್ಧಿಪಡಿಸಲಾಯಿತು.

ಪೆರಿಯಾಸ್ಲಾವ್-ಖ್ಮೆಲ್ನಿಟ್ಸ್ಕಿ ನಗರ ಮಂಡಳಿಯ ಮನವಿಯ ಮೇರೆಗೆ ಉಕ್ರೇನ್ ಸಂಸತ್ತು 2019ರಲ್ಲಿ ನಗರದ ಐತಿಹಾಸಿಕ ಹೆಸರಾದ ಪೆರಿಯಾಸ್ಲಾವ್ ಅನ್ನು ಪುನಃಸ್ಥಾಪಿಸಿತು

18 ಜುಲೈ 2020ರಂದು ಉಕ್ರೇನ್‌ನ ಆಡಳಿತಾತ್ಮಕ ಸುಧಾರಣೆಯ ಸಂದರ್ಭದಲ್ಲಿ ಪೆರಿಯಾಸ್ಲಾವ್ ಅನ್ನು ಬೋರಿಸ್ಪಿಲ್ ರೈಯಾನ್ಗೆ ಸೇರಿಸಲಾಯಿತು.

ಜನಸಂಖ್ಯೆ

ಜನಾಂಗೀಯ ಗುಂಪುಗಳು

2001ರ ಜನಗಣತಿದ ಪ್ರಕಾರ ಪೆರಿಯಾಸ್ಲಾವ್‌ನ ಜನಾಂಗೀಯ ಸಂಯೋಜನೆ ಇಂಚ ಇತ್ತುಂಡು:

ಪೆರಿಯಾಸ್ಲಾವ್‌ನ ಜನಾಂಗೀಯ ಗುಂಪುಗಳು
			ಶೇಕಡಾವಾರು
ಉಕ್ರೇನಿಯನ್ನರು			94.95%
ಉಕ್ರೇನ್‌ನ ರಷ್ಯನ್ನರು			3.91%
ಬೆಲಾರೂಸಿಯನ್ನರು			0.41%
ಅರ್ಮೇನಿಯನ್ನರು			0.18%
ಉಕ್ರೇನ್‌ನ ಪೋಲಿಶ್ ಜನರು			0.08
ಮೊಲ್ಡೊವನ್ನರು			0.07%
ಅಜರ್ಬೈಜಾನಿಯರು			0.05%
ಅಶ್ಕೆನಾಜಿ ಯಹೂದಿಗಳು			0.05%

ಭಾಷೆ

2001ರ ಜನಗಣತಿಯ ಪ್ರಕಾರ ಪೆರಿಯಾಸ್ಲಾವ್‌ನ ನಿವಾಸಿಗಳ ಮಾತೃಭಾಷೆಗಳ ಹಂಚಿಕೆ ಹೀಗಿತ್ತು:

ಭಾಷೆ	ಶೇಕಡಾವಾರು
ಉಕ್ರೇನಿಯನ್ ಭಾಷೆ	95.89%
ರಷ್ಯನ್	3.61%
ಇತರೆ / ನಿರ್ಧರಿಸಲಾಗಿಲ್ಲ	0.50%

ಯಹೂದಿ ಸಮುದಾಯ

ಪೆರಿಯಾಸ್ಲಾವ್‌ನ ಯಹೂದಿ ಸಮುದಾಯದ ಮೊದಲ ದಾಖಲಿತ ಉಲ್ಲೇಖ 1620ರದ್ದು. ಆ ಸಮಯದಲ್ಲಿ ನಗರದ ನಿವಾಸಿಗಳು ಪೆರಿಯಾಸ್ಲಾವ್‌ನಲ್ಲಿ ಯಹೂದಿಗಳ ಸಂಖ್ಯೆ ಮತ್ತು ಪ್ರಭಾವ ಹೆಚ್ಚುತ್ತಿರುವ ಕುರಿತು ರಾಜ ಸಿಗಿಸ್ಮಂಡ್‌ಗೆ ದೂರು ನೀಡಿದ್ದರು. ಮೂರು ವರ್ಷಗಳ ನಂತರದ ಒಪ್ಪಂದದ ಮೂಲಕ ಯಹೂದಿಗಳಿಗೆ ನಗರದ ಇತರ ನಾಗರಿಕರಂತೆ ಕೆಲವು ಹಕ್ಕುಗಳು ಮತ್ತು ಸ್ವಾತಂತ್ರ್ಯಗಳನ್ನು ನೀಡಲಾಯಿತು.

19ನೇ ಶತಮಾನದಲ್ಲಿ ನಗರದ ಯಹೂದಿ ಸಮುದಾಯವು ಗಮನಾರ್ಹವಾಗಿ ವೃದ್ಧಿಯಾಯಿತು. 1897ರ ಜನಗಣತಿಯ ಪ್ರಕಾರ ಪೆರಿಯಾಸ್ಲಾವ್‌ನಲ್ಲಿ 14,614 ನಿವಾಸಿಗಳಿದ್ದು, ಅವರಲ್ಲಿ 5,754 ಮಂದಿ ಯಹೂದಿಗಳಾಗಿದ್ದರು. 1910ರಲ್ಲಿ ನಗರದಲ್ಲಿ ಮೂರು ಯಹೂದಿ ಶಾಲೆಗಳು ಕಾರ್ಯನಿರ್ವಹಿಸುತ್ತಿದ್ದವು.

1881ರಲ್ಲಿ ನಗರದಲ್ಲಿ ಯಹೂದಿಗಳ ವಿರುದ್ಧ ಹಿಂಸಾಚಾರ ನಡೆಯಿತು. 1919ರಲ್ಲಿಯೂ ಮತ್ತೊಂದು ಹಿಂಸಾತ್ಮಕ ಘಟನೆ ನಡೆಯಿತು. 1926ರ ವೇಳೆಗೆ ನಗರದಲ್ಲಿ 3,590 ಯಹೂದಿಗಳು ಇದ್ದರು. ಆ ಸಮಯದಲ್ಲಿ ಎಂಟು ಅಧ್ಯಯನ ಮಂದಿರಗಳು, ಮೂರು ಯಹೂದಿ ಶಾಲೆಗಳು ಮತ್ತು 26 ಕೋಶರ್ ಮಾಂಸದ ಅಂಗಡಿಗಳು ಇದ್ದವು.

1941ರ ಶರತ್ಕಾಲದಲ್ಲಿ ನಗರದ ಹೊರವಲಯದಲ್ಲಿ ಸುಮಾರು 800 ಯಹೂದಿ ನಿವಾಸಿಗಳನ್ನು ಗುಂಡಿಕ್ಕಿ ಕೊಲ್ಲಲಾಯಿತು. 1943ರ ಮೇ 19ರಂದು ಇನ್ನೂ ಏಳು ಯಹೂದಿ ಮಹಿಳೆಯರು ಮತ್ತು ಒಬ್ಬ ಪುರುಷನನ್ನು ಹತ್ಯೆ ಮಾಡಲಾಯಿತು.

ಆರ್ಥಿಕತೆ

ನಗರದಲ್ಲಿ ಕೀವ್ ನದಿ ಬಂದರಿನ ಭಾಗವಾಗಿ ಕಾರ್ಯನಿರ್ವಹಿಸುವ ಪ್ರಮುಖ ನದಿ ಬಂದರು ಇದೆ.

ಶಿಕ್ಷಣ

ವಿಶ್ವವಿದ್ಯಾಲಯ

ಪೆರಿಯಾಸ್ಲಾವ್‌ನ ಉನ್ನತ ಶಿಕ್ಷಣದ ಪರಂಪರೆಯು 18ನೇ ಶತಮಾನದ ಮೊದಲಾರ್ಧಕ್ಕೆ ಹೋಗುತ್ತದೆ. 2 ಅಕ್ಟೋಬರ್ 1738ರಂದು ನಗರದಲ್ಲಿ ಒಂದು ಕೊಲೆಜಿಯಂ ಸ್ಥಾಪಿಸಲಾಯಿತು. 1808ರಲ್ಲಿ ಧಾರ್ಮಿಕ ಶಿಕ್ಷಣ ಸಂಸ್ಥೆಗಳ ಸುಧಾರಣೆಯ ನಂತರ ಪೆರಿಯಾಸ್ಲಾವ್ ಕೊಲೆಜಿಯಂ ಅನ್ನು ಸೆಮಿನರಿಯಾಗಿ ಪರಿವರ್ತಿಸಲಾಯಿತು. ಇದು ಶಿಕ್ಷಕರ ತರಬೇತಿ ಸೇರಿದಂತೆ ಈ ಪ್ರದೇಶದ ಶೈಕ್ಷಣಿಕ ಪರಂಪರೆಯನ್ನು ಮುಂದುವರಿಸಿತು.

1986ರಲ್ಲಿ ಕೀವ್ ಸ್ಟೇಟ್ ಪೆಡಗಾಜಿಕಲ್ ಇನ್‌ಸ್ಟಿಟ್ಯೂಟ್‌ನ ಪೆರಿಯಾಸ್ಲಾವ್-ಖ್ಮೆಲ್ನಿಟ್ಸ್ಕಿ ಶಾಖೆಯಾಗಿ ಆಧುನಿಕ ವಿಶ್ವವಿದ್ಯಾಲಯದ ಪರಂಪರೆ ಮುಂದುವರಿಯಿತು. 1993ರಲ್ಲಿ ಪೆರಿಯಾಸ್ಲಾವ್-ಖ್ಮೆಲ್ನಿಟ್ಸ್ಕಿ ಸ್ಟೇಟ್ ಪೆಡಗಾಜಿಕಲ್ ಇನ್‌ಸ್ಟಿಟ್ಯೂಟ್ ಸ್ಥಾಪಿಸಲಾಯಿತು. 2002ರಲ್ಲಿ ಹ್ರಿಹೊರಿ ಸ್ಕೊವೊರೊಡಾ ಅವರ ಹೆಸರಿನ ರಾಜ್ಯ ಪೆಡಗಾಜಿಕಲ್ ವಿಶ್ವವಿದ್ಯಾಲಯವನ್ನು ಸ್ಥಾಪಿಸಲಾಯಿತು. 14 ಜುಲೈ 2021ರಂದು ಸಂಸ್ಥೆಗೆ ಹ್ರಿಹೊರಿ ಸ್ಕೊವೊರೊಡಾ ವಿಶ್ವವಿದ್ಯಾಲಯ, ಪೆರಿಯಾಸ್ಲಾವ್ ಎಂಬ ಅಧಿಕೃತ ಹೆಸರು ನೀಡಲಾಯಿತು.

ಪ್ರಮುಖ ಸ್ಥಳಗಳು

ಪೆರಿಯಾಸ್ಲಾವ್ ತನ್ನ ಐತಿಹಾಸಿಕ ಕಟ್ಟಡಗಳು ಮತ್ತು ವಸ್ತುಸಂಗ್ರಹಾಲಯಗಳಿಗಾಗಿ ಪ್ರಸಿದ್ಧವಾಗಿದೆ. ಪ್ರಮುಖ ಸ್ಥಳಗಳು:

• ಮಧ್ಯ ಡ್ನಿಪ್ರೋ ಉಕ್ರೇನ್‌ನ ಜನಪದ ವಾಸ್ತುಶಿಲ್ಪ ಮತ್ತು ಜೀವನಶೈಲಿಯ ವಸ್ತುಸಂಗ್ರಹಾಲಯ
• ರೊಟ್ಟಿಯ ವಸ್ತುಸಂಗ್ರಹಾಲಯ
• ಭೂ ಸಾರಿಗೆ ವಸ್ತುಸಂಗ್ರಹಾಲಯ
• ರುಶ್ನಿಕ್ ವಸ್ತುಸಂಗ್ರಹಾಲಯ
• ಬಾಹ್ಯಾಕಾಶ ಅನ್ವೇಷಣೆಯ ವಸ್ತುಸಂಗ್ರಹಾಲಯ
• ಅಂಚೆ ಸೇವೆಗಳ ವಸ್ತುಸಂಗ್ರಹಾಲಯ
• ಜೇನುಸಾಕಣೆಯ ವಸ್ತುಸಂಗ್ರಹಾಲಯ
• ಅನ್ವಯಿಕ ಮತ್ತು ಅಲಂಕಾರಿಕ ಕಲೆಗಳ ವಸ್ತುಸಂಗ್ರಹಾಲಯ
• ಉಕ್ರೇನಿಯನ್ ಸಾಂಪ್ರದಾಯಿಕ ಆಚರಣೆಗಳ ವಸ್ತುಸಂಗ್ರಹಾಲಯ
• ಪುರಾತತ್ವ ವಸ್ತುಸಂಗ್ರಹಾಲಯ
• ಕೊಸಾಕ್ ವೈಭವದ ವಸ್ತುಸಂಗ್ರಹಾಲಯ
• ಟ್ರಿಪಿಲಿಯಾ ಸಂಸ್ಕೃತಿಯ ವಸ್ತುಸಂಗ್ರಹಾಲಯ
• ಉಕ್ರೇನಿಯನ್ ಸಾಂಪ್ರದಾಯಿಕ ಉಡುಪುಗಳ ವಸ್ತುಸಂಗ್ರಹಾಲಯ
• 10–11ನೇ ಶತಮಾನಗಳ ಪುರಾತತ್ತ್ವಶಾಸ್ತ್ರೀಯ ಉತ್ಖನನ ಅವಶೇಷಗಳು
• ಸಂತ ಮೈಕೆಲ್ ಚರ್ಚ್ (1646–1666)
• ಅಸೆನ್ಶನ್ ಮಠ ಮತ್ತು ಅದರ ಕ್ಯಾಥೆಡ್ರಲ್ (1695–1700).

ಅಂತರರಾಷ್ಟ್ರೀಯ ಸಂಬಂಧಗಳು

ಉಕ್ರೇನ್‌ನ ಅವಳಿ ಪಟ್ಟಣಗಳು ಮತ್ತು ಸಹೋದರ ನಗರಗಳ ಪಟ್ಟಿ

ಅವಳಿ ಪಟ್ಟಣಗಳು – ಸಹೋದರ ನಗರಗಳು

ಪೆರಿಯಾಸ್ಲಾವ್ ಈ ಕೆಳಗಿನ ನಗರಗಳೊಂದಿಗೆ ಅವಳಿ ನಗರ ಸಂಬಂಧವನ್ನು ಹೊಂದಿದೆ:

• ಮರಿಯುಪೋಲ್, ಉಕ್ರೇನ್
• ಮ್ಶ್ಖೇಟಾ, ಜಾರ್ಜಿಯಾ
• ಪೈಡೆ, ಎಸ್ಟೋನಿಯಾ
• ಕೊಚಾನಿ, ಉತ್ತರ ಮ್ಯಾಸಿಡೋನಿಯಾ

ಗಮನಾರ್ಹ ವ್ಯಕ್ತಿಗಳು

• ಪಾವ್ಲೊ ಟೆಟೆರಿಯಾ (1620ರ ದಶಕ–1670) – ಉಕ್ರೇನಿಯನ್ ಹೆಟ್ಮನ್.
• ಒಲೆಹ್ ಬಾಬಿಶ್ಕಿನ್ (1918–1991) – ಉಕ್ರೇನಿಯನ್ ಸಾಹಿತ್ಯ ವಿದ್ವಾಂಸ ಮತ್ತು ಕಲಾ ಇತಿಹಾಸಕಾರ.
• ಶೋಲೆಮ್ ಅಲೆಖೆಮ್ (1859–1916) – ಯಹೂದಿ-ಉಕ್ರೇನಿಯನ್ ಯಿಡ್ಡಿಷ್ ಭಾಷೆಯ ಲೇಖಕ ಮತ್ತು ನಾಟಕಕಾರ.
• ಮೆಯರ್ ಬ್ಲಿಂಕೆನ್ (1879–1915) – ಯಹೂದಿ-ಅಮೆರಿಕನ್ ಲೇಖಕ.
• ಲ್ಯುಡ್ಮಿಲಾ ಮೆಖ್ (ಜನನ 1951) – ಉಕ್ರೇನಿಯನ್ ಪತ್ರಕರ್ತೆ.
• ಪೆಟ್ರೊ ಖೊಲೊಡ್ನಿ (1875–1930) – ಉಕ್ರೇನಿಯನ್ ರಾಜಕಾರಣಿ, ಸಾರ್ವಜನಿಕ ವ್ಯಕ್ತಿ, ಉಕ್ರೇನಿಯನ್ ಸೆಂಟ್ರಲ್ ರಾಡಾದ ಸದಸ್ಯ ಮತ್ತು ಉಕ್ರೇನಿಯನ್ ಪೀಪಲ್ಸ್ ರಿಪಬ್ಲಿಕ್‌ನ ಸಾರ್ವಜನಿಕ ಶಿಕ್ಷಣ ಸಚಿವ.
• ಹನ್ನಾ ಕ್ನ್ಯಾಜ್ಯೆವಾ-ಮಿನೆಂಕೊ (ಜನನ 1989) – ಉಕ್ರೇನಿಯನ್-ಇಸ್ರೇಲಿ ತ್ರಿವಿಧ ಜಿಗಿತ ಮತ್ತು ಉದ್ದ ಜಿಗಿತ ಕ್ರೀಡಾಪಟು.
• ಲೂಯಿಸ್ ನೆವೆಲ್ಸನ್ (1899–1988) – ಅಮೆರಿಕನ್ ಶಿಲ್ಪಿ."Pereiaslav". Retrieved 19 ಆಗಸ್ಟ್ 2026.

== ಚಿತ್ರಸಂಪುಟ ==

• 
  ಸಂತ ಜಾರ್ಜ್ ಚರ್ಚ್

ಬಾಹ್ಯ ಸಂಪರ್ಕಗಳು

• ಪೆರಿಯಾಸ್ಲಾವ್ ನಗರ ಮಂಡಳಿ
• ಹ್ರಿಹೊರಿ ಸ್ಕೊವೊರೊಡಾ ವಿಶ್ವವಿದ್ಯಾಲಯ, ಪೆರಿಯಾಸ್ಲಾವ್
• ಪೆರಿಯಾಸ್ಲಾವ್ – ವಿಕಿಮೀಡಿಯ ಕಾಮನ್ಸ್