ದಿವ್ಯಾ ಸತ್ಯರಾಜ್

ದಿವ್ಯಾ ಸತ್ಯರಾಜ್
೨೦೧೪ ರಲ್ಲಿ, ದಿವ್ಯಾರವರು
ಜನನ	(1985-10-24) 24 October 1985 ಚೆನ್ನೈ, ತಮಿಳುನಾಡು, ಭಾರತ
ಶಿಕ್ಷಣ	ಮದ್ರಾಸ್ ವಿಶ್ವವಿದ್ಯಾಲಯ
ವೃತ್ತಿ	ಪೌಷ್ಟಿಕತಜ್ಞ
ರಾಜಕೀಯ ಪಕ್ಷ	ಡಿಎಮ್‌ಕೆ
ಸಂಬಂಧಿಕರು	ಸತ್ಯರಾಜ್ (ತಂದೆ) ಸಿಬಿರಾಜ್ (ಸಹೋದರ)

ದಿವ್ಯಾ ಸತ್ಯರಾಜ್ ಇವರು ಭಾರತೀಯ ಪೌಷ್ಟಿಕತಜ್ಞೆಯಾಗುದ್ದು, ನಟ ಸತ್ಯರಾಜ್ ಅವರ ಪುತ್ರಿ ಮತ್ತು ಸಿಬಿ ಅವರ ಸಹೋದರಿಯಾಗಿದ್ದಾರೆ. ದಿವ್ಯಾ ಅವರು ಶಾಲಾ ಮಕ್ಕಳಿಗಾಗಿ ಭಾರತ ಸರ್ಕಾರದ ಮಧ್ಯಾಹ್ನದ ಬಿಸಿಯೂಟ ಯೋಜನೆಯನ್ನು ಅನುಷ್ಠಾನಗೊಳಿಸುತ್ತಿರುವ ಎನ್‌ಜಿಒ ದಿ ಅಕ್ಷಯ ಪಾತ್ರಾ ಫೌಂಡೇಶನ್ (ಟಿಎಪಿಎಫ್) ನ ಸದ್ಭಾವನಾ ರಾಯಭಾರಿಯಾಗಿದ್ದಾರೆ. ಅಪೌಷ್ಟಿಕತೆ ಮತ್ತು ಸೌಲಭ್ಯ ವಂಚಿತರಿಗೆ ಆರೋಗ್ಯಕರ ಮತ್ತು ಪೌಷ್ಟಿಕ ಆಹಾರವನ್ನು ಉಚಿತವಾಗಿ ಒದಗಿಸುವ ಉಪಕ್ರಮವಾದ ಮಹಿಲ್ಮಧಿ ಇಯಕ್ಕಂ ಎಂಬ ಆಂದೋಲನವನ್ನು ಅವರು ೨೦೨೦ ರಲ್ಲಿ, ಪ್ರಾರಂಭಿಸಿದ್ದಾರೆ.

ವೈಯಕ್ತಿಕ ಜೀವನ

ದಿವ್ಯಾರವರು ನಟ ಸತ್ಯರಾಜ್ ಮತ್ತು ಮಹೇಶ್ವರಿ ದಂಪತಿಯ ಪುತ್ರಿ. ದಿವ್ಯಾ ಅವರ ಹಿರಿಯ ಸಹೋದರ ನಟ ಸಿಬಿ. ತಮ್ಮ ತಂದೆ ಮತ್ತು ಹಿರಿಯ ಸಹೋದರನಂತಲ್ಲದೆ, ದಿವ್ಯಾರವರು ನಟನೆಯಿಂದ ದೂರವಿದ್ದರು. ಬದಲಿಗೆ ಪೌಷ್ಠಿಕಾಂಶದ ವೃತ್ತಿಜೀವನವನ್ನು ಮುಂದುವರಿಸಿದರು. ೨೦೧೬ ರಲ್ಲಿ, ಮೂಲತಃ ಅವರು ಸಸ್ಯಾಹಾರಿಯಾದರು.

ವೃತ್ತಿಜೀವನ

ದಿವ್ಯಾರವರು ಮದ್ರಾಸ್ ವಿಶ್ವವಿದ್ಯಾಲಯದಿಂದ ಪೋಷಣೆಯಲ್ಲಿ ಮಾಸ್ಟರ್ ಆಫ್ ಫಿಲಾಸಫಿ ಪದವಿ ಪಡೆದರು. ಅವರು ಆರೋಗ್ಯ ಸಂಬಂಧಿತ ವಿಷಯಗಳು, ಬಾಲಕಾರ್ಮಿಕ ಪದ್ಧತಿ ಮತ್ತು ಮಹಿಳೆಯರಿಗೆ ಸ್ವರಕ್ಷಣೆ ಮತ್ತು ಶ್ರೀಲಂಕಾ ನಿರಾಶ್ರಿತರಿಗೆ ಸಮಾಲೋಚನೆ ಅಧಿವೇಶನಗಳ ಬಗ್ಗೆ ಕಾರ್ಯಾಗಾರಗಳನ್ನು ನಡೆಸುತ್ತಾರೆ. ವೈದ್ಯಕೀಯ ಕ್ಷೇತ್ರದಲ್ಲಿನ ದುಷ್ಕೃತ್ಯಗಳು ಮತ್ತು ನಿರ್ಲಕ್ಷ್ಯವನ್ನು ಎತ್ತಿ ತೋರಿಸಲು ಮತ್ತು ನೀಟ್ ಪರೀಕ್ಷೆಗಳನ್ನು ಪ್ರಶ್ನಿಸಿ ಅವರು ಭಾರತದ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಪತ್ರ ಬರೆದಿದ್ದರು. ಅವರು ವಿಶ್ವದ ಅತಿದೊಡ್ಡ ಮಧ್ಯಾಹ್ನದ ಊಟದ ಕಾರ್ಯಕ್ರಮವಾದ ಅಕ್ಷಯ ಪಾತ್ರಾ ಫೌಂಡೇಶನ್‌ನ ಸದ್ಭಾವನಾ ರಾಯಭಾರಿಯಾಗಿದ್ದಾರೆ. ಅವರು ವರ್ಲ್ಡ್ ವಿಷನ್ ಇಂಡಿಯಾದೊಂದಿಗೆ ಪಾಲುದಾರರಾಗಿದ್ದಾರೆ. ಅಲ್ಲಿ, ಅವರು ನಾಲ್ಕು ಯುವತಿಯರ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದಾರೆ.

ದಿವ್ಯಾರವರು ೨೦೨೦ ರಲ್ಲಿ, ಮಹಿಲ್ಮಧಿ ಇಯಕ್ಕಂ ಎಂಬ ಆಂದೋಲನವನ್ನು ಪ್ರಾರಂಭಿಸಿದರು. ಈ ಆಂದೋಲನದ ಬಗ್ಗೆ ಅವರು ಹೀಗೆ ಹೇಳುತ್ತಾರೆ, "ನಗರದಲ್ಲಿ ಪೌಷ್ಟಿಕ ಆಹಾರದ ಕೊರತೆಯಿರುವ ಪ್ರದೇಶಗಳನ್ನು ಗುರುತಿಸುವುದು ಮತ್ತು ಅದರ ಪ್ರಯೋಜನಗಳ ಬಗ್ಗೆ ಅರಿವು ಮೂಡಿಸುವುದು ಈ ಆಂದೋಲನದ ಉದ್ದೇಶವಾಗಿದೆ. ಪ್ರದೇಶಗಳನ್ನು ಗುರುತಿಸಿ ಸಮುದಾಯದ ಸದಸ್ಯರನ್ನು ನಿರ್ಣಯಿಸಿದ ನಂತರ, ಅಗತ್ಯವಿರುವ ನೆರೆಹೊರೆಯವರಿಗೆ, ಕೊರತೆಗಳ ಆಧಾರದ ಮೇಲೆ ಉಚಿತವಾಗಿ ಆರೋಗ್ಯಕರ ಆಹಾರವನ್ನು ನೀಡಲಾಗುವುದು". ೨೦೧೯ ರಲ್ಲಿ, ದಿವ್ಯಾರವರು ೨೦೨೧ ರಂದು ರಾಜಕೀಯಕ್ಕೆ ಪ್ರವೇಶಿಸುವುದಾಗಿ ಘೋಷಿಸಿದರು.

ಪ್ರಶಸ್ತಿಗಳು

೨೦೧೯ ರಲ್ಲಿ, ಮಾಧ್ಯಮ ಮತ್ತು ಮನರಂಜನೆಯ ಮೂಲಕ ಸಾಮಾಜಿಕ ಜಾಗೃತಿಯನ್ನು ಹರಡುವ ಯುವ-ಆಧಾರಿತ ಸಾಮಾಜಿಕ ಸಂಸ್ಥೆಯಾದ ರೇನ್‌ಡ್ರಾಪ್ಸ್‌ನಿಂದ ಸಮುದಾಯ ಸೇವೆಯಲ್ಲಿ ಶ್ರೇಷ್ಠತೆಗಾಗಿ ದಿವ್ಯಾ ಅವರಿಗೆ ಮಹಿಳಾ ಸಾಧಕಿ ಪ್ರಶಸ್ತಿಯನ್ನು ನೀಡಲಾಯಿತು. ೨೦೨೦ ರಲ್ಲಿ, ಪೌಷ್ಠಿಕಾಂಶ ಚಿಕಿತ್ಸಾ ಕ್ಷೇತ್ರದಲ್ಲಿ ಅವರ ಕೊಡುಗೆಗಳಿಗಾಗಿ ಅಮೆರಿಕದ, ಅಂತರರಾಷ್ಟ್ರೀಯ ತಮಿಳು ವಿಶ್ವವಿದ್ಯಾಲಯವು ಅವರಿಗೆ ಗೌರವ ಡಾಕ್ಟರೇಟ್ ಪದವಿಯನ್ನು ನೀಡಿತು.

ರಾಜಕೀಯ ವೃತ್ತಿಜೀವನ

ಡಿಸೆಂಬರ್ ೧೯ ರಂದು ಚೆನ್ನೈನಲ್ಲಿರುವ ಪಕ್ಷದ ಪ್ರಧಾನ ಕಚೇರಿ ಅಣ್ಣಾ ಅರಿವಲಯಂನಲ್ಲಿ ಮುಖ್ಯಮಂತ್ರಿ ಎಂ. ಕೆ. ಸ್ಟಾಲಿನ್ ಅವರ ಸಮ್ಮುಖದಲ್ಲಿ ದಿವ್ಯಾರವರು ದ್ರಾವಿಡ ಮುನ್ನೇತ್ರ ಕಳಗಂ (ಡಿಎಂಕೆ) ಗೆ ಸೇರಿದರು.