ತೆಕ್ಕೆಕೆರೆ ಸುಬ್ರಹ್ಮಣ್ಯ ಭಟ್ಟ

ಕಾವ್ಯ-ಪದ್ಯಗಳನ್ನು ರಾಗವಾಗಿ ಓದುವಂತಹ ವಿಶಿಷ್ಟವಾದ ಕಲೆಯನ್ನು ಗಮಕ ^[೧] ಎನ್ನುತ್ತೇವೆ. ಓದುವವರನ್ನು ಗಮಕಿ^[೨]ಗಳೆನ್ನುತ್ತೇವೆ. ಹಳೆಯ ಕಾವ್ಯಗಳನ್ನು ಈ ರೀತಿ ಓದುವ ಗಮಕಿಗಳಲ್ಲಿ ತೆಕ್ಕೆಕೆರೆ ಸುಬ್ರಹ್ಮಣ್ಯ ಭಟ್ಟರೂ ಒಬ್ಬರು.^[೩]

ಜನನ

ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯ ಕಾಸರಗೋಡು ತಾಲೂಕಿನ ಕಾರಡ್ಕ ಗ್ರಾಮದ ತೆಕ್ಕೆಕೆರೆಯಲ್ಲಿ ೧೯೪೬ ರ ದಶಂಬರ ೧೦ ರಂದು ಜನಿಸಿದರು. ಕಡೆಂಗೋಡ್ಲು ಮೂಲದ ತೆಕ್ಕೆಕೆರೆ-ಪೈಕ್ಕಾನ ಶಂಭು ಭಟ್ಟ-ಗೌರಮ್ಮನವರು ಇವರ ಮಾತಾ-ಪಿತರು.

ವಿದ್ಯಾಭ್ಯಾಸ

ಏತಡ್ಕ ಏಡೆಡ್ ಎಲಿಮೆಂಟರಿ ಶಾಲೆ,ಅಗಲ್ಪಾಡಿ ಶ್ರೀ ಅನ್ನಪೂರ್ಣೇಶ್ವರೀ ಸಂಸ್ಕೃತ ಪ್ರೌಢಶಾಲೆಗಳಲ್ಲಿ ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ.

ಮೈಸೂರು ವಿಶ್ವವಿದ್ಯಾಲಯದಲ್ಲಿ ಕನ್ನಡ ಸ್ನಾತಕೋತ್ತರ ಪದವಿ.

ಹಿಂದಿ ರಾಷ್ಟ್ರಭಾಷಾ ಪರೀಕ್ಷೆ (ದಕ್ಷಿಣ ಭಾರತದ ಹಿಂದೀ ಪ್ರಚಾರ ಸಭೆ) ಹಾಗೂ ಸಂಸ್ಕೃತ ರಾಷ್ಟ್ರ ಭಾಷಾ ಪರೀಕ್ಷೆ ( ಭಾರತೀಯ ವಿದ್ಯಾ ಭವನ ಮುಂಬಯಿ ) ಗಳಲ್ಲಿ ತೇರ್ಗಡೆಯಾಗಿರುತ್ತಾರೆ.

ವೃತ್ತಿ

ಭಾರತೀಯ ಅಂಚೆ ತಂತಿ ಇಲಾಖೆ/ಬಿ.ಎಸ್.ಎನ್.ಎಲ್. ಗಳಲ್ಲಿ ದೂರವಾಣಿ ತಂತ್ರಜ್ಞರಾಗಿಯೂ,ತಾಂತ್ರಿಕ ಮೇಲ್ವಿಚಾರಕರಾಗಿಯೂ, ಹಿರಿಯ ತಾಂತ್ರಿಕ ಸಹಾಯಕರಾಗಿಯೂ ಸೇವೆ ಸಲ್ಲಿಸಿರುತ್ತಾರೆ. ೧೯೬೫ ರಿಂದ ೨೦೦೬ ರವರೆಗೆ ಸೇವೆ ಸಲ್ಲಿಸಿ, ೨೦೦೬ ರ ದಶಂಬರ ೩೧ ರಂದು ಬೆಳ್ತಂಗಡಿ ಯಲ್ಲಿ ನಿವೃತ್ತರಾದರು.

ಕನ್ನಡ ಗೌರವ ಪ್ರಾಧ್ಯಾಪಕರಾಗಿ ಸುಮಾರು ೧೨ ವರ್ಷಗಳ ಕಾಲ ಚಿತ್ರದುರ್ಗ ದಲ್ಲಿ ಸೇವೆಯನ್ನು ನೀಡಿದ್ದರು.

ಪ್ರವೃತ್ತಿ

ಸಾಹಿತಿ, ಕವಿ, ಗಮಕಿಯಲ್ಲದೆ, ಹರಿಕಥೆ-ಯಕ್ಷಗಾನ-ನಾಟಕಗಳಲ್ಲಿ ಪಾತ್ರಾಭಿನಯವನ್ನೂ ಮಾಡಿದ್ದಾರೆ. ಬಿಡಿ ಲೇಖನಗಳ ಹವ್ಯಾಸವೂ ಇವರಿಗಿದೆ. ವಿದ್ವಾನ್ ಕೈಂತಜೆ ನರಸಿಂಹ ಭಟ್ಟ ಮೊದಲಾದ ಗಮಕಿಗಳೊಡನೆ ವ್ಯಾಖ್ಯಾನವನ್ನೂ ಮಾಡಿದ್ದಾರೆ.

ಕಲಾಸೇವೆಗಳು

೧೯೮೪-೮೫ ರಲ್ಲಿ ಗಮಕಿಗಳಾಗಿ ಗಮಕ ಕ್ಷೇತ್ರಕ್ಕೆ ಪ್ರವೇಶಗೈದ ಇವರ ಗುರುಗಳು ಚಿತ್ರದುರ್ಗದ ಗಮಕ ಸಹೋದರರಾದ ಶ್ರೀ ಜಿ.ಶೇಷಾಚಲಯ್ಯ ( ವ್ಯಾಖ್ಯಾನ) ಹಾಗೂ ಶ್ರೀ ಜಿ. ಚಂದ್ರಶೇಖರಯ್ಯ (ಗಮಕ ವಾಚನ)

೧೯೮೪ ರಿಂದ ಕರ್ನಾಟಕ ಗಮಕಕಲಾ ಪರಿಷತ್ತು ಕನ್ನಡ ಸಾಹಿತ್ಯ ಪರಿಷತ್ತಿನ ಸದಸ್ಯರಾಗಿದ್ದಾರೆ.

ಕರ್ನಾಟಕ ಗಮಕಕಲಾ ಪರಿಷತ್ತಿನ ಗಮಕ ಪ್ರಥಮ, ಕಾಜಾಣ, ಪಾರೀಣ ಪರೀಕ್ಷೆಗಳಲ್ಲಿ ತೇರ್ಗಡೆಯಾಗಿ, ಕಾಜಾಣ ಪರೀಕ್ಷೆಯಲ್ಲಿ ರಾಜ್ಯಕ್ಕೆ ಪ್ರಥಮ ಸ್ಥಾನ ಪಡೆದು ೧೯೮೫ ರಲ್ಲಿ ಭೂಪಾಲಂ ದತ್ತಿ ನಿಧಿ ಯ ಗೌರವವನ್ನು ಪಡೆದಿದ್ದಾರೆ.

೧೯೮೪ ರಿಂದ ೧೯೯೩ ರ ಅವಧಿಯಲ್ಲಿ ಚಿತ್ರದುರ್ಗ ಗಮಕಕ ಲಾಭಿಮಾನಿಗಳ ಸಂಘದಲ್ಲಿ ಗಮಕ - ವಾಚನ ವ್ಯಾಖ್ಯಾನವನ್ನು ಮಾಡಿದ್ದಾರೆ.

೧೯೮೪ ರಿಂದ ೨೦೦೭ ರ ಅವಧಿಯಲ್ಲಿ ಚಿತ್ರದುರ್ಗ ಮತ್ತು ದಕ್ಷಿಣ ಕನ್ನಡ ಜಿಲ್ಲೆ ಗಳಲ್ಲಿ ಕರ್ನಾಟಕ ಗಮಕಕಲಾ ಪರಿಷತ್ತಿನ ಜಿಲ್ಲಾ ಪ್ರತಿನಿಧಿಯಾಗಿ ಗಮಕಕಲಾ ಪ್ರಚಾರವನ್ನು ಮಾಡಿದ್ದಾರೆ.^[೪]
ಕರ್ನಾಟಕ ಗಮಕಕಲಾಪರಿಷತ್ತಿನ ಗಮಕ ತರಗತಿಗಳನ್ನು ಚಿತ್ರದುರ್ಗ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ಯಲ್ಲಿ ನಡೆಸಿ ಅನೇಕರಿಗೆ ಮಾರ್ಗದರ್ಶನವನ್ನೂ ಮಾಡಿದ್ದಾರೆ.

ಪರಿಷತ್ತಿನ ಗಮಕ ಪರೀಕ್ಷೆಗಳಲ್ಲಿ ಪರೀಕ್ಷಕರಾಗಿ ಸಹಕಾರವನ್ನು ನೀಡುತ್ತಾರೆ.

ವಿಶ್ವ ಕನ್ನಡ ಸಮ್ಮೇಳನದ ಅಂಗವಾಗಿ, ಬಿಜಾಪುರ ನಗರ, ಬೀದರ, ಗುಲ್ಬರ್ಗ ಜಿಲ್ಲೆಗಳಲ್ಲಿ ಜಿ. ಶೇಷಾಚಲಯ್ಯನವರೊಂದಿಗೆ ಗಮಕ ವಾಚನಕಾರರಾಗಿ ಕೆಲಸವನ್ನು ಮಾಡಿದ್ದಾರೆ.

೧೯೯೩ ರಿಂದ೨೦೦೬ ರ ವರೆಗೆ, ದಕ್ಷಿಣ ಕನ್ನಡ ಜಿಲ್ಲೆಯ ಪ್ರತಿನಿಧಿಯಾಗಿ ಕಾಸರಗೋಡಿನಿಂದ ಉತ್ತರ ಕರ್ಣಾಟಕದ ಬೈಂದೂರು ವರೆಗೆ ಗಮಕಕಲಾ ಪ್ರಚಾರವನ್ನು ಮಾಡಿದ್ದಾರೆ.

೧೯೯೭ ರಿಂದ ೨೦೦೬ ರ ತನಕದ ಅವಧಿಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಪುನರೂರು, ಸುರತ್ಕಲ್, ಕುಕ್ಕೆ ಸುಬ್ರಹ್ಮಣ್ಯ, ಮುಳಿಯ, ಕಾಸರಗೋಡಿನ ಎಡನೀರು ಕ್ಷೇತ್ರದಲ್ಲಿ ಜಿಲ್ಲಾ ಸಮ್ಮೇಳನಗಳನ್ನು ನಡೆಸಿದ್ದಾರೆ.

ಮುಂಬಯಿ, ನವದೆಹಲಿಗಳಲ್ಲಿ ಕನ್ನಡ ಕಾವ್ಯಗಳ ಗಮಕ ವಾಚನ -ವ್ಯಾಖ್ಯಾನಗಳು, ಮುಂಬಯಿ ಯ ಅಖಿಲ ಭಾರತ ಪ್ರಥಮ ಗಮಕಕಲಾ ಸಮ್ಮೇಳನದಲ್ಲಿ ಭಾಗವಹಿಸುವಿಕೆ ಹಾಗೂ ಬೆಳಗಾವಿ ಯ ವಿಶ್ವ ಕನ್ನಡ ಸಮ್ಮೇಳನ ದಲ್ಲಿ ಗಮಕ ರೂಪಕದ ಪಾತ್ರಧಾರಿಯಾಗಿಯೂ ಮಿಂಚಿದ್ದಾರೆ.

೨೦೦೯--೨೦೧೦ ರ ಅವಧಿಯಲ್ಲಿ ಡಾ | ಎಂ. ವೀರಪ್ಪ ಮೊಯ್ಲಿ ಯವರ ಶ್ರೀ ರಾಮಾಯಣ ಮಹಾನ್ವೇಷಣಂ ಕಾವ್ಯದ ಪ್ರಥಮ ಸಂಪುಟದ ೨೬ ಕಾರ್ಯಕ್ರಮಗಳಲ್ಲಿ ರಾಜ್ಯದಲ್ಲಲ್ಲದೆ ಕಾಸರಗೋಡು, ಮುಂಬಯಿ, ನವ ದೆಹಲಿ ಗಳಲ್ಲಿ ಗಮಕ ವ್ಯಾಖ್ಯಾನಕಾರರಾಗಿ ಪಾಲ್ಗೊಂಡಿದ್ದಾರೆ.

೨೦೧೭ ರಲ್ಲಿ ನವ ದೆಹಲಿಯ ಜವಾಹರಲಾಲ್ ನೆಹರು ವಿಶ್ವವಿದ್ಯಾನಿಲಯದಲ್ಲಿ ರನ್ನ ನ ಸಾಹಸ ಭೀಮ ವಿಜಯದ ಇಂಗ್ಲೀಷ್ ಅವತರಣಿಕೆಯ ಬಿಡುಗಡೆಯ ಸಂದರ್ಭದಲ್ಲಿ ಅದರ ವಾಚನವನ್ನು ಮಾಡಿದ್ದಾರೆ.

ಶ್ರೀ ಶ್ರೀ ರಾಘವೇಶ್ವರ ಭಾರತೀ ಸ್ವಾಮಿಗಳ ಶ್ರೀಮದ್ವಾಲ್ಮೀಕಿ ರಾಮಾಯಣದ ವ್ಯಾಖ್ಯಾನಕ್ಕೆ ಹಾಗೂ ಎ.ಬಿ.ಎಲ್. ನಾಗರಾಜರ ದೇವೀಭಾಗವತ ವ್ಯಾಖ್ಯಾನಕ್ಕೆ ಸಂಸ್ಕೃತ ಶ್ಲೋಕಗಳ ಗಮಕ ವಾಚನವನ್ನು ಮಾಡಿದ್ದಾರೆ.

ವಿ || ಬಿ.ಎಸ್.ಎಸ್. ಕೌಶಿಕರ ಗುರು ಚರಿತ್ರೆ ಮತ್ತು ಕುವೆಂಪು ಪ್ರತಿಷ್ಠಾನ ಕುಪ್ಪಳಿ ಯವರ ಶ್ರೀ ರಾಮಾಯಣ ದರ್ಶನಂ ಇವುಗಳ ಧ್ವನಿ ಸುರುಳಿ ಹಾಗೂ ಅಡಕಗಳಲ್ಲಿ ಮೈಸೂರಿನ ಪರಂಪರೆ ಎಂಬ ಸಂಸ್ಥೆಯ ಕುಮಾರವ್ಯಾಸ ಭಾರತ ಅಡಕ ಧ್ವನಿ ಮುದ್ರಿಕೆಯ ವ್ಯಾಖ್ಯಾನಕಾರರಾಗಿ ಸಹಕಾರ ನೀಡಿದ್ದಾರೆ.

ಅಗ್ನಿ ಸೇವಾ ಟ್ರಸ್ಟ್ ಬೆಂಗಳೂರು ಇವರ ತುರಂಗ ಭಾರತ ದ ಪ್ರಚಾರ ಹಾಗೂ ಧ್ವನಿಸುರುಳಿಗೆ ವಾಚನವನ್ನು ಮಾಡಿದ್ದಾರೆ.

ಮಂಗಳೂರು, ಮೈಸೂರು, ಚಿತ್ರದುರ್ಗ ಆಕಾಶವಾಣಿ ಗಳಲ್ಲೂ ಬೆಂಗಳೂರು ದೂರದರ್ಶನ ದಲ್ಲೂ ಇವರ ಚಿಂತನ, ಸ್ವರಚಿತ ಕವನ ವಾಚನ, ಗಮಕ ಸಂಬಂಧೀ ವಾಚನ- ಭಾಷಣಗಳು ಪ್ರಸಾರವಾಗಿವೆ.

ಹುದ್ದೆಗಳು

೨೦೦೧ ರಲ್ಲಿ ದಕ್ಷಿಣ ಕನ್ನಡ ಜಿಲ್ಲಾ ೧೨ ನೆಯ ಸಾಹಿತ್ಯ ಸಮ್ಮೇಳನದಲ್ಲಿ ಗಮಕಗೋಷ್ಠಿಯ ಅಧ್ಯಕ್ಷ ಸ್ಥಾನ.
ಗಮಕ ಕಲಾ ಸಮ್ಮೇಳನದ ಅಧ್ಯಕ್ಷತೆ
೨೦೦೭ ರಿಂದ ೨೦೧೩ ರ ಅವಧಿಯಲ್ಲಿ ಕರ್ನಾಟಕ ಗಮಕಕಲಾ ಪರಿಷತ್ತಿನ ಉಪಾಧ್ಯಕ್ಷರಾಗಿಯೂ ೨೦೧೩ ರಿಂದ ೨೦೧೭ ರ ಅವಧಿಯಲ್ಲಿ ಕಾರ್ಯದರ್ಶಿಯಾಗಿಯೂ ಸೇವೆ.
೨೦೧೩ ರ ಜನವರಿಯಲ್ಲಿ ಮೂಡುಬಿದಿರೆ ಯಲ್ಲಿ ನಡೆದ ದಕ್ಷಿಣ ಕನ್ನಡ ಜಿಲ್ಲಾ ೬ ನೆಯ ಗಮಕ ಕಲಾ ಸಮ್ಮೇಳನದ ಅಧ್ಯಕ್ಷ ಸ್ಥಾನ.
೨೦೨೩ ರ ಏಪ್ರಿಲ್ ೧೬,೧೭ ರಂದು ಬೆಳಗಾವಿ ಯಲ್ಲಿ ನಡೆದ ೧೩ ನೆಯ ಅಖಿಲ ಕರ್ಣಾಟಕ ಗಮಕಕಲಾ ಸಮ್ಮೇಳನದ ಅಧ್ಯಕ್ಷ ಸ್ಥಾನ.
ಅಖಿಲ ಹವ್ಯಕ ಮಹಾಸಭೆ ಹಾಗೂ ಶ್ರೀ ರಾಮಚಂದ್ರಾಪುರ ಮಠ ಇವರ ಸಂಯೋಜನೆಯಲ್ಲಿ ಗೋಕರ್ಣ ದಲ್ಲಿ ಜರುಗಲಿರುವ ( ೧೭-೦೮-೨೦೨೫ ) ಸ್ವಭಾಷಾ ಚಾತುರ್ಮಾಸ್ಯದ ಸಂದರ್ಭದಲ್ಲಿ ಸವಿಗನ್ನಡ ಗೋಷ್ಠಿಯ ಸಂಚಾಲಕರಾಗಿ ಕಾರ್ಯ ನಿರ್ವಹಿಸಲಿದ್ದಾರೆ.

ಪ್ರಶಸ್ತಿಗಳು

ಉಂಡೆಮನೆಯವರ ಉಂಡೆಮನೆ ಶಂಭುಭಟ್ಟ ಪ್ರಶಸ್ತಿ

ಅಗ್ನಿಸೇವಾ ಟ್ರಸ್ಟ್ ನವರ ಮಹಾಕವಿ ಪರಮದೇವ ಪ್ರಶಸ್ತಿ

ಅಖಿಲ ಹವ್ಯಕ ಮಹಾಸಭೆ_ಬೆಂಗಳೂರು ಇವರ ವಿದ್ವತ್ ಸನ್ಮಾನ

ಹಾಸನ ಜಿಲ್ಲಾ ಗಮಕ ಸಂಘದಿಂದ ಗಮಕ ಕಲಾ ತಪಸ್ವಿ ಪ್ರಶಸ್ತಿ

ಕುಮಟಾ ಹವ್ಯಕ ಸಂಘ ಹಾಗೂ ಚಿತ್ರದುರ್ಗ ಗಮಕ ಕಲಾಭಿಮಾನಿಗಳ ಸಂಘದಿಂದ ಕರ್ಣಾಟಕ ಪ್ರಶಸ್ತಿ

ಬೆಳ್ತಂಗಡಿ ಹವ್ಯಕ ಸಭೆಯ ದಶಮಾನ ಪ್ರಶಸ್ತಿ

೨೦೧೬-೨೦೧೭ ನೆಯ ಸಾಲಿನ ಕರ್ನಾಟಕ ಸಂಗೀತ ನಾಟಕ ಅಕಾಡೆಮಿ ಯ ಕರ್ಣಾಟಕ ಕಲಾಶ್ರೀ ಗೌರವ ಪ್ರಶಸ್ತಿ.

ಬೆಳಗಾವಿಯ ಗಮಕ ಕಲಾ ಸಮ್ಮೇಳನದಲ್ಲಿ ಗಮಕ ರತ್ನಾಕರ ಪ್ರಶಸ್ತಿ

ಬೆಂಗಳೂರಿನಲ್ಲಿ ನಡೆದ ೩ ನೆಯ ವಿಶ್ವ ಹವ್ಯಕ ಸಮ್ಮೇಳನದಲ್ಲಿ ಹವ್ಯಕ ಸಾಧಕ ರತ್ನ ಪ್ರಶಸ್ತಿ.
ಹವ್ಯಕ ಸಾಧಕ ಪ್ರಶಸ್ತಿ

ಗಮಕ ಕಲಾ ಪರಿಷತ್ತು-ಬೆಂಗಳೂರು ಇವರಿಂದ ಸನ್ಮಾನ ಹೀಗೆ ಅನೇಕ ಸಂಘ-ಸಂಸ್ಥೆಗಳಿಂದ ಗೌರವ ಸನ್ಮಾನಗಳು ಲಭಿಸಿವೆ.

ಲೇಖಕರಾಗಿ

ನೇಮಿಚಂದ್ರ ನ [ ೧೨ ನೆಯ ಶತಮಾನದ ಕೊನೆಯ ಭಾಗದಲ್ಲಿದ್ದ ಜೈನ ಕವಿ] ಕಥೆಗಳು ( ಸಂಗ್ರಹ)
ಶ್ರೀ ರಾಘವೇಶ್ವರ ಕೀರ್ತನ ಶತಕಂ ( ಕೀರ್ತನೆಗಳು)
ವಿಶ್ವವಂದ್ಯ ಗೋಮಾತೆ ( ಗೋ ಕೀರ್ತನೆಗಳು)
ಶ್ರೀ ಕೃಷ್ಣ ಚೈತನ್ಯ ( ಜೀವನ ಚರಿತ್ರೆ)
ಗಮಕ ಕೋಗಿಲೆ ಪಂ. ಮುಳಿಯ ತಿಮ್ಮಪ್ಪಯ್ಯ ( ವ್ಯಕ್ತಿ ಪರಿಚಯ)
ಕಲಾ ದರ್ಶನ ( ಗಮಕ ಕಲೆಯ ಲೇಖನಗಳು)
ಶ್ರೀ ಶರಾವತಿ ಮಹಾತ್ಮ ( ಪದ್ಯಶಃ ಭಾವಾನುವಾದ)
ಪರಂಪರೆ ( ಲೇಖನ ಸಂಗ್ರಹ)
ವಂದೇ ಗುರೂಣಾಮ್ ( ಗುರುಗಳ ಬಗ್ಗೆ ಲೇಖನಗಳು)
ಪುರಾಣ ಪ್ರಪಂಚ -- ಭಾಗ ೧ ( ಶ್ರೀ ರಾಮಚಂದ್ರಾಪುರ ಮಠದ ಮಾಸ ಪತ್ರಿಕೆ-ಧರ್ಮ ಭಾರತೀ ಯಲ್ಲಿ ಧಾರಾವಾಹಿಯಾಗಿ ಬಂದುದು, ಈಗ ಪುಸ್ತಕ ರೂಪದಲ್ಲಿ)
ಪುನರ್ನವ ( ಲೇಖನಗಳ ಸಂಗ್ರಹ)
ಕೃತಿ ಬಿಡುಗಡೆ
ವಿದ್ವಾನ್ ಟಿ.ಕೇಶವ ಭಟ್ಟರ ಗುರುಚರಿತ್ರಾಮೃತಮ್ ಕಾವ್ಯದ ಭಾವಾನುವಾದ.
ಸಂಗಮ, ಸಮಾಗಮ, ಶ್ರೀಗಂಧ, ಭೂರಮೆ. ( ಕವನ ಸಂಗ್ರಹಗಳು)