ತಾರಾಸ್ ಬೆಟ್ಟ

ತಾರಾಸ್ ಬೆಟ್ಟ (ಉಕ್ರೇನಿಯನ್: Тарасова гора) ಅಥವಾ ಚೆರ್ನೆಚಾ ಹೋರಾ (Чернеча гора, ಅರ್ಥ: ‘ಸನ್ಯಾಸಿಯ ಬೆಟ್ಟ’) ಎಂಬುದು ಉಕ್ರೇನ್‌ನ ಕನಿವ್ ನಗರದ ಸಮೀಪ, ಡ್ನಿಪ್ರೊ ನದಿಯ ದಡದಲ್ಲಿರುವ ಐತಿಹಾಸಿಕ ಬೆಟ್ಟವಾಗಿದೆ. ಇದು ಶೆವ್ಚೆಂಕೊ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶದ ಪ್ರಮುಖ ಸ್ಥಳಗಳಲ್ಲಿ ಒಂದಾಗಿದೆ. ಪ್ರಸಿದ್ಧ ಉಕ್ರೇನಿಯನ್ ಕವಿ ಮತ್ತು ಕಲಾವಿದ ತಾರಾಸ್ ಶೆವ್ಚೆಂಕೊ ಅವರ ಪಾರ್ಥಿವ ಶರೀರವನ್ನು 1861ರಿಂದ ಈ ಬೆಟ್ಟದಲ್ಲಿಯೇ ಸಮಾಧಿ ಮಾಡಲಾಗಿದೆ. ಅವರ ಮೂಲ ಸಮಾಧಿ ಸ್ಥಳವು ಸೇಂಟ್ ಪೀಟರ್ಸ್‌ಬರ್ಗ್‌ನ ಸ್ಮೋಲೆನ್ಸ್ಕಿ ಸ್ಮಶಾನವಾಗಿತ್ತು. ನಂತರ ಅವರ ಪಾರ್ಥಿವ ಶರೀರವನ್ನು ಡ್ನಿಪ್ರೊ ನದಿಯ ದಡಕ್ಕೆ ಸ್ಥಳಾಂತರಿಸಲಾಯಿತು

1914ರಲ್ಲಿ ಬೆಟ್ಟದಲ್ಲಿದ್ದ ಶೆವ್ಚೆಂಕೊ ಅವರ ಕಂಚಿನ ಶಿಲುಬೆಯ ಬಳಿ ಕಾವಲು ಕಾಯುತ್ತಿದ್ದ ಸೈನಿಕರು

ಐತಿಹಾಸಿಕ ಹಿನ್ನೆಲೆ

ತಾರಾಸ್ ಬೆಟ್ಟವು ಶತಮಾನಗಳಿಂದ ಧಾರ್ಮಿಕ ಮತ್ತು ಐತಿಹಾಸಿಕ ಮಹತ್ವ ಹೊಂದಿರುವ ಸ್ಥಳವಾಗಿದೆ. ಈ ಬೆಟ್ಟವು ಹಿಂದೆ ಕನಿವ್‌ನ ಹೋಲಿ ಡಾರ್ಮಿಷನ್ ಮಠಕ್ಕೆ ಸೇರಿತ್ತು. ಇದು ಪೂರ್ವ ಆರ್ಥೊಡಾಕ್ಸ್ ಮಠವಾಗಿದ್ದು, 11ನೇ ಶತಮಾನದಿಂದ ಇಲ್ಲಿ ಅಸ್ತಿತ್ವದಲ್ಲಿತ್ತು. ಈ ಮಠವು ಉಕ್ರೇನ್‌ನ ಹಲವು ಹೆಟ್ಮನ್‌ಗಳ ಸಮಾಧಿ ಸ್ಥಳವಾಗಿತ್ತು. ಅವರಲ್ಲಿ ಇವಾನ್ ಪಿಡ್ಕೋವಾ, ಸಮಿಯ್ಲೊ ಕಿಶ್ಕಾ ಮತ್ತು ಇತರ ಪ್ರಮುಖ ವ್ಯಕ್ತಿಗಳು ಸೇರಿದ್ದಾರೆ.

ತಾರಾಸ್ ಶೆವ್ಚೆಂಕೊ ಅವರ ನಿಧನದ ನಂತರ ಅವರ ಅಂತಿಮ ಇಚ್ಛೆಯಂತೆ ಅವರನ್ನು ಉಕ್ರೇನ್‌ನ ನೆಲದಲ್ಲಿ ಸಮಾಧಿ ಮಾಡಲಾಯಿತು. ಅವರ ಸಮಾಧಿ ಸ್ಥಳವು ಕ್ರಮೇಣ ಉಕ್ರೇನಿಯನ್ ರಾಷ್ಟ್ರೀಯ ಸ್ಮೃತಿ ಮತ್ತು ಸಾಂಸ್ಕೃತಿಕ ಗುರುತಿನ ಪ್ರಮುಖ ಸಂಕೇತವಾಗಿ ರೂಪುಗೊಂಡಿತು.

1914ರಲ್ಲಿ ತಾರಾಸ್ ಶೆವ್ಚೆಂಕೊ ಅವರ ಜನ್ಮಶತಮಾನೋತ್ಸವದ ಸಂದರ್ಭದಲ್ಲಿ ಅವರ ಸಮಾಧಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಯಾತ್ರೆ ಕೈಗೊಳ್ಳುವ ಸಾಧ್ಯತೆ ಇತ್ತು. ಈ ಯಾತ್ರೆಯನ್ನು ತಡೆಯಲು ರಷ್ಯಾದ ಸರ್ಕಾರವು ಬೆಟ್ಟಕ್ಕೆ ಜೆಂಡಾರ್ಮ್‌ಗಳು ಮತ್ತು ಕೊಸಾಕ್ ಸೈನಿಕರನ್ನು ಕಳುಹಿಸಿತು.

1923ರಿಂದ ಈ ಬೆಟ್ಟವು ಕನಿವ್ ಪ್ರಕೃತಿ ಸಂರಕ್ಷಿತ ಪ್ರದೇಶದ ಭಾಗವಾಯಿತು. 1926ರಲ್ಲಿ ತಾರಾಸ್ ಶೆವ್ಚೆಂಕೊ ಅವರಿಗೆ ಸಮರ್ಪಿತವಾದ ವಿಶೇಷ ಕನಿವ್ ಮ್ಯೂಸಿಯಂ-ಸಂರಕ್ಷಿತ ಪ್ರದೇಶವನ್ನು ಸ್ಥಾಪಿಸಲಾಯಿತು. 1939ರಲ್ಲಿ ರಷ್ಯಾದ ಶಿಲ್ಪಿ ಮಾತ್ವೇ ಮನಿಜರ್ ಅವರು ತಾರಾಸ್ ಶೆವ್ಚೆಂಕೊ ಅವರ ಕಂಚಿನ ಪ್ರತಿಮೆಯನ್ನು ನಿರ್ಮಿಸಿದರು. ವಾಸ್ತುಶಿಲ್ಪಿ ಯೆವ್ಗೆನಿ ಲೆವಿನ್ಸನ್ ಅವರ ಸಹಕಾರದಿಂದ ನಿರ್ಮಿಸಲಾದ ಈ ಪ್ರತಿಮೆ ಮತ್ತು ಹೊಸ ವಸ್ತುಸಂಗ್ರಹಾಲಯದ ಕಟ್ಟಡವು ಸ್ಥಳದ ಪ್ರಮುಖ ಆಕರ್ಷಣೆಗಳಾದವು. ವಸ್ತುಸಂಗ್ರಹಾಲಯದ ಕಟ್ಟಡವನ್ನು ಉಕ್ರೇನಿಯನ್ ವಾಸ್ತುಶಿಲ್ಪಿಗಳಾದ ವಾಸಿಲ್ ಕ್ರಿಚೆವ್ಸ್ಕಿ ಮತ್ತು ಪೆಟ್ರೊ ಕೊಸ್ಟಿರ್ಕೊ ವಿನ್ಯಾಸಗೊಳಿಸಿದರು.[3]

1978ರಲ್ಲಿ ತಾರಾಸ್ ಬೆಟ್ಟದಲ್ಲಿಯೇ ಒಲೆಕ್ಸಾ ಹಿರ್ನಿಕ್ ಅವರು ಉಕ್ರೇನಿಯನ್ ಭಾಷೆ, ಸಂಸ್ಕೃತಿ ಮತ್ತು ಇತಿಹಾಸದ ಮೇಲಿನ ಸೋವಿಯತ್ ದಮನವನ್ನು ವಿರೋಧಿಸಿ ತಮ್ಮನ್ನು ತಾವು ಬೆಂಕಿಗೆ ಆಹುತಿ ಮಾಡಿಕೊಂಡು ಸಾವನ್ನಪ್ಪಿದರು. ಈ ಘಟನೆ 1918ರಲ್ಲಿ ಉಕ್ರೇನ್ ಸ್ವಾತಂತ್ರ್ಯ ಘೋಷಿಸಿದ ಆರಂಭಿಕ ಘಟನೆಯ 60ನೇ ವಾರ್ಷಿಕೋತ್ಸವದ ದಿನದಂದು ನಡೆಯಿತು.

ಸಾಂಸ್ಕೃತಿಕ ಮಹತ್ವ ಮತ್ತು ಪ್ರಸ್ತುತ ಸ್ಥಿತಿ

ತಾರಾಸ್ ಬೆಟ್ಟವು ಇಂದು ಉಕ್ರೇನ್‌ನ ಸಾಹಿತ್ಯ, ಸಂಸ್ಕೃತಿ, ಇತಿಹಾಸ ಮತ್ತು ರಾಷ್ಟ್ರೀಯ ಗುರುತಿನ ಪ್ರಮುಖ ಸಂಕೇತಗಳಲ್ಲಿ ಒಂದಾಗಿದೆ. ತಾರಾಸ್ ಶೆವ್ಚೆಂಕೊ ಅವರು ಉಕ್ರೇನ್‌ನ ಅತ್ಯಂತ ಪ್ರಮುಖ ಕವಿಗಳು ಮತ್ತು ಕಲಾವಿದರಲ್ಲಿ ಒಬ್ಬರಾಗಿದ್ದು, ಅವರ ಸಮಾಧಿ ಇರುವ ಈ ಸ್ಥಳವು ಅವರ ಜೀವನ ಮತ್ತು ಕೃತಿಗಳನ್ನು ಸ್ಮರಿಸುವ ಪ್ರಮುಖ ಕೇಂದ್ರವಾಗಿದೆ.

ಪ್ರಸ್ತುತ ಈ ಬೆಟ್ಟವು ಕವಿ ತಾರಾಸ್ ಶೆವ್ಚೆಂಕೊ ಅವರಿಗೆ ಸಮರ್ಪಿತವಾದ ಶೆವ್ಚೆಂಕೊ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶದ ಭಾಗವಾಗಿದೆ. ಉಕ್ರೇನ್‌ನ ವಿವಿಧ ಭಾಗಗಳಿಂದ ಮಾತ್ರವಲ್ಲದೆ ವಿದೇಶಗಳಿಂದಲೂ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಮತ್ತು ಸಂದರ್ಶಕರು ಈ ಸ್ಥಳಕ್ಕೆ ಭೇಟಿ ನೀಡುತ್ತಾರೆ. ಬೆಟ್ಟದ ಮೇಲಿರುವ ಶೆವ್ಚೆಂಕೊ ಅವರ ಸ್ಮಾರಕ ಮತ್ತು ವಸ್ತುಸಂಗ್ರಹಾಲಯವು ಪ್ರವಾಸಿಗರಿಗೆ ಅವರ ಜೀವನ, ಸಾಹಿತ್ಯ ಮತ್ತು ಉಕ್ರೇನ್‌ನ ಸಾಂಸ್ಕೃತಿಕ ಇತಿಹಾಸದ ಕುರಿತು ತಿಳಿದುಕೊಳ್ಳಲು ಅವಕಾಶ ನೀಡುತ್ತದೆ.

ತಾರಾಸ್ ಶೆವ್ಚೆಂಕೊ ಅವರ ಸ್ಮರಣಾರ್ಥವಾಗಿ ಇಲ್ಲಿ ‘ತಾರಾಸೊವಾ ತ್ಸೆರ್ಕ್ವಾ’ (ತಾರಾಸ್ ಚರ್ಚ್) ಎಂಬ ಚರ್ಚ್ ನಿರ್ಮಿಸುವ ಯೋಜನೆಯೂ ಇದೆ. ಈ ಸ್ಥಳವು ಪ್ರಕೃತಿ ಸೌಂದರ್ಯ, ಐತಿಹಾಸಿಕ ಪರಂಪರೆ ಮತ್ತು ಸಾಂಸ್ಕೃತಿಕ ಮಹತ್ವವನ್ನು ಒಂದೇ ಕಡೆ ಹೊಂದಿರುವುದರಿಂದ ಉಕ್ರೇನ್‌ನ ಪ್ರಮುಖ ಪ್ರವಾಸಿ ಹಾಗೂ ಸ್ಮಾರಕ ಸ್ಥಳಗಳಲ್ಲಿ ಒಂದಾಗಿದೆ.

ಚೆರ್ನೆಚಾ ಹೋರಾವನ್ನು ಐತಿಹಾಸಿಕ, ನೈಸರ್ಗಿಕ ಮತ್ತು ಸಾಂಸ್ಕೃತಿಕ ಮಹತ್ವ ಹೊಂದಿರುವ ರಾಷ್ಟ್ರೀಯ ಪ್ರಾಮುಖ್ಯತೆಯ ಸ್ಮಾರಕವೆಂದು ಪರಿಗಣಿಸಲಾಗಿದೆ. ಇದು ಉಕ್ರೇನ್‌ನ ರಾಷ್ಟ್ರೀಯ ಸ್ಮಾರಕವೂ ಆಗಿದ್ದು, ತಾರಾಸ್ ಶೆವ್ಚೆಂಕೊ ಅವರ ಪರಂಪರೆ ಮತ್ತು ಉಕ್ರೇನಿಯನ್ ಸಾಂಸ್ಕೃತಿಕ ಗುರುತಿನೊಂದಿಗೆ ಆಳವಾಗಿ ಸಂಬಂಧ ಹೊಂದಿದೆ.