ಆರ್‌ಬಿಎಲ್ ಬ್ಯಾಂಕ್

ಆರ್​ಬಿಎಲ್ ಬ್ಯಾಂಕ್ (ಹಳೆಯ ಹೆಸರು -ರತ್ನಾಕರ್ ಬ್ಯಾಂಕ್ ಲಿಮಿಟೆಡ್) 1943 ರಲ್ಲಿ ಸ್ಥಾಪನೆಯಾದ ಹಾಗೂ ಮುಂಬೈನಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಭಾರತದ ಒಂದು ಖಾಸಗಿ ವಲಯದ ಬ್ಯಾಂಕ್ ಆಗಿದೆ. ಈ ಬ್ಯಾಂಕ್ ಸಾಂಸ್ಥಿಕ ಬ್ಯಾಂಕಿಂಗ್ ಸೇವೆಗಳು, ಚಿಲ್ಲರೆ ಬ್ಯಾಂಕಿಂಗ್ ಸೇವೆಗಳು, ಮೈಕ್ರೋಬ್ಯಾಂಕಿಂಗ್ ಸೇರಿದಂತೆ ಹಲವು ಹಣಕಾಸು ಸೇವೆಗಳನ್ನು ತನ್ನ ಗ್ರಾಹಕರಿಗೆ ಒದಗಿಸುತೀದೆ. ಒಟ್ಟು ೨೮ ರಾಜ್ಯಗಳಲ್ಲಿ ಈ ಬ್ಯಾಂಕಿನ ಶಾಖೆಗಳು ಇದ್ದು, ೬೦೩ ಶಾಖೆಗಳು, ೧೪೭೪ ಪ್ರಾತಿನಿಧಿಕ ಶಾಖೆಗಳು, ೪೧೨ ನಗದು ತೆಗೆಯುವ ಯಂತ್ರಗಳು ಅಸ್ತಿತ್ವದಲ್ಲಿ ಇವೆ. ಪ್ರಸ್ತುತ ಬ್ಯಾಂಕಿಗೆ ೧.೫ ಕೋಟಿಗೂ ಹೆಚ್ಚಿನ ಗ್ರಾಹಕರು ಇದ್ದಾರೆ. ಮಾರುಕಟ್ಟೆ ಬಂಡವಾಳದ ಆಧಾರದಲ್ಲಿ ಈ ಸಂಸ್ಥೆ ಖಾಸಗಿ ಬ್ಯಾಂಕಿಂಗ್ ಸಂಸ್ಥೆಗಳ ಪಟ್ಟಿಯಲ್ಲಿ ೧೦ನೇ ಸ್ಥಾನದಲ್ಲಿ ಇದೆ.

ಇತಿಹಾಸ

ಭಾರತೀಯ ಕಂಪೆನಿ ಕಾಯ್ದೆ ೧೯೧೩ರ ಅಡಿಯಲ್ಲಿ, ಜೂನ್ ೧೪ ೧೯೪೩ನೇ ಇಸವಿಯಲ್ಲಿ ರತ್ನಾಕರ್ ಬ್ಯಾಂಕ್ ಆರಂಭವಾಯಿತು. ಶುರುವಿನಲ್ಲಿ ಒಂದು ಪ್ರಾದೇಶಿಕ ಬ್ಯಾಂಕ್ ರೂಪದಲ್ಲಿ ಸ್ಥಾಪನೆಯಾದ ಈ ಬ್ಯಾಂಕನ್ನು ಸಾಂಗ್ಲಿಯ ಬಾಬಗೊಂಡ ಭುಜಗೊಂಡ ಪಾಟೀಲ್ ಮತ್ತು ಕೊಲ್ಲಾಪುರದ ಗಂಗಪ್ಪ ಸಿದ್ದಪ್ಪ ಚೌಗುಲೆ ಇಬ್ಬರು ಸೇರಿ  ಸ್ಥಾಪಿಸಿದರು. ಆರಂಭದಲ್ಲಿ ಕೊಲ್ಲಾಪುರ ಮತ್ತು ಸಾಂಗ್ಲಿಯಲ್ಲಿ ತಲಾ ಒಂದು ಶಾಖೆಯನ್ನು ತೆರೆಯಲಾಯಿತು. ಮುಖ್ಯವಾಗಿ ಕೊಲ್ಲಾಪುರ-ಸಾಂಗ್ಲಿ ವಲಯದ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ ಹಾಗೂ ವಾಣಿಜ್ಯ ವ್ಯಾಪಾರಿಗಳಿಗೆ ಈ ಬ್ಯಾಂಕ್ ಸೇವೆ ನೀಡುತ್ತಿತ್ತು.

1959 ರಲ್ಲಿ, ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಕಾಯ್ದೆ 1934ರ ಪ್ರಕಾರ, ಈ ಬ್ಯಾಂಕ್ ಅನ್ನು 'ಷೆಡ್ಯೂಲ್ಡ್ ಕಮರ್ಷಿಯಲ್ ಬ್ಯಾಂಕ್' ಎಂದು ವರ್ಗೀಕರಿಸಿತು. ನಂತರ 1970ನೇ ಇಸವಿಯಲ್ಲಿ, ಇದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಿಂದ ಬ್ಯಾಂಕಿಂಗ್ ಪರವಾನಗಿಯನ್ನು ಪಡೆದುಕೊಂಡಿತು.

ಆಗಸ್ಟ್ 2014 ರಲ್ಲಿ, ಈ ಬ್ಯಾಂಕ್‌ನ ಹೆಸರನ್ನು 'ಆರ್​ಬಿಎಲ್ ಬ್ಯಾಂಕ್ ಲಿಮಿಟೆಡ್' ಎಂದು ಬದಲಾಯಿಸಲಾಯಿತು.

ಸ್ವಾಧೀನ

2013 ರಲ್ಲಿ, ರತ್ನಾಕರ್ ಬ್ಯಾಂಕ್ ಭಾರತದಲ್ಲಿದ್ದ ಸ್ಕಾಟ್ಲೆಂಡ್ ಮೂಲದ 'ರಾಯಲ್ ಬ್ಯಾಂಕ್ ಆಫ್ ಸ್ಕಾಟ್‌ಲ್ಯಾಂಡ್ ನ ಬಿಸಿನೆಸ್ ಬ್ಯಾಂಕಿಂಗ್, ಅಡಮಾನ ಮತ್ತು ಕ್ರೆಡಿಟ್ ಕಾರ್ಡ್ ವ್ಯವಹಾರ ವಿಭಾಗಗಳನ್ನು ಸ್ವಾಧೀನಪಡಿಸಿಕೊಂಡಿತು.