ಕ್ವಿಲ್ಟ್

ವಿಕಿಪೀಡಿಯದಿಂದ, ಇದು ಮುಕ್ತ ಹಾಗೂ ಸ್ವತಂತ್ರ ವಿಶ್ವಕೋಶ

ಕ್ವಿಲ್ಟ್ ಒಂದು ಬಹುಪದರದ ಬಟ್ಟೆಯಾಗಿದೆ ಮತ್ತು ಸಾಂಪ್ರದಾಯಿಕವಾಗಿ ನೂಲಿನ ಮೂರು ಪದರಗಳನ್ನು ಹೊಂದಿರುತ್ತದೆ: ನೇಯ್ದ ಬಟ್ಟೆಯ ಮೇಲ್ಪದರ, ಬ್ಯಾಟಿಂಗ್ (ಹಾಳೆಗಳಾಗಿ ತಯಾರಿಸಿದ ಹತ್ತಿ) ಅಥವಾ ವ್ಯಾಡಿಂಗ್‍ನ ಪದರ, ಮತ್ತು ನೇಯ್ದ ಹಿಂಬದಿ. ಇವುಗಳನ್ನು ಕ್ವಿಲ್ಟಿಂಗ್ ತಂತ್ರವನ್ನು (ಮೂರೂ ಪದರಗಳನ್ನು ಒಟ್ಟಾಗಿ ಹೊಲಿಯುವ ಪ್ರಕ್ರಿಯೆ) ಬಳಸಿ ಸಂಯೋಜಿಸಲಾಗುತ್ತದೆ. ಕ್ವಿಲ್ಟ್‌ನ ಮೇಲ್ಪದರಕ್ಕಾಗಿ ಒಂದೇ ಬಟ್ಟೆ ತುಂಡನ್ನು ಬಳಸಿದ್ದರೆ (ಪೂರಾಬಟ್ಟೆ ಕ್ವಿಲ್ಟ್), ಹೊಲಿಗೆಯ ಮಾದರಿಯು ಪ್ರಧಾನ ಅಲಂಕಾರಿಕ ಅಂಶವಾಗಿರಬಹುದು, ಆದರೆ ಅನೇಕ ಸಂದರ್ಭಗಳಲ್ಲಿ ಮೇಲ್ಪದರವನ್ನು ಹೆಚ್ಚು ಚಿಕ್ಕ ಬಟ್ಟೆ ತುಂಡುಗಳ ತೇಪೆ ಕೆಲಸದ ಮೂಲಕ ಒಟ್ಟುಗೂಡಿಸಲಾಗಿರುತ್ತದೆ; ಈ ತುಂಡುಗಳ ಮಾದರಿ ಮತ್ತು ಬಣ್ಣವು ವಿನ್ಯಾಸಕ್ಕೆ ಮುಖ್ಯವಾಗಿರುತ್ತದೆ.

ಇಪ್ಪತ್ತೊಂದನೇ ಶತಮಾನದಲ್ಲಿ, ಕ್ವಿಲ್ಟ್‌ಗಳನ್ನು ಹಲವುವೇಳೆ ಪ್ರಯೋಜನಕಾರಿಯಾಗಿರದ ಕಲಾಕೃತಿಗಳಾಗಿ ಪ್ರದರ್ಶಿಸಲಾಗುತ್ತದೆ[೧] ಆದರೆ ಐತಿಹಾಸಿಕವಾಗಿ ಕ್ವಿಲ್ಟ್‌ಗಳನ್ನು ಹಲವುವೇಳೆ ಹಚ್ಚಡಗಳಾಗಿ ಬಳಸಲಾಗುತ್ತದೆ; ಮತ್ತು ಈ ಬಳಕೆ ಇಂದೂ ಮುಂದುವರೆದಿದೆ.

ಕ್ವಿಲ್ಟ್‌ಗಳ ಉಪಯೋಗಗಳಿಗೆ ಸಂಬಂಧಿಸಿದ ಅನೇಕ ಸಂಪ್ರದಾಯಗಳಿವೆ. ಮದುವೆ, ಮಗುವಿನ ಜನನ, ಒಬ್ಬ ಕುಟುಂಬ ಸದಸ್ಯನು ಮನೆ ಬಿಡುವುದು, ಅಥವಾ ಪದವಿ ಪ್ರಾಪ್ತಿಗಳಂತಹ ಜೀವನದ ಪ್ರಮುಖ ಘಟನೆಗಳನ್ನು ಗುರುತಿಸಲು ಕ್ವಿಲ್ಟ್‌ಗಳನ್ನು ತಯಾರಿಸಬಹುದು ಅಥವಾ ನೀಡಬಹುದು. ಆದುನಿಕ ಕ್ವಿಲ್ಟ್‌ಗಳು ಯಾವಾಗಲೂ ಹಾಸಿಗೆ ಅಥವಾ ಹಾಸಿಗೆಯ ಹಚ್ಚಡವಾಗಿ ಬಳಸುವುದಕ್ಕೆ ಉದ್ದೇಶಿತವಾಗಿರುವುದಿಲ್ಲ, ಮತ್ತು ಇವನ್ನು ಗೋಡೆ ತೂಗುವಸ್ತುಗಳು, ಟೇಬಲ್ ರನರ್‌ಗಳು, ಅಥವಾ ಮೇಜುಬಟ್ಟೆಗಳಾಗಿ ಬಳಸಬಹುದು. ಕ್ವಿಲ್ಟಿಂಗ್ ತಂತ್ರಗಳನ್ನು ಹಲವುವೇಳೆ ಉಡುಪು ವಿನ್ಯಾಸದಲ್ಲಿಯೂ ಒಳಗೊಳ್ಳಲಾಗುತ್ತದೆ. ಕ್ವಿಲ್ಟ್ ಪ್ರದರ್ಶನಗಳು ಮತ್ತು ಸ್ಪರ್ಧೆಗಳನ್ನು ಸ್ಥಳೀಯವಾಗಿ, ಪ್ರಾದೇಶಿಕವಾಗಿ, ಮತ್ತು ರಾಷ್ಟ್ರಮಟ್ಟದಲ್ಲಿ ಆಯೋಜಿಸಲಾಗುತ್ತದೆ. ಅಂತರರಾಷ್ಟ್ರೀಯ ಸ್ಪರ್ಧೆಗಳೂ ಇವೆ, ವಿಶೇಷವಾಗಿ ಅಮೇರಿಕ, ಜಪಾನ್, ಮತ್ತು ಯೂರೋಪ್‍ನಲ್ಲಿ. ಕ್ವಿಲ್ಟ್ ಅನ್ನು ತಯಾರಿಸಲು ಅನೇಕ ಕಾರಣಗಳಿರಬಹುದು. ಅವುಗಳೆಂದರೆ ಹಾಸಿಗೆಗಾಗಿ ಅಥವಾ ಹಚ್ಚಡವಾಗಿ, ಅಲಂಕಾರಕ್ಕಾಗಿ, ರಕ್ಷಾಕವಚವಾಗಿ, ಸ್ಮರಣೆಗಾಗಿ (ಉದಾ. ಏಡ್ಸ್ ಸ್ಮರಣಾರ್ಥದ ಕ್ವಿಲ್ಟ್), ಶಿಕ್ಷಣ (ಉದಾ. ವಿಜ್ಞಾನ ಕ್ವಿಲ್ಟ್), ಪ್ರಚಾರದಲ್ಲಿ, ಘಟನೆಗಳು / ಸಾಮಾಜಿಕ ಇತಿಹಾಸ, ಇತ್ಯಾದಿಗಳನ್ನು ದಾಖಲಿಸುವುದು, ಕಲಾತ್ಮಕ ಅಭಿವ್ಯಕ್ತಿ, ಉಡುಗೊರೆಗಾಗಿ, ಧನಸಂಗ್ರಹ ಕಾರ್ಯಕ್ರಮಕ್ಕಾಗಿ.

ಉಲ್ಲೇಖಗಳು[ಬದಲಾಯಿಸಿ]

  1. International Quilt Study Center and Museum. "Quilts as Art". World Quilts: The American Story. Retrieved 2 November 2015.