ಅವಲಕ್ಕಿ

ವಿಕಿಪೀಡಿಯ ಇಂದ
ಇಲ್ಲಿಗೆ ಹೋಗು: ಸಂಚರಣೆ, ಹುಡುಕು
ಅವಲಕ್ಕಿ ಒಗ್ಗರಣೆ

ಅವಲಕ್ಕಿಯು ಚಪ್ಪಟೆಯಾದ, ಹಗುರ ಮತ್ತು ಒಣ ಚೂರುಗಳಾಗಿ ಮಟ್ಟವಾಗಿಸಲಾದ ತಳಿಸಿದ ಅಕ್ಕಿ. ಅಕ್ಕಿಯ ಈ ಚೂರುಗಳು, ಬಿಸಿ ಅಥವಾ ತಣ್ಣನೆಯ, ದ್ರವಕ್ಕೆ ಸೇರಿಸಿದೊಡನೆ, ನೀರು, ಹಾಲು ಅಥವಾ ಇತರ ದ್ರವಗಳನ್ನು ಹೀರಿಕೊಳ್ಳುವುದರಿಂದ ಉಬ್ಬುತ್ತವೆ. ಬಹುತೇಕ ತೆಳು ಅವಲಕ್ಕಿಯಿಂದ ಸಾಮಾನ್ಯ ಅಕ್ಕಿಕಾಳಿನ ನಾಲ್ಕು ಪಟ್ಟು ದಪ್ಪವಿರುವ ಅವಲಕ್ಕಿಯವರೆಗೆ ಈ ಚೂರುಗಳ ದಪ್ಪ ಬದಲಾಗುತ್ತದೆ. ಅವಲಕ್ಕಿಯನ್ನು ಹಲವು ತಿಂಗಳುಗಳ ಕಾಲ ಕೆಡದಂತೆ ಇಡಬಹುದು. ಭಾರತದ ಹಲವು ರಾಜ್ಯಗಳಲ್ಲಿ ಅವಲಕ್ಕಿಯನ್ನು ವಿವಿಧ ರೀತಿಯ ತಿನಿಸುಗಳ ತಯಾರಿಕೆಯಲ್ಲಿ ಬಳಸಲಾಗುತ್ತದೆ. ಬೇರೆ ಬೇರೆ ನುಡಿಗಳಲ್ಲಿ ಅವಲಕ್ಕಿಯ ಹೆಸರುಗಳು ಹೀಗಿವೆ: ಅಟುಕುಲು (ತೆಲುಗು), ಅವಲ್ (ತಮಿಳು) ಮತ್ತು (ಮಲಯಾಳಂ), ಚಿಂಡಿ (ಬೆಂಗಾಳಿ) ಮತ್ತು ಬಿಹಾರ, ಝಾರ್ಖಂಡ್ ಭಾಗಗಳು, ಚಿರಾ (ಅಸ್ಸಾಮಿ), ಚೂಡಾ (ಒಡಿಯಾ), ಚಿವುರಾ (चिउरा) (ನೇಪಾಳಿ, ಭೋಜಪುರಿ, ಛತ್ತೀಸ್ ಘರಿ), ಪೋಹಾ (ಹಿಂದಿ), ಬಜಿ (ನೇವಾರಿ), ಪೋಹೆ (ಮರಾಠಿ), ಪೋವು (ಕೊಂಕಣಿ), and ಪವ್ವಾ (પૌંઆ) (ಗುಜರಾತಿ).

ತುಸುಬೇಯಿಸಿದ ಅಕ್ಕಿ (ಕುಸುಬಲಕ್ಕಿ)ಯಷ್ಟೇ ವಿಟಮಿನ್ ಅಂಶಗಳು ಇದರಲ್ಲಿರುತ್ತದೆ ಮತ್ತು ಪಾಲಿಶ್ ಮಾಡದೇ ಇರುವುದರಿಂದ ಪೋಷಕಾಂಶಗಳೂ ಇರುತ್ತವೆ. ಬಿ ಕಾಂಪ್ಲೆಕ್ಸ್ ವಿಟಮಿನ್ ನಿಯಾಸಿನ್ ಮತ್ತು ಕಬ್ಬಿಣದ ಅಂಶ ಹೇರಳವಾಗಿರುತ್ತದೆ. ಅವಲಕ್ಕಿಯನ್ನು ಮುಖ್ಯವಾಗಿ ಒಂದು ಲಘುತಿಂಡಿಯನ್ನಾಗಿ ಬಳಸಲಾಗುತ್ತದೆ. ಅವಲಕ್ಕಿಯು ಏಷಿಯಾದಲ್ಲಿ ಜನಪ್ರಿಯ ತಿನಿಸಾಗಿದೆ. ಇದಕ್ಕೆ ಹಲವು ರೀತಿಯ ಒಗ್ಗರಣೆ, ಮಸಾಲೆ, ಸಿಹಿ ಮುಂತಾದವುಗಳನ್ನು ಸೇರಿಸಿ ಹಲವು ಬಗೆಯ ತಿನಿಸುಗಳನ್ನು ತಯಾರಿಸಲಾಗುತ್ತದೆ. ಇದನ್ನು ಮೆದುವಾಗಿ, ಒಣದಾಗಿ ಅಥವಾ ಎಣ್ಣೆಯಲ್ಲಿ ಕರಿದು ಬಳಸಬಹುದು. ನೀರಿನಲ್ಲಿ ನೆನೆಸಿ ತೆಗೆದು ಅದಕ್ಕೆ ಹಾಲು ಅಥವಾ ಮೊಸರನ್ನು ಸೇರಿಸಿ ತಿನ್ನಬಹುದು. ಒಣ ಅವಲಕ್ಕಿಯ ಜೊತೆ ಬೆಲ್ಲ ಹಾಗೂ ಕೊಬ್ಬರಿಯನ್ನು ಸೇರಿಸಿ ತಿನ್ನಬಹುದು. ತಿನ್ನುವ ವಿಧಾನದಿಂದ ಹಿಡಿದು ಅವಲಕ್ಕಿ ಬಾತ್, ಒಗ್ಗರಣೆ ಅವಲಕ್ಕಿ, ಅವಲಕ್ಕಿಉಪ್ಪಿಟ್ಟು, ಅವಲಕ್ಕಿ ಶಿರಾ, ಅವಲಕ್ಕಿಪೊಂಗಲ್ ಮುಂತಾದ ತಿನಿಸುಗಳನ್ನು ಅವಲಕ್ಕಿಯಿಂದ ತಯಾರು ಮಾಡಬಹುದು. ಪಾಶ್ಚಾತ್ಯ ದೇಶಗಳಲ್ಲಿ ಇದನ್ನು ತಿಂಡಿಯಾಗಿ ಮಾರಾಟಮಾಡಲು ವಾಣಿಜ್ಯೋದ್ದೇಶದಿಂದ ತಯಾರಿಸಲಾಗುತ್ತದೆ.

ಸಾಂಪ್ರದಾಯಿಕ ತಯಾರಿಕೆಯ ವಿಧಾನ[ಬದಲಾಯಿಸಿ]

ಮೊದಲಿಗೆ ಕಾಳುಗಳನ್ನು ಮೆದುಗೊಳಿಸಲು ಭತ್ತವನ್ನು ೨-೩ ದಿನಗಳ ಕಾಲ ನೀರಿನಲ್ಲಿ ನೆನೆಸಲಾಗುತ್ತದೆ. ಅನಂತರ ಕೆಲವು ನಿಮಿಷಗಳ ಕಾಲ ನೀರಿನಲ್ಲಿ ಕುದಿಸಲಾಗುತ್ತದೆ. ಇದಾದಮೇಲೆ ನೀರನ್ನು ಬಸಿದು ಭತ್ತವನ್ನು ಮಣ್ಣಿನ ಪಾತ್ರೆಗಳಲ್ಲಿ ಬಿಸಿಮಾಡಲಾಗುತ್ತದೆ. ಇದರಿಂದ ಸಿಪ್ಪೆ ಬಿರಿಯುತ್ತದೆ. ಇದನ್ನು ಮರದ ಒನಕೆಯಿಂದ ಬಡಿಯಲಾಗುತ್ತದೆ. ಇದರಿಂದ ಭತ್ತವು ಚಪ್ಪಟೆಯಾಗುವುದರ ಜೊತೆಗೆ ಸಿಪ್ಪೆಯೂ ಬೇರ್ಪಡುತ್ತದೆ. ಈ ಬಡಿಯುವ ವಿಧಾನದಲ್ಲಿ ಬಳಸಲಾಗುವ ವಿವಿಧ ಒತ್ತಡದ ಮೇಲೆ ಅವಲಕ್ಕಿಯ ದಪ್ಪ ಬದಲಾಗುತ್ತದೆ. ಹೀಗೆ ತಯಾರಾಗುವ ಅವಲಕ್ಕಿಯು ತೆಳುವಾಗಿ ಬಿಳಿಬಣ್ಣದ್ದಾಗಿರುತ್ತದೆ.

"http://kn.wikipedia.org/w/index.php?title=ಅವಲಕ್ಕಿ&oldid=320239" ಇಂದ ಪಡೆಯಲ್ಪಟ್ಟಿದೆ